Jesusan nayrïr milagropa

Natanaelajj Jesusan discipulopäjjäna ukhatjja kimsa uruw pasjjäna. Jesusampi mä qhawqha discipulonakapampejj Galileankir Caná markaruw sarapjjäna, kawkjantï uka discipulonakajj jakasipkäna ukaru. Natanaelas ukanwa nasirakïna. Caná markajja Jesusajj jilskäna uka Nazaret markat alay toqen qollunak taypinkänwa. Ukanjja mä casarasïwiw utjäna, ukaruw Jesusasa discipulonakapasa invitatäpjjäna.

Jesusan María taykapas uka casarasïwir sararakïnwa. Niyakejjay Mariajj casarasirinakan familiapar uñtʼchïnjja, jan tiemponiw invitadonakar sum uñjañataki yanaptʼaskäna. Ukhamatwa vino pistʼatap yatisajj Jesusar yatiyäna, “vinwa pistʼayasipjje” sasa (Juan 2:3).

Mariajj yanaptʼañwa munäna, ukatwa Jesusarojj yanaptʼañapatak mayïna. Jesusasti jupar sänwa: “Warmi, ¿jumas nayas kun yatiñasas uka toqetjja?” sasa (Juan 2:4). Diosan ajllit Reyipjamajja, Jesusajj familiaparu amigonakaparu istʼañat sipansa alajjpachankir Awkiparuw istʼañapäna. Ukatwa Mariajj sum amuytʼasisinjja Jesusan amparaparuk jaytjjäna, servirinakarusti akham sänwa: “Kuntï sapkätam ukhampun lurapjjam” sasa (Juan 2:5).

Ukanjja qalat lurat sojjta uma wakullanakaw utjäna, sapa wakullarojj 40 litrotsa jilaw mantäna. Jesusajj akham sasaw servirinakar säna: “Uka wakullanakar umampi phoqarapjjam” sasa. Ukatjja sarakïnwa: “Jichhajj mä jukʼa apsupjjam, khititï casarasïwin pʼeqtʼki ukar churanipjjam” sasa (Juan 2:7, 8).

Casarasïwin pʼeqtʼirejj vino malltʼäna ukhajj wal musparäna, Jesusajj mä milagro lurasin uma vinor tukuykäna uk janiw yatkänti. Ukatjja casarasir waynar jawsayasajj sänwa: “Nayraqatajj suma vinökis uk taqenis churapjje, jaqenakajj umakipatäjjapjje ukhajja, jan sumäki ukwa churapjjaraki. Ukampis jumajj jichhakamaw suma vino imatätajja” sasa (Juan 2:10).

Umjja vinor tukuykäna ukhaw Jesusajj nayrïr milagrop luräna. Uk uñjasasti Jesusan nayrïr discipulonakapajj jukʼampiw jupar confiyapjjäna. Qhepatjja, Jesusasa, taykapasa, jilanakapasa Capernaúm markaruw sarjjapjjäna, uka markajj Galilea Qotat alay toqenkänwa.