Jesusajj jukʼampiw Galilean yatiyäna

Jesusampi pusi discipulonakapampejj jan tiemponiw uka urojj jaqenakar yanaptʼasipkäna. Arumäjjäna ukhasti, Capernaúm markankir jaqenakajj usutanakaruw Jesusan ukar apanipjjäna, ukhamat jupajj qollañapataki. Jesusatakejja, janiw Awkipar mä chʼusa lugarana mayisiñatakis tiempojj utjkänti.

Qhepürusti Jesusajj wali alwatwa sartäna, chʼamakäskäna ukhaw mistuwayäna. Mä chʼusa lugaranwa alajjpachankir Awkiparojj mayisïna. Janïraw walja tiempojj paskänti, ukhaw ‘Simonampi jupamp chikäsipkäna ukanakampejj Jesusar thaqer sarapjjäna’. Niyakejjay Jesusajj Pedron utapar quedaschïnjja, Pedrow thaqer sarañatakejj pʼeqtʼpachäna (Marcos 1:36; Lucas 4:38).

Jesusar jikjjatapjjäna ukhajja, akham sasaw Pedrojj Jesusar säna: “Taqeniw thaqasipktam” sasa (Marcos 1:37). Kuntï Jesusajj Capernaúm markan lurkäna ukajj walpun uka markan jakasir jaqenakarojj yanaptʼäna, ukatwa uka markan quedasiñap munapjjäna, ‘jan sarjjamti sasaw jupar jarktʼapjjarakïna’ (Lucas 4:42). Ukampis ¿Jesusajj milagronak lurañatakikit aka oraqer jutpachäna? ¿Uka markanakti Diosan arunakap yatiyañapäna? ¿Jupajj uka toqet kamsänsa?

Jesusajj discipulonakapar akham sänwa: “Yaqha cheqar sarañäni, aka jakʼankir markanakar sarañäni, ukhamat uka cheqanakansa yatiyañajataki, ukatakiw nayajj jutta” sasa. Capernaúm markar quedasiyañ munapkäna uka jaqenakarus akham sänwa: “Diosan Reinopat suma yatiyäwinak yaqha markanakar yatiyir sarañajajj wakisirakiwa, nayajj ukataki khitanitätwa” sasa (Marcos 1:38; Lucas 4:43).

Cheqansa, Jesusajj Diosan Reinopat yatiyañatakiw aka oraqer jutäna, ukatak khitanitänwa. Uka Reinow Awkipan sutip jachʼañchani, jaqenakan taqe jan waltʼäwinakapsa chhaqtayani. Jesusajj Diosan khitanitätap uñachtʼayañatakiw milagronak luräna. Uka kikparakiw Moisesajj Diosan khitanitätap uñachtʼayañatakejj nayra tiempon jachʼa milagronak lurirïna (Éxodo 4:1-9, 30, 31).

Ukhamasti Jesusajj yaqha markanakan yatiyañatakiw Capernaúm markat pusi discipulonakapamp chika sarjjäna. Uka pusinejj Pedro, Andrés (Pedron jilapa), Juan, Santiago (Juanan jilapa) ukanakänwa. Jupanakarojj mä seman nayrakiw Jesusajj jupamp chik sarapjjañapatak jawsäna.

Jesusajj pusi discipulonakampi Galileypach muytasajja, walja jaqenakaruw yanaptʼäna. Kunanaktï Jesusajj lurkäna ukanakatjja taqe cheqanwa yatisïna. Cheqansa, ‘Siria markpachanwa jupjjat yatisïna’, Decápolis sat tunka markanakansa ukhamarak Jordán Jawir khurkatansa yatisirakïnwa (Mateo 4:24, 25). Uka markanakatsa Judeatsa walja jaqenakaw Jesusampiru discipulonakampirojj arkapjjäna. Uka jaqenakatjja, waljaniw usutanakarojj qollatäñapatak Jesusan ukar apapjjäna. Jesusasti taqe uka usutanakaruw qolläna, demonion mantat jaqenakatsa demonionak alissurakïnwa.