11 YATICHÄWI
¿Khitinakas Jesusat qellqapjjäna?
¿Aka chachanakajj khitinakäpjjesa?... Mateo, Marcos, Lucas, Juan, Pedro, Santiago, Judas ukat Pablo sat chachanakäpjjewa. Jupanakajj Jesusan tiempopamwa jakapjjäna ukat jupanakaw Jesusat qellqawayapjje. Jupanakatwa jichhajj jukʼamp yatjjatañäni.
¿Aka chachanakar uñtʼtati?
Jupanakat kimsanejj Jesusan apostolonakapa satäpjjänwa, jupanakampiw Jesusajj Diosat parlir sarirïna. Aka dibujon kawkïrinakas uka apostolonakajj uk ¿uñjasmati?... Mateo, Juan ukat Pedro. Juanampi Mateompejj Jesusar sum uñtʼapjjäna, ukat sapa mayniw Jesusan sarnaqäwipat parlir mä libro qellqapjjäna. Apóstol Juanajja, Apocalipsis librompi ukat kimsa cartampwa Bibliankañapatak qellqäna. Uka cartanakajja: Nayrïr Juan, Payïr Juan, Kimsïr Juan sas uñtʼatawa. Apóstol Pedrojja, pä carta qellqarakïna. Ukanakajja: Nayrïr Pedro, Payïr Pedro ukham uñtʼatarakiwa. Kunapachatï Diosajj alajjpachat parlanïna uka toqetwa Pedrojj payïr cartapan qellqäna. Diosasti Jesusat akham sänwa: “Akaw munat Wawajajja, jupaw nayarojj kusisiyitu” sasa.
Dibujon uñstki uka mayni chachanakajja, Jesusat qellqapjjarakïnwa. Maynïrejj Marcos satänwa. Amuyatatjja, kunjamsa Jesusar jiwayañatak katuntapjjäna ukwa jupajj sum uñjäna. Maynïristi, Lucas satarakïnwa. Jupajj doctoränwa. Amuyatatjja, Jesusajj jiwjjäna uka qhepatwa cristianor tukjjäna.
Ukatjja, Jesusan pä sullka jilanakapaw jupjjat qellqapjjarakïna. ¿Jupanakan sutip yattati?... Dibujonwa jupanakar uñjarakisma, Santiago (Jacobo) ukat Judas satäpjjänwa. Qalltanjja, janiw Jesusar istʼañ munapkänti, “loqheptjjataynawa” sasaw sapjjäna. Ukampis qhepatjja, Jesusan yatichäwipar istʼasaw cristianöjjapjjäna.
Jichhajj Pablot parlarakiñäni. ¿Jupar dibujon uñjtati? Janïr cristianökasajja, jupajj Saulo satänwa. Cristianonakarojj wal uñisïna ukat wal tʼaqhesiyarakïna. ¿Kunjamatsa Pablojj cristianor tukpachäna?... Mä uruw jupajj thaknam saraskäna, ukhaw alajjpachat mä aru istʼäna. Jesusaw Pablor akham säna: “¿Kunatsa arkirinakajar wal uñista?” sasa. Uka qhepatwa, Pablojj jan wali luräwinakap jaytasajj cristianor tuküna. Pablojja, Bibliankir 14 libronakwa qellqäna, Romanos librot qalltasina Hebreos librokama.
Sapüruw Biblia liytʼañasajja, ¿janicha?... Biblia liytʼasaw Jesusjjat jukʼamp yateqtanjja. ¿Janit jupjjat jukʼamp yateqañ munkasma?...