‘Jaysam Jehová Diosan arunakaparu’

1, 2. Akapachankir jaqenakjam sarnaqapki ukanakajja, ¿kunjamäpjjesa, ukat kunatsa jan jupanakjamañasäki?

JANIW jaqejj jichhürunakan istʼasjjapjjeti. Walja jaqenakajja, kuntï lurasipki ukajj walikïskpachati janicha uka toqetjj janiw llakisipkiti, munañaparjamakiw taqe kuns lurapjje. Sañäni: auto apnaqerinakasa, qollqemp irnaqapki ukanakasa kuna leyinakatï jupanakatak utjki ukjja janiw istʼjjapjjeti ukat markan pʼeqtʼirinakajja, kuna leyinaktï jupanakajj uttʼayapki ukanakjja jupanak pachpaw pʼakintapjje. Ukhamarakiw Jeremías urunakapanjja, kunatï jan walïki ukat jan waltʼaykaspa uk yatkasinsa, ‘taqenis jalakamak thakipanjam jalasipkäna’, mä arunjja, munañaparjamakiw akapachankir jaqenakjam lurasipkäna (Jer. 8:6).

² Taqe Chʼaman Jehová Diosamp askit uñjatäñ munirinakajja, janiw akapachankir jaqenakjam munañaparjam kuns lurapkiti, ukjj yattanwa. Ukat khitinakatï ‘Jehová Diosan arunakap jan jaysañ munapkäna’ ukat istʼañatak chʼamachasipkäna ukjja qhanwa Jeremiasajj uñachtʼayäna (Jer. 3:25; 7:28; 26:13; 38:20; 43:4, 7). Istʼasktanti janicha uk sapa mayniw amuytʼasiñasa. Kunattejj Supayajj jan amuykañwa Diosan taqe chuyma yupaychirinakaparojj kunaymanit jan waltʼayañ muni. Supayajja mä asirur uñtatawa, khitir jan waltʼayañatakisa amukiw suyi, ukat jan amuykayaw jan waltʼayi, venentʼkaspas ukhama. Ukampis Diosan arunakapar istʼañ amtatasaw Supayan venentʼir lakapat jitheqtañ yanaptʼistani. Jichhajja, ¿kunjamatsa Diosan arunakap istʼañatak chʼamachassna? Jeremiasan qellqatanakapaw yanaptʼistani.

¿KHITHIRUS ISTʼAÑASA?

3. ¿Kunatsa Jehová Diosar istʼañasajj wakisi?

³ ¿Kunatsa Jehová Diosarojj taqe kunans istʼañasa? Jeremiasajj uka toqet akham amuytʼayistu: “Tatitojj chʼamapampiw aka oraqe luri, amuytʼapampirakiw aka oraqsa saytʼayi” sasa (Jer. 10:12). Cheqas Jehová Diosaw taqe kunjjar Munañanejja, taqe apnaqerit sipansa Juparukiw ajjsarañasa. Ukat jiwasar yanaptʼir kamachinak churkistu uk phoqañ Jupakiw mayistaspa, kunattejj jiwasan askisatakiwa (Jer. 10:6, 7).

4, 5. 1) ¿Kuns Judionakajj machʼan uñjasipkän ukhajj yateqapjjäna? 2) Judá markan jakirinakajja, ¿kunjamsa Jehová Diosajj ‘jakañ uma’ churkäna uk ina chʼusar aptʼapjjäna? 3) ¿Kunjamsa Diosajj ‘jakañ uma’ churkistu uk umtʼsna?

