¿Fiestanaka amtañasäspati?

JANIW Bibliaxa yupaychäwinakan fiestanakapxa uñstaykiti, janirakiw yaqha ukham fiestanakaxa akapachan amtaski ukanaksa uñstaykarakiti. Ukhamasti, ¿kunjamatsa uka fiestanakaxa utji? Biblioteca jan ukax libronak maytʼir utanaka markaman utjchixa, ukanwa uñxatäta kawkitsa markaman fiestanakapaxa uñstani ukanakxa. Mä qhawqhanak uñjañäni.

Semana Santa. Jesusan jiwäwipwa ukat jaktäwipwa ukapachax amtasi sapxiwa, ukampisa Diosar jan yupaychir luräwinakwa lurapxi, sañäni, santonak kallnaqapxi. Las Grandes Religiones Ilustradas sat qillqataxa, uka tuqitxa akham qhanañchi, janir Cristox Uraqir jutkäna ukhawa, Babilonia markankirinakaxa “uñnaqanakaru wali askichsupxäna [...]. Wali jila valoran isinakampiwa isthapiyapxäna, kunkarusa collaranakampiw warkuntapxäna, pulseranakampi anillonakampiwa amparanakaparuxa uchapxäna; suma luratäwjanakaruwa uttʼayapxäna ukat kallnaqapxäna” siwa.

Machaq Mara. Machaq Marxa sapa markanwa mayj mayja amtapxi. Kunjamatsa uñstäna uka tuqitxa akham siwa mä qillqataxa: “Julio César Roma markan jachʼa apnaqiriwa enero phaxsit mä uru saraqataruxa Machaq Mara uñstayatayna khä 46 nayrïr pacha marana. Roma markachirinakasti punkunakana ukat qalltanakana Jano diosaparuwa uka urux uruyapxiritayna. Enero phaxsixa [Januarius satarakiw latín arunxa] Jano sutwa katuqäna, ukasti pä ajanunïnwa: mä tuqixa nayraqataruw uñchʼukïna, maysa tuqisti qhipa tuqirakwa uñchʼukirakïna” (The World Book Encyclopedia). Ukhamasti, Machaq Mara uruyañasti Diosar jan yupaychir jaqinakan costumbrenakaparjama uñstayatawa.

Yaqha fiestanaka. Janiwa taqpach fiestanakat parlksnati. Ukampisa, mä jaqir jachʼañchasa jan ukax kuna institucionaru jachʼañchasa fiestachañaxa Jehová Diosatakixa janipuniw walïkiti (Jeremías 17:5-7; Hechos 10:25, 26). Ukhamarusa, yupaychäwin mä fiestapaxa walispawa jan ukax janiw walïkaspati sañatakixa wakisiwa kunjam uñstayatasa uk yatiña (Isaías 52:11; Apocalipsis 18:4). Kuntix 16 jaljan uñjaniwaytanxa, Biblian uka yatichäwinakapawa yanaptʼätamxa kamsis Diosaxa fiestanakaru sarañatxa.