Jesusan isip llamktʼasaw qollatäjjäna

Jesusajj Decápolis toqet kuttʼanjjatapjja, Galilea Qota jakʼan jakasir judionakajj yatjjapjjänwa. Jupanakajj kunjamsa Jesusajj thayarusa oladanakarusa tʼakurayäna uk yatipjjpachänwa, demonion mantat jaqenakarus kunjamsa waliptayäna uksa yaqhepanakajj yatipjjarakpachänwa. Ukhamasti Jesusar katoqañatakejja, “walja jaqenakaw” qota jakʼan tantachasipjjäna, inas Capernaúm cheqana (Marcos 5:21). Jesusajj qota lakar purïna ukhajja, kunanakampsa lurpachäni uk wal jaqenakajj uñjañ munapjjäna.

Jairo sutini mä jaqew Jesusar wal suyaskarakïna, jupajj sinagogan pʼeqtʼiripänwa. Jesusar uñjasajja nayraqataparuw killptʼasïna. Walja kutirakiw jupar ruwtʼasïna, akham sasa: “Imill wawajaw wali usuntata. Mirä amp suma, utajar sarakiñäniya, amparamp loqjjattʼanirapita, ukhamatwa jupajj waliptjjani, jakaskarakini” sasa (Marcos 5:23). Jairon sapa imill wawapajj 12 maranikïskänwa wali munatarakïnwa, ukatwa Jesusarojj yanaptʼañapatak wal ruwtʼasïna. Uk uñjasajj ¿kunsa Jesusajj lurpachäna? (Lucas 8:42).

Jairon utapar saraskäna ukhajja, thakin mä milagrow pasañampiskäna. Jesusampejj walja jaqenakaw sarasipkäna, jupanakajj Jesusar milagro luriri wal uñjañ munapjjäna. Jupanak taypinsti mä warmiw saraskarakïna, jupajj usupat waliptjjañwa munäna.

Uka judía warmejj 12 maranakaw wila apa usumpi tʼaqesïna. May may doctoranakaruw qollayasiñatak saräna, qollqepsa qʼal tukjasirakïna. Ukampis janiw waliptkänti, antisas “jukʼampikiw usuntjjäna” (Marcos 5:26).

Uka usupajj uka warmir qʼal aynachtʼaypachäna, ukhamarus uka usupat mayninakar parlañas phenqʼasiñjamäpachänwa. Uka toqetjja janirakiw jaqenakas qhan parlirïpkänti. Diosajj Moisesar churkäna uka Leyirjamajja, wila apani warmejj qʼañut uñjatänwa. Kawkïritejj uka warmirusa jan ukajj wilarar isiparusa llamktʼkäna uka jaqejj jareqasiñapänwa, ukhamarus jaypʼukamaw qʼañut uñjatarakïna (Levítico 15:25-27).

Uka warmejj “Jesusat parlir istʼasajja”, jupar thaqeriw jutäna. Qʼañütap yatisajja, jan amuykañakiw jaqenak taypi Jesusan qhepap jutäna, akham sasaw chuymapan sarakïna: “Patjja isipak llamktʼä, ukat walikëjjäwa” sasa. Jesusan patjja isipan fleconakap llamktʼäna ukhajja, ukaratpachaw wila apa usupajj saytʼjjäna, uka “tʼaqesiyir usupat waliptjjatapsa amuyasirakïnwa” (Marcos 5:27-29).

Jesusasti akham sarakïnwa: “Khitis llamktʼitu” sasa. Uka arunak istʼasajja, ¿kunjamakis uka warmejj jikjjataspachäna? Pedrojj akham sasaw Jesusar säna: “Yatichiri, jaqenakarakis uksat aksat nukjasipktamjjä” sasa. Ukhamasti ¿kunatsa Jesusajj “khitis llamktʼitu” sasin jisktʼpachäna? Jesusajj sarakïnwa: “Mayniw llamktʼitu, nayajj chʼamajan mistutap amuyasta” sasa (Lucas 8:45, 46).

Uka warmejj janiw jukʼamp imantasirjamäjjänti, ukatwa wali khatattʼasisa ukhamarak ajjsarasisajj Jesusan ukar jutasin nayraqatapar killptʼasïna. Ukatsti kunjam usuntatänsa kunjamsa qollasïna taqe ukanakwa jaqenak nayraqatan arsüna. Jesusajj uka warmir sarakïnwa: “Wawa, Diosar confiyatam laykojj walikëjjtawa, sumak sarjjam, janiw mayampis uka usumpejj tʼaqesjjätati” sasa (Marcos 5:34).

Taqe ukanakajj walpun chuymachtʼistu. Diosajj aka oraqe apnaqañapataki ajllki uka reyejja, wali munasiri sinttʼasiri ukhamawa, jaqenakat wal llakisi, yanaptʼañatakis wali chʼamanirakiwa.