⁴ Jehová Diosajj taqe kunjjar Munañaniwa, ukat jupaw jakayarakistu. Jeremías tiempopan jakapkäna ukanakajj qhanwa uk amuyapjjäna. Egipto markan jakapkäna ukanakajja, Nilo jawiratwa umapjjäna, ukampis Suma Oraqen jakapkäna ukanakat jilapartejj jallojj purkäna uka umatwa umapjjäna, ukat uka umjja oraq allsupkäna uka jachʼa estanquenakaruw imapjjarakïna (Deu. 11:13-17). Jehová Diosakiw jallu puriyañatak chʼamanïna, ukhamat achunak achuñapataki. Maysa toqetjja, Jupakirakiw jallu jan puriyjjaspänti. Ukatwa, Jeremiasajj jakkäna uka urunakan jan istʼasir judionakatakejj jallojj jan purjjänti, ukhamatwa yapunakapasa, uma phuchʼunakapasa ukat uma imañatak jachʼa estanquenakapas qʼal wañsjjäna (Jer. 3:3; 5:24; 12:4; 14:1-4, 22; 23:10).

⁵ Cheqpach umjja judionakajj wal munapjjäna, ukampis jilarkir ‘suma jakañ uma’ Jehová Diosajj churañ munkäna ukjja, janiw munapkänti. Jupanakajja yatkasinwa Diosan Leyinakap jan istʼapkänti ukat Diosar atinisiñat sipansa uka jakʼankir markanakarukiw atinisipjjäna. Uk lurasajja, mä chʼijuta estanquerus maynejj jukʼa umap machʼa tiempon imaski ukhamänwa, qhepatsti jan waltʼañanwa uñjasipjjäna (Jeremías 2:13 ukat 17:13 liytʼasiñapawa). Jan walir jan puriñatakejj janiw kunäkipans jupanakjam lurañasäkiti. Diosajj ‘suma jakañ umjja’ jilarkirwa churaskakistu, mä arunjja, Arupwa yanaptʼañatakejj churistu, ukampis yatjjatasa ukat ukarjam sarnaqasakiw askinak apsuñäni.

6. 1) ¿Kunjam chuymampis Sedequiasajj Diosar istʼäna? 2) ¿Uka reyejj janiw amuytʼaskänti sasajj kunatsa sissna?

⁶ Judionakar taripañ urojj jakʼachasinjjäna ukhajj jukʼampiw istʼasipjjañapajj wakisïna. Mä judiotï Jehová Diosampi askit uñjatäña ukat Jupamp imtʼatäña munchïnjja, jan wali luräwinakapatjja arrepentisiñapänwa ukat Juparojj istʼañaparakïnwa. Sedequías reyejja, mä aski luräwi phoqañ horasajja, janiw mä amtar uka toqet purkänti. Kunapachatï yanapirinakapajj Jeremiasar jiwayam sapkäna ukhajja, ajjsarañatjja jupajj istʼjjakïnwa. Kunjamtï phisqëri yatichäwin uñjaniwayktanjja, Ébed-mélec chachan yanaptʼapampiw Jeremiasajj uka jiwañat qhespïna. Ukatjja Sedequiasarojj akham sänwa: “Jaysam Tatitun arunakaparu” sasa (Jeremías 38:4-6, 20 liytʼasiñapawa). Ukhamajj Sedequías reyejj jupan askipatakejj mä amtaruw puriñapäna. ¿Diosar istʼpachäniti?

JEHOVÁ DIOSAROJJ JANKʼAKIW ISTʼAÑASA

7. ¿Kunjamanakansa Diosar istʼasirïtas uñachtʼaysna?

⁷ Kunjamtï nayra tiempon Jehová Diosar istʼañajj wali wakiskirïnjja, jichhürunakanjja ukhamarakiwa. Akham jisktʼasipjjañäni: “¿Taqe chuymat nayajj istʼäjja? Internetan wachoqa qʼañu luräwinak uñstaspa ukhajja, ¿uñchʼukiskakirïsti, jan ukajj jan waliru jan puriñatakejj jankʼakich jiwtʼayjjeristjja? Ukat Diosar jan yupaychir irnaqer jan ukajj yateqer masijajj uñtʼasiskañäni sitaspa ukhajja, ¿jan pächasisat ‘janiw’ siristjja? ¿Jehová Diosar kutkatasipki ukanakan yatichäwinakapajj Internet toqes jan ukajj libro toqes utjki uk walt liyiñ muntjja, jan ukajj qʼalch aparpaytjja?” sasa. Ukhamanakan uñjasisajja, kuntï Jeremías 38:20 siski uka arunak amtapjjapuniñasawa.

