Jesusajj perdonasirïñwa yatichäna

Suma chuyman jaqenakajja, Jesusan yatichäwinakaparusa luratanakaparusa sum uñjapjjäna. Ukampis yaqhepajj janiw ukham uñjapkarakïnti. Ukajja Galileankir mä utanwa qhan uñjasïna. Simón sutini mä fariseojj milagronak lurir Jesusaru jukʼamp uñtʼañatakiw manqtʼasiñatak utapar invittʼäna. Jesusajj ukanwa Diosat jukʼamp yatichaspäna, ukatwa saräna. Impuesto cobriri jaqenakasa jucharar jaqenakasa Jesusar invitapkäna ukhajja, ukhamarakiw sarirïna.

Uka fariseojj janiw kunjamtï invitadonakar katoqtʼapjjerïkäna ukham Jesusar katoqkänti. Palestina cheqan utjki uka laqʼa thaknam wiskhumpi sarasajja, maynin kayupajj wali juntʼu, laqʼakamaki ukhamaw purirïna. Ukatwa invitadonakar sum katoqtʼañatakejj kayunakap thaya umampi jareqapjjerïna, ukatjja jampʼattʼasaw katoqapjjerïna, ukampis Jesusarojj janiw ukham katoqapkänti. Maysa toqetjja invitador munasiñampi katoqañatakejj aceitempiw pʼeqet warjjatapjjerïna, ukampis janirakiw Jesusar ukham lurapkänti. Ukhamasti ¿kunjamsa katoqtʼapjjäna?

Manqʼasiñatakejj taqe invitadonakaw mesar qontʼasipjjäna. Manqʼasipkäna ukhasti, mä warmiw ukar jutäna uka warmejj janiw invitatäkänti. ‘Markpachan wali jucharar warmit’ uñtʼatarakïnwa (Lucas 7:37). Cheqansa taqeniw juchararätanjja, ukampis uka warmejj qʼañu juchanak luririt uñtʼatänwa, inas prostituta warmïchïna. Jesusan yatichäwinakapatwa jupajj istʼpachäna, Jesusajj ‘nayar jutapjjam taqe qarjatanaka nayaw samarañ churapjjäma’ sasin säna uksa istʼarakpachänwa (Mateo 11:28, 29). Ukatwa Jesusar thaqer sarpachäna.

Jesusar jakʼachasisasti kayunakaparuw qonqortʼasïna, jacharakïnwa, jachanakapampiw Jesusan kayup jareqäna, ñikʼutapampirakiw wañsuyäna. Jesusan kayunakap wali munasiñampiw jampʼattʼarakïna, suma olorani aceitempiw warjjatarakïna. Uk uñjasasti Simonajj akham sasaw chuymapan säna: “Aka jaqetï cheqpachapuni profetäspajja, khitisa, kuna kasta warmis jupar llamktʼaski uk yatispawa, uka warmejj wali juchararawa” sasa (Lucas 7:39).

Kunsa Simonajj lupʼiskäna uk Jesusajj yatïnwa, ukatwa jupar akham säna: “Simón, may sañ munsma” sasa. Jupasti sarakïnwa: “Yatichiri, saskakita” sasa. “Pä jaqew utjäna, jupanakajj qollqe maytʼir mä jaqeruw manüpjjäna. Maynejj phesqa patak denarionak manünwa, maynisti phesqa tunkaraki. Jupanakajj jan kunampis kuttʼayirjamäpkäna ukhajja, jan kun mayisaw qollqe maytʼirejj panpachanir manunakap perdonäna. Ukhamajj ¿kamsasmasa, kawkïris juparojj jukʼamp munasini?” sasa. Simonasti pä chuymaw akham sarakïna: “Amuyatatjja, walja manut perdonatäki uka jaqew juparojj jukʼamp munasini” sasa (Lucas 7:40-43).

Jesusasti “cheqaparuw arstajja” sasaw säna. Uka warmi toqer uñtasasti, akham sarakïnwa: “¿Jumajj aka warmir uñjtati? Nayajj utamar mantankta ukhajja, janiw jumajj kayu jareqasiñatakis um wajjtʼkistati. Ukampis aka warmejj jachapampiw kayunak jareqetu, ñikʼutapampiw wañsuyarakitu. Jumajj janirakiw jampʼattʼkistasa, ukampis aka warmejj nayajj mantankta ukhat jichhakamaw kayunakat wali munasiñampi jampʼattʼitu. Jumajj janirakiw kuna aceitempis pʼeqet warjjattʼkistati, ukampis aka warmejj suma qʼapkiri aceitempiw kayunakat warjjattʼitu” sasa. Uka warmejj taqe chuymaw arrepentisïna, ukwa Jesusajj qhan amuyäna. Ukatwa akham sarakïna: “Aka warmejj walja juchanïkchisa, juchanakapajj perdonatawa, ukatwa jupajj munasiñap wal uñachtʼayi. Khitirutï jukʼak perdonaski ukanjja munasiñapajj jukʼakiw utjaraki” sasa (Lucas 7:44-47).

Uka arunakampejja, Jesusajj janiw qʼañu jucha lurañajj walikïskaspas ukham sañ munkänti. Jan ukasti jachʼa juchanak lurasin arrepentisipki, samarañ thaqapki ukanakat khuyaptʼayasirïtapwa uñachtʼayaskäna. Uka warmejja, “juchanakamajj perdonatawa [...] Diosar confiyatam laykojj salvatäjjtawa, sumak sarjjam” sasin Jesusajj säna ukhajj kusispachänwa, Jesusan samarañapsa katoqkaspa ukhamäpachänwa (Lucas 7:48, 50).