Jesusajj Nazaretankir sinagogan yatichäna

Nazaret markanjja jaqenakajj wali kusisitaw Jesusar suyasipkäna. Mara jila nayrajja, bautisir Juanampi janïr bautisatäkäna ukhajja Jesusajj carpinterot uñtʼatänwa. Ukampis jichhajja, milagronak luririt uñtʼatäjjänwa. Ukatwa Nazaretan jakir jaqenakajj wali kusisit suyasipkäna, Jesusajj milagronak luraspa ukwa jupanakajj munapjjäna.

Jesusajj uka markankir sinagogarojja, kunjamtï sapa sábado urun sarirïkäna ukhamarakiw uka urojj saräna. Uk uñjasajja, jaqenakajj jukʼampiw kusisipjjäna. Ukanjja, kunjamatï yaqha sinagoganakan lurapjjerïkäna ukhamarakiw sapa sabadojj Diosar mayisipjjerïna, Moisesan qellqat libronakatsa liytʼapjjerïna (Hechos 15:21). Profetanakan qellqat libronakatsa liytʼapjjarakirïnwa. Niyakejjay Jesusajj uka sinagogar walja maranak sarjjchïnjja, liyiñatak saytʼasïna ukhajj walja uñtʼatanakaruw ukan uñjpachäna. Jesusarojj Isaías profetan rollop churapjjäna, jupajj Isaías 61:1, 2 qellqat jikjjatäna. Ukanjja, Jehová Diosan ajllitapatwa parli.

Jutaniw sat ajllitajja katuntatanakar libre sarnaqasiñjjata, juykhunakan uñjapjjañapata, Jehová Diosamp suma uñjatäñ maran jutatapata yatiyañapäna. Jesusajj uka toqet liytʼañ tukuyasasti rollo llawthapisajj yanapiriruw churjjäna, ukatjja qontʼasjjarakïnwa. Sinagogankirinakajj taqeniw Jesusar uñchʼukipjjäna. Ukjjarusti akham sasaw jupanakar säna: “Kuntï jumanakajj istʼapkta uka qellqatajj jichhüruw phoqasi” sasa (Lucas 4:21).

‘Chuymar purtʼkir uka suma arunakap istʼasajj’ jaqenakajj walpun musparapjjäna. Ukatwa jupanak pura akham sas jisktʼasipjjäna: “¿Janit jupajj Josean yoqapäki?” sasa. Uka jaqenakajja, Jesusajj milagronak luraspa ukwa munapjjäna. Uk amuyasasti, Jesusajj akham sänwa: “Cheqpachansa kuntï jaqenakajj sañ yatipki ukwa nayarojj sapjjetäta, akham sasa: ‘Doctor, juma pachpa qollasim. Kunanakatï Capernaúm markan luraskäna ukanak istʼapjjtwa. Ukhamajj aka markaman ukanak lurarakimaya’” sasa (Lucas 4:22, 23). Jesusan markapankirinakajja akanwa Jesusajj nayraqat qollañapa sasaw sapjjpachäna. Ukham jan luratapatjja, Jesusajj janis jupanakat kun yatiñs munkaspa ukham amuyapjjpachäna.

Ukham amuyapjjatap yatisajja, Jesusajj kunanakatï nayrajj Israel markan paskäna ukanakatwa jupanakar amtayäna. Elías chachan urunakapanjja walja viuda warminakaw Israelan utjäna. Ukampis Eliasajj Sidón marka jakʼankkäna uka Sarepta markankir mä viudan utaparuw saräna, ukanwa jupajj mä milagro luräna, uka warmejj janiw israelitäkänti (1 Reyes 17:8-16). Eliseo profetan urunakapansti, lepra usuni walja jaqenakaw Israelan utjarakïna. Ukampis Eliseojj janiw jupanakat maynirus qollkänti, jan ukasti Siria markankir Naamán chacharukiw qolläna (2 Reyes 5:1, 8-14).

Uka nayra sarnaqäwinakat Jesusar parlir istʼasajja, markapankir jaqenakajj taqeniw colertʼasipjjäna. Jesusan arunakapajj janiw jupanakatak walïkänti, ¿kunatsa? Jupanakajj jan wali chuymanïpjjänwa, Diosarus janiw confiyapkänti ukwa Jesusan arunakapajj qhanstayäna. Jupanakajj jankʼakiw Jesusarojj markat anqäjjar irpsupjjäna, kawkjantï Nazaret markapajj uttʼayatäkäna uka qollu patjjaruw irpapjjäna, ukhamat uka patjjat liwintaniñataki. Ukampis jupanakat escapasajj jan kuna kamachtʼataw Jesusajj sarjjäna. Uka qhepatjja, Jesusajj Galileankir Capernaúm markaruw saraqäna, uka markajj Galilea qotat alay toqenkänwa, qota jakʼana.