8, 9. 1) Irpir chuymaninakajj yanaptʼañ munapkistu ukhajja, ¿kunatsa istʼañasajj wakisi? 2) ¿Irpir chuymaninakajj kutin kutin ewjjtʼkistu uk kunjamsa uñjañasa?

⁸ Jehová Diosajj Jeremías toqew akham arunakamp kutin kutin markapar amtayäna: “Jan wali sarnaqäwinakamjja apanukupjjam, luräwinakamsa ukhamaraki sarnäqawinakamsa askichasipjjarakim” sasa (Jer. 7:3; 18:11; 25:5; Jeremías 35:15 liytʼasiñapawa). Ukhamarakiw irpir chuyman jilatanakajj Diosar yupaychañ toqet aynachtʼatäpki uka jilat kullakanakar yanaptʼañatakis chʼamachasipjje. Jiwasarutï jan wali luräwinakasat amuytʼasiñasatak ewjjtʼapjjestaspa ukhajj istʼasirïñasawa. Jupanakajja, Jeremiasjamarakiw yanaptʼañ munapjjestu.

⁹ Irpir chuymaninakajj inas Biblian ewjjtʼanakap mayamp amtaychistaspa. Cheqansa, wasitat amtayañajj jupanakatak chʼamawa, ukampis jan istʼasipki ukanakar amtayañajj jukʼamp chʼamäjjewa, kunjamtï niya taqe judionakajj Jeremiasar jan istʼapkäna ukhama. Irpir chuymaninakajj kutin kutin ewjjtʼkistu ukjja, Jehová Diosas munasiñapat ewjjtʼkistaspa ukham uñjapjjañäni. Judionakatï Jeremiasan ewjjtʼanakapar istʼapjjaspäna ukhajja, janiw walja kuti amtayañapajj wakiskasapänti. Ukhamasti, pachpa arunakampi jan ewjjtʼayasiskañatakejja, kuntï ewjjtʼapkistu ukarjam jankʼak lurapjjañäni.

JEHOVÁ DIOSAT PERDÓN JANIW INA CHʼUSATAK JIKJJATKSNATI

10. ¿Kunatsa Jehová Diosat perdón ina chʼusatak jan jikjjatksna?

¹⁰ Akapachanjja, Jehová Diosar sum istʼañatak wal chʼamachasiskstan ukhasa chʼamakiwa, ukhamajj Jehová Diosajj perdonañatak jankʼakïtapatjja, walpun yuspärtanjja. Ukampis janiw ina chʼusat perdón jikjjatksnati. ¿Kunatsa? Jupajj jan wali luräwinakjja uñisiwa (Isa. 59:2). Ukhamasti, cheqapunit taqe chuym arrepentistan janicha uk uñjasaw Jehová Diosajj perdonistaspa.

11. ¿Kunatsa Jehová Diosat juchanakas jan imtʼksna?

¹¹ Jeremías tiempopan jakapkäna ukanakajja, Jehová Diosarojj janiw istʼapkänti, ukatwa Jupan pacienciapsa ukat khuyapayasirïtapsa jan askit uñjapkänti. ¿Ukhaman jiwasajj uñjasiraksnati? Jïsa, Diosan ewjjtʼanakap pä chuymak istʼsna ukat yatkasin juchanak luraskaraksna ukhajja, ukhamanarakwa uñjassna. Ukham juchanakjja taqen uñjkataw awisajj lurapjje, sañäni yaqhepanakajj jaqechatäkasaw yaqhamp wachoq juch lurapjje. Ukham juch luratapjja inas jan khitis yatkchispati, ukampis Diosar jan istʼatapatjja jan walirojj purikipuniniwa. Jamasat jan walinak lurir mä jaqejj inas akham amuychispa, “kuntï lurkta ukjja janiw khitis yatkaniti” sasa, ukampis Jehová Diosajj amuyussa, chuymassa ukat kuntï uta manqhan lurktan uksa sum yati (Jeremías 32:19 liytʼasiñapawa). Maynitï juchar purchi ukhajja, ¿kuns lurañapa?

