Timoteojj wali yanaptʼasirïnwa

Timoteo waynajja, wal yaqhanakarojj yanaptʼañ munirïna, ukatwa walja markanakar saräna. Ukham yanaptʼasajj wali kusisitaw jakasïna. ¿Jupat jukʼamp yatiñ munasmati?...

Timoteojj Listra markanwa jakasïna. Loida sat awichapasa ukat Eunice sat mamapasa wawatpachwa Timoteorojj Diosat yatichapjjäna. Ukatwa, Timoteojj jachʼäjjäna ukhajja, Diosar uñtʼapjjañapataki jaqenakar yanaptʼañ munäna.

Timoteojj waynäjjäna ukhaw Pablojj akham säna: “Yaqha markanakaruw yatiyir sarä. ¿Nayamp sarañ munasmati?” sasa. Timoteojj jaqenakar yanaptʼañ munasaw “iyaw” säna.

Timoteojj Tesalónica markaruw Pablomp chik saräna, uka markajj Grecia sat cheqankänwa. Ukar puriñatakejj kayukiw wali jay sarapjjäna ukat mä botet kunaw viajipjjäna. Ukar purisajja, walja jaqenakaruw Jehová Diosar uñtʼapjjañapatak yanaptʼapjjäna. Ukampis jupanakar istʼasajja, yaqhepanakajj wal colerasipjjäna ukat nuwjañwa munapjjarakïna. Ukatwa Pablompi Timoteompejj yaqha markanakaru yatiyir sarjjapjjäna.

Mä qawqha phajjsinakatjja, “Tesalonicar kuttʼam ukat jilat kullakanakajj kunjamäsipkisa uk uñjanim” sasaw Pablojj Timoteor säna. Ukampis uka markajja, ajjsarañjamänwa. Ukhamäkipansa, Timoteojj jilat kullakanakat llakisitap laykojj ‘iyaw sasaw’ uka markar saräna. Ukat kuttʼanisajja, suma yatiyäwinakwa Pablor yatiyäna. ¡Tesalonicankir jilat kullakanakajj Diosar yupaychasipkakïnwa!

Walja maranakaw Timoteojj Pablomp sarnaqäna. Ukatwa apóstol Pablojj Timoteot akham qellqäna: “Janiw khitis jupjamajj utjkiti. Ukatwa jilat kullakanakar yanaptʼañapatakejj jupar khittjja. Jehová Diosarusa jaqenakarusa wal munasi” sasa.

¿Jehová Diosat yateqapjjañapataki jaqenakar yanaptʼañ munasmati?... Jupanakar yanaptʼasajj Timoteo waynjamaw wali kusisit jakasïta.