Yatiqaskañ sarnaqäwinaka: Pablo

Apóstol Pablox kunjamäns uk sum yatisïna. Ukatwa jan kun imtʼasax akham arsüna: “Aski lurañ munkta ukaxa, nayanxa ñanqhakwa jikxatta” sasa. Ukampis jupax suma jaqïnwa, taqi kuns sum lurañwa munirïna. Ukatwa akham qillqäna: “Chuymax manqhinxa Diosan leyiparu wal munta” sasa. Ukhamasti, ¿kunatsa “ñanqhakwa jikxatta” sasax sispachäna? “Naya kipkanxa mayaw utjitu, kuntix nayax munkta uka contrawa, ukasti janchixankkis uka juchan munañapawa, ukan katuntatarakïtwa” sänwa. Chiqpachansa, pantjasitanakapaw llakisiyäna, ukatwa akham jachʼat säna: “¡Kunakïkta nayaxa! ¿Khitis uka ñanqha janchin munañapatxa qhispiyitani?” sasa (Romanos 7:21-24).

¿Jumax ukhamarakit jikxatasta? ¿Pantjasisax llakistati? Pablox ukhamarakiw awisax jikxatasïna. Ukampis taqinir qhispiyañ layku Criston jiwatapat yatisaxa: “Dios maynikiw Jesucristo tuqi luraspaxa. Chiqpachansa nayax yuspagartwa” sasaw säna (Romanos 7:25). Jupatakix Jesucriston luqtasïwipax wali suma regalükaspas ukhamänwa . Ukatwa akham säna: “Diosan Yuqaparu iyawsatax laykukiw jakasktxa, nayar munasinwa jakañapa naya layku aptʼasiwayi” sasa (Gálatas 2:20). Pantjasitamat llakisstaxa, qhispiyäwitwa amtañama. Cristox juchan jaqinak laykuw jakäwip aptʼasiwayäna, janiw jan juchaninak laykuxa, uk janipun armasimti.