12. ¿Jan walinakat tamar jarkʼaqañatakejja awisajj kuns irpir chuymaninakajj lurapjjañapa?

¹² Jehová Diosajj Jeremías toqejj walja kutiw judionakar yanaptʼañ munäna, ukampis janiw yäqapkänti. Ukhamarakiw maynejj juchar purtʼasisajj jan arrepentiskaspa, ukat irpir chuymaninakan yanaptʼapsa janirakiw yäqkaspati. Ukhamäspa ukhajja, irpir chuymaninakajj Biblian kamachinakapan siski ukarjamaw lurapjjañapa ukat taman qʼomäñapatakejja, juch luririrojj tamat jaqsupjjañapawa (1 Cor. 5:11-13; “Janiw leyinïpkänti” siski uka recuadro uñjjattʼäta, ukajj 97 janankiwa). Ukhamajja, ¿juchar purtʼasipki ukanakajj janipuniw Diosamp sum apasjjapjjanit sisnati? Janiwa. Israelitanakajja walja tiempow Diosar jan istʼas sarnaqapjjäna, ukhamäkchïnsa Jehová Diosajj jupanakarojj akham sänwa: “Nayatak saytʼasir wawanaka, nayan ukar kuttanjjapjjam. nayarakiw [...] qollartʼjjapjjama” sasa (Jer. 3:22).a Jehová Diosajj juchar purtʼasir jaqenakarojj kuttʼanjjapjjam sasaw saski ukat kuttʼanipjjañapatakisa yanaptʼarakiwa.

JEHOVÁ DIOSAR ISTʼASA JUPAR KUTʼJJAPJJAM

13. ¿Kunsa Diosar kuttʼañ munirejj amuyañapa?

¹³ Kunjamti uka profetajj siskänjja, Diosar kuttʼjjañatakejj maynejj akham jisktʼasiñapawa: “¿Kunsa lurtjja?” sasa. Ukat jupa pachpaw Biblian yatichäwiparjam sum amuytʼasiñapa. Jeremiasan urunakapan jakapkäna uka jan arrepentisir judionakajj janiw ukham jisktʼasipkänti. Janis kuna juchanïpkaspa ukham sarnaqapjjäna, ukatwa Diosajj juchanakap jan perdonkänti (Jeremías 8:6 liytʼasiñapawa). Ukampis taqe chuyma arrepentisir jaqejja ak amuyi: Jehová Diosan kamachinakap jan istʼasajja, Diosan sutipwa qʼañuchi ukat Jupan markapsa jan walit uñjayaraki. Ukatjja, jan walinak lurasajj mayninakar chuymap ustʼayatap amuyasisajj wal pisayasi. Jïsa, kuna jan walinaktï lurawayki ukajj jan walipunïtap amuyasini ukhakiw Jehová Diosajj perdón mayisitaparojj istʼaspa, uksa yatiñaparakiwa. Ukampis Diosar kuttʼjjañatakejja, ¿kunamp lurañas wakisiraki?

14. ¿Kunjamatsa maynejj Jehová Diosar kuttʼaspa? (“¿Kunas cheqpach arrepentisiñajja?” siski uka recuadro uñjjattʼäta. Ukajj 98 janan jikjjatasi.)

