Taqe chuymaw Diosan templopar munasïna

Casarasïwejj Caná markan tukuyjjäna uka qhepatjja, Jesusajj Capernaúm markaruw saräna. Jesusan María taykapasa, Santiago, José, Simón, Judas jilanakapas jupampi chikaw sarapjjarakïna.

¿Kunatsa Jesusajj Capernaúm markar saräna? Uka markajj Nazaretatsa Caná markatsa jukʼamp uñtʼatänwa, uka markanakat sipansa jukʼamp jachʼarakïnwa. Jesusan nayrïr discipulonakapatjja, waljaniw Capernaúm markana jan ukajj uka jakʼanakan jakasipjjäna. Ukhamasti kawkjantï jakasipkäna ukanwa Jesusajj discipulonakapar yatichañ munäna.

Capernaúm markankkasajja, Jesusajj walja musparkañ milagronakwa luräna. Uka toqetjja, uka markankirinakasa uka jakʼan jakasirinakas waljaniw yatipjjäna. Ukampis Jesusasa Diosar taqe chuyma servir judío discipulonakapasa, Jerusalén markaruw Pascua amtañatak sarapjjañapäna, uka marajj 30 maräjjänwa.

Jerusalenar purisajja, kuntï Jesusajj templon lurkäna uk uñjasajj walpun discipulonakapajj musparapjjäna, janipuniw khitis ukham lurirïkänti.

Diosan Leyiparjamajja, israelitanakajj uywanakwa sacrificiot Diosar loqtapjjañapäna. Jaya cheqanakat jutirinakasti, manqʼañanakwa ukankañatakejj munapjjarakïna. Ukhamasti Leyirjamajja, Jerusalenar jaya cheqanakat jutirinakatakejj “vacanaka, ovejanaka” ukhamarak kunanakatï ukankañatakejj munaskäna ukanak alasiñatak qollqe apasiñajj walikïskänwa (Deuteronomio 14:24-26). Uk yatisaw Jerusalenankir negocio luririnakajj uywanaka, jamachʼinaka templo manqhan aljapjjerïna. Uka aljirinakat yaqhepajj wali jilaruw uywanakap aljapjjerïna, ukhamatwa jaqenakar engañapjjerïna.

Ukanak uñjasajja, Jesusajj wal chuym ustʼayasïna, ukatwa qollqe turkirinakan qollqenakap waranuküna, mesanakapsa qʼal jaqorpayäna, jupanakarus templot alissünwa. Akham sasaw jupanakar säna: “¡Akanak jayar apasipjjam! ¡Awkijan utap jan jukʼamp alakip lurañ utar tukuyapjjamti!” sasa (Juan 2:16).

Discipulonakajj Jesusar uk lurir uñjapjjäna ukhajja, Diosan Yoqapat kunatï qellqatäkäna uk amtapjjäna, uka profeciajj akham sänwa: “Utamaru taqe chuyma munañaw tukuntitani” sasa. Ukampis Judionakajj akham sasaw jupar sapjjäna: “Niyakejjay ukanak lurstajja, ¿kuna señalsa jichhajj uñachtʼayapjjetäta?” sasa. Uk satasti Jesusajj jupanakar sarakïnwa: “Aka templo allthapipjjam, kimsa urutwa nayajj saytʼayäjja” sasa (Juan 2:17-19; Salmo 69:9).

Templo sasinjja cheqpach templotwa parlaskpacha sasaw judionakajj amuyapjjäna. Ukatwa akham sapjjäna: “Aka templojj pusi tunka sojjtani maranakanwa lurasïna, ¿ukatti jumajj kimsa urun saytʼayäta?” sasa (Juan 2:20). Ukampis templo sasinjja, cuerpopatwa Jesusajj parlaskäna. Discipulonakajj kimsa mara qhepata, kunapachatï Jesusajj jaktjjäna ukhaw uka arunak amtapjjäna.