¿Supayar istʼapjjatapat kunarus purtʼasipjjäna?

Adanampi Evampejj janiw Diosar istʼapkänti, ukatwa jiwapjjäna (Génesis 3:6, 23).

Eva warmejj asirur istʼasaw qoqan achup manqʼantäna, ukat Adanaruw churäna, jupasti manqʼantarakïnwa.

Ukham lurapjjatapajj juchänwa janiw walïkänti. Ukatwa Diosajj Adanampir Evampir Edén jardinat alisnukjjäna.

Jupanakatakisa wawanakapatakis jakañajj wali chʼamäjjänwa. Ukat edadanëjjasajj jiwjjapjjänwa. Jupanakajj janiw alajjpacharus ni yaqha cheqarus sarapkänti, jan ukasti jiwjjasajj ukharukiw chhaqtjjapjjäna.

Jiwatanakajj laqʼaruw tukjjapjje janiw kuns lurjjapjjeti (Génesis 3:19).

Jiwasajj Adanampin Evampin wawanakapjamajj ukhamarakiw jiwtanjja. Jiwatanakajj janiw istʼapkiti ni uñjapkisa, janirakiw kuns lurapkaspati (Eclesiastés 9:5, 10).

Jehová Diosajj janiw jaqen jiwañap munkänti. Ukhamajj niyaw jiwatanakarojj jaktayjjani. Jupanakatï Diosar istʼapjjanejja janiw mayampis jiwjjapjjaniti wiñayatakiw jakapjjani.