¹⁴ Cheqpach arrepentisir jaqejja, amtanakapsa, munañanakapsa sarnaqäwipatsa sum amuytʼasi (Lamentaciones 3:40, 41 liytʼasiñapawa). Kunanakas jakäwipan jan waltʼaykaspa ukanaksa amuytʼasirakiwa, sañäni: machjayir umañanakata, cigar pitañata, Internetata ukat kunjamsa mä chacharus jan ukajj mä warmirus uñjaski jan ukajj aljañanak toqetsa amuytʼasiñapawa. Kunjamtï mä warmejj phayañ utapan qʼomäñapatak kʼuchut kʼuchu sum pichskejja, ukhamarakiw arrepentisir mä jaqejja, amuyupana ukat kuntï lurki ukan qʼomachasiñapatakejj chʼamachasi. Jïsa, kuntï Diosajj mayki ukarjam sarnaqasa ukat kamachinakap phoqasakiw maynejj Jehová Diosar kuttʼjjaspa. Jeremiasan urunakapan jakapkäna uka yaqhep judionakajja Diosarojj janiw “taqe chuymapampejja” kuttʼapkänti, mä arunjja, chuym pisayasipkaspas ukhamwa uñachtʼayapjjäna, ukampis jakäwipansa jan ukajj luräwipansa pachpakisipkänwa (Jer. 3:10). Jupanakat sipansa, khititï perdón jikjjatañ munki ukajja, Jehová Diosarusa ukat tamarusa janiw kʼarintkiti. Ukat yaqhepajj familiaranakapampi, jan ukajj jilat kullakanakampi jan walit jan uñjayasiñataki ukat jupanakampi wasitat chikäjjañ munañat sipansa, Jehová Diosan perdonap jikjjatañataki ukat Jupampi sum uñjatañ munasaw nayra jan wali luräwinakapjja jayti.

15. Arrepentisir jaqejja, ¿kunjamsa Diosar oración lurañapa?

¹⁵ Arrepentisiñatakejja, Diosar mayisiñaw yanaptʼistaspa. Nayra pachanjja, jaqenakajj alajjpachar ampar loqtasaw oración lurapjjerïna. Kunjamtï Jeremiasajj siskäna ukarjamaw taqe chuyma arrepentisit mä jaqejj mayisi, ‘alajjpachankir Diosarus amtäwinakap’ yatiykaspa ukhamats alajjpachar amparap loqtkaspa ukhama (Lam. 3:41, 42). Cheqpach arrepentisitapatjja, taqe chuymaw Jehová Diosat mayisi ukat ukarjamaw sarnaqaraki.

16. ¿Kunatsa Diosar kuttʼañajj wali askiw sistanjja?

¹⁶ Ukat jan walinak luratap amuyaski uka jaqejja, altʼat chuymanïñapawa. Jehová Diosajja, jan walinak lurki uka jaqenakan Jupar kuttʼapjjañapwa muni. Ukat taqe chuyma arrepentisitap uñji ukhajja, jankʼakiw Jupajj istʼi. Chuymaps ‘chʼalljjtayasiwa’, kunattejj taqe chuyma arrepentisir jaqenakar perdonañatakejj jankʼakiwa, kunjamtï jaya markat kuttʼanir israelitanakar perdonkäna ukhama (Jer. 31:20). Diosatakjam sarnaqapki ukanakar Jehová Diosajj mä suytʼäwi ukat sumankañ churañ munatap yatiñajja, ¡mä chuymachtʼäwiwa! (Jer. 29:11-14.) Ukhamatwa taqe chuyma Diosatakjam sarnaqapki uka jilat kullakanakamp chik Diosar yupaychjjapjjaspa.

ISTʼASIRÏÑAW JARKʼAQESTU

17, 18. 1) ¿Khitinakänsa recabitanakajja? 2) Kunjamtï 102 janan uñjaski ukarjamajja, ¿kunjam uñtʼatäpjjänsa?

