Jesusajj milagronakwa Capernaúm markan luräna

Jesusajj Pedro, Andrés, Santiago, Juan jupanakaruw jaqe katurïpjjañapatak jawsäna. Sábado urunkjjasinjja, taqeniw Capernaúm markankir mä sinagogar sarapjjäna, ukanwa Jesusajj yatichañ qalltäna. Kunjamsa yatichäna uk istʼasajja jaqenakajj wal musparapjjäna. Jupajj janiw escribanakjam yatichkänti, jan ukasti mä jilïrjamaw yatichäna.

Uka sábado urunsti demonion mantat mä jaqew sinagogankarakïna, akham sasaw jupajj wali jachʼat arnaqasïna: “¡Nazareno Jesús, ¿nanakampi kun luriris akar jutta? ¿Nanakar tukjirit jutta? Jumajj khitïtas uk nayajj sum yatta, jumajj Diosan Santo Serviripätawa!” sasa. Jesusasti, uka jaqer jan waltʼaykäna uka demoniorojj akham sasaw toqenoqäna: “¡Amuktʼam, uka jaqet mistum!” sasa (Marcos 1:24, 25).

Uka demoniojj uka jaqer wali jachʼatwa warariyäna, oraqer liwnoqasajj “jan usuchjasaw” demoniojj uka jaqet mistjjarakïna (Lucas 4:35). Ukanak uñjasasti, sinagogankasipkäna uka jaqenakajj walpun musparapjjäna, akham sapjjarakïnwa: “¡Kunaraki akasti! [...] Demonionakar alissuñatakis chʼamaniwa, juparojj istʼapjjarakiwa” sasa (Marcos 1:27). Cheqansa kunanaktï Jesusajj lurkäna ukanakajj jankʼakiw Galileypachan yatisïna.

Sinagogat mistusasti, Jesusampi discipulonakapampejj Simón Pedron utaparuw sarapjjäna. Ukanwa Pedron suegrapajj calenturampi usuntat ikiñan jaqontatäskäna, ukatwa Jesusarojj qollañapatak ruwtʼapjjäna. Jesusajj jupar jakʼachasïna ukhajja, amparatwa waytäna, ukaratpachaw calenturajj uka warmit saraqjjäna. Ukatjja, uka warmejj Jesusampiru discipulonakapampiruw serviñ qalltäna, inas manqʼa wakichañ qalltchïna.

Intejj jalantaskäna ukhajja, jaqenakajj taqe cheqatwa Pedron utaparojj usutanakap apanipjjäna, ukhamat Jesusajj jupanakar qollañapataki. Niya markpachas uta punkur tantachasipkaspa ukhamäpachänwa. “Kunayman usutanakwa jupan ukar puriyanipjjäna. Jupasti sapa maynir amparamp loqjjatasaw qolläna” (Lucas 4:40). Kunayman usutanakaruw Jesusajj qolläna, ukhamatwa Isaiasan profeciapajj phoqasïna (Isaías 53:4). Janiw ukak lurkänti, jan ukasti walja jaqenakatwa demonionak alissüna. Uka demonionakasti jaqet mistupjjäna ukhajj akham sasaw jachʼat arnaqasipjjäna: “Jumajj Diosan Yoqapätawa” sasa (Lucas 4:41). Ukampis Jesusajj janiw uka demonionakar parlaykänti, toqenoqänwa. ¿Kunatsa? Maya, uka demonionakajj jupan Cristötap yatipjjänwa; paya, janiw Jesusajj uka demonionakajj cheqpach Diosar servirïpkaspas ukham amuyasiñap munkänti, ukatwa jupanakar jan parlaykänti.