¹⁷ Diosar taqe chuyma istʼañaw jan walinakat jarkʼaqestaspa, ukjja Jeremías tiempopan jakapkäna uka recabita jaqenakatwa amuysna. Jehú chachar taqe chuyma yanaptʼir Canaán markankir Jonadab chachajja, pä patak jila maranak nayraw recabitanakarojj mä qhawqha kamachinak churatayna, mä kamachejj janiw vino umapjjañapäkänti. Jonadab chachajj walja mara jiwatäkchïnsa, kuntï jupajj siskäna ukjja, recabitanakajj istʼasipkakïnwa. Jupanakar yantʼañatakejja, templon utjkäna uka manqʼañ utaruw recabitanakarojj Jeremiasajj jawsäna ukat umantapjjam sasaw vino churäna. Jupanakajj akham sapjjänwa: “Nanakajj janipuniw vino umapkti” sasa (Jer. 35:1-10).

¹⁸ Recabitanakatejj Jonadab chachan arunakap istʼañajj wali askïnwa, ukhamarakiw jiwasajj Diosan kamachinakap sum istʼañasa. Recabitanakajj kamachinak istʼapkäna ukjja, Jehová Diosajj wali askitwa uñjäna, jupanakajj janiw jan istʼasir judionakjamäpkänti. Ukatwa Diosajj jupanakar akham säna, kunapachatï Jerusalén markajj tʼunjatäkani ukhajj qhespiyapjjämawa sasa. ¿Kunsa jupanakat yateqsna? Jehová Diosar taqe chuyma istʼañäni ukhajja, jachʼa tʼaqhesïwi urunakat qhespiyarakistaniwa (Jeremías 35:19 liytʼasiñapawa).

DIOSAR ISTʼIRINAKAJJ JANIW SAPÄPKITI

19. ¿Diosar istʼañäjj kunatsa jarkʼaqestani?

¹⁹ Jehová Diosajj nayrakiw jan walinakat jarkʼaqerïna sasajj janiw sañasäkiti. Jichhürunakanjja, ukhamarakiw Jupar istʼapki ukanakarojj yupaychañ toqet jan aynachtʼapjjañapatakejj jarkʼaqe. Kunjamtï mä markan jachʼa perqanakapajj markachirinakar uñisirinakapat jarkʼaqkänjja, ukhamarakiw Diosan Leyinakapajja, khitinakatï sapüru uk liyipki ukat ukarjam sarnaqapki ukanakar jarkʼaqaspa. ¿Diosajj kamachinak churkistu uk istʼañäniti? Jiwasatï ukarjam sarnaqañäni ukhajja, kusisitakiw jikjjatasiñäni (Jer. 7:23). Uka toqetjja walja experiencianakaw utji (“Diosar istʼañajj jarkʼaqestuwa” siski uka recuadro uñjjattʼäta).

20, 21. 1) ¿Kunats Jehová Diosar yupaychkasajj jan pächasiñasäki? ₂₎ Diosajj Jeremías toqe Joacim reyiru yatiykäna ukhajja, ¿kuns uka reyejj luräna?

²⁰ Familiansa, irnaqäwinsa, yateqañ utansa jan ukajj marka apnaqerinakasa Diosar yupaychañ toqet jarktʼañ munapjjestaspawa. Ukampis Jehová Diosar taqe kunan istʼapuniñäni ukhajja, Jupaw llakkañ jan waltʼañanakan jikjjataskañäni ukhajj yanaptʼaskistani. Amtapjjañäni, Jeremiasajj jan waltʼäwinakan jikjjatasiñapäkäna ukhajja, Diosajj yanaptʼämawa sasaw säna ukat yanaptʼarakïnwa (Jeremías 1:17-19 liytʼasiñapawa). Joacim (Jehoiaquim) reyejj apnaqkäna ukhaw Diosan yanaptʼatapajj qhan amuyasïna.

²¹ Diosan arunakap yatiyapkäna ukanakaruw Joacim reyejj wali colerat jan yatiyapjjañapatak jarktʼäna, ukhamanakajj janiw uñjasirïkänti. Amuytʼañataki, Jeremiasan urunakapan jakkäna Uriya (Urías) sat profetaruw arknaqäna, yaqha markans jikjjataskchïnjja, markapar irptayanisaw jiwayäna (Jer. 26:20-23). Joacim reyejj pusi mara apnaqkäna ukhaw Jehová Diosajj kuntï ukürkamajj parlkäna uk qellqam sasin Jeremiasar säna, ukat uksti templonwa taqenin istʼkaya jachʼat liytʼañapäna. Uka reyejja, Jeremiasan rollonakapwa jikjjatäna ukat palacion irnaqer mä oficialaruw jachʼat liytʼayäna. Ukat liytʼañ tukuyatarjamaw reyejj jiskʼa jiskʼa chʼiyanoqäna ukat jan ninar phichhantamti sasins yaqhepanakajj sapkchïnjja phichhantaskakïnwa. Ukatsti Jeremiasaru ukat Baruc chachampir katuntanipjjañapatakiw Joacim reyejj khitäna. Ukat ¿kunas pasäna? Jehová Diosaw “jupanakarojj imantjjäna” ukhamat Joacim reyejj jupanakar jan kuns kamachañapataki (Jer. 36:1-6; Jeremías 36:21-26 liytʼasiñapawa).

22, 23. Jehová Diosajj jichhürunakan jiwasar yanaptʼistaspawa ukjja, ¿kunjamsa Asia toqen jakasir mä kullakajj uñachtʼayi?

²² Jehová Diosajj ukhamarakiw jichhürunakan yupaychirinakaparojj wakiski ukhajj jan walinakat jarkʼaqe, Jupar istʼapjjañapataki ukat suma yatiyäwinak yatiyapjjañapatakisa, yatiñkankaña ukat jan ajjsarapjjañapatakiw yanaptʼi. Pusi wawani mä sapa taykat amuytʼañäni, juparojj Justina sañäniwa. Asia markanjja, jupa sapakiw mä tiempojj Jehová Diosan Qhanañchiripänjja, uka cheqajja wali jachʼänwa, uka marka apnaqerinakajj Diosan arunakapjja janiw yatiyapjjañap munapkänti. Kullaka Justinajja, awisakiw jilat kullakanakampejj jikistʼi, kunattejj jakʼanki uka tamajj niya 400 kilometronak sarañankiwa. Yatiyañ toqet jarktʼatpachasa ukat yaqha jan walinakan jikjjatasitpachasa, utat uta yatiyaskakiwa ukat Diosar uñtʼañ munirinakarus waljaniruw jikjjataraki. Ukat jichhürunakanjja niya 20 jaqenakaruw Bibliat yatichaski ukat uka jiskʼa tamar yanaptʼañatakejj wal chʼamachasiskaraki.

²³ Kunjamtï Diosajj Jeremiasaru ukat kullaka Justinar yanaptʼkänjja, ukhamarakiw Jupar taqe chuyma istʼirinakarojj yanaptʼistani. Ukhamajja, jiwasjam jaqenakar istʼañat sipansa taqe kunjjar Munañani Jehová Diosar nayraqat istʼañ amtapjjañäni. Ukhamtï lurañänejja, Diosan arunakap yatiyañ toqet jarktʼatpachasa ukat kuna jan waltʼäwinakan jikjjatasisasa, Jehová Diosan arunakap kawkhantï yatiyktan uka cheqanakan yatiyaskakiñäniwa (Jer. 15:20, 21).

24. ¿Kuna askinaksa jankʼaki istʼasajj jikjjatsna?

²⁴ Taqe kuna lurir Diosasat jitheqtsna ukhajj janiw suma kusisiñ jikjjatksnati (Jer. 10:23). Kuntï istʼasiñ toqet Jeremiasajj qellqkatayna uk yatjjatasajja, ¿jakäwisan kuna toqenakansa Jehová Diosampejj jukʼamp yanaptʼayasna? Cheqansa Diosan kamachinakapakiw kusisiñar apistaspa. Ukatwa Jupajj akham sistu: “Nayaru istʼap[jjeta] [...] ukhamat taqe kunas sumaki sarañapataki” sasa (Jer. 7:23).