Jesusajj mä imill wawaruw jaktayäna

Kunjamsa Jesusajj wila apa usuni warmir waliptayäna ukjja, Jairojj uñjänwa. Ukhamasti Jesusajj Jairon phuchapar yanaptʼarakispänwa, ukampis Jairojj “phuchajajj jiwatäjjpachawa” sasaw amuyäna (Mateo 9:18). ¿Jesusajj Jairon phuchapar yanaptʼpachäniti?

Jesusajja waliptaykäna uka warmimpiw parlaskäna, ukañkamajj Jairon utapatwa mä qhawqha chachanakajj purinipjjäna, akham sasaw sapjjarakïna: “¡Wawamajj jiwjjewa! Jan jukʼamp Yatichirir arjjayjjamti” sasa (Marcos 5:35).

¡Uk yatiñajj wali llakkañänwa! Jairojj jaqenakan wali respetat jaqëkchïnsa, jan khiti yanaptʼiriniw uñjasïna. Mä sapa imill wawapajj jiwatäjjänwa. Jesusajj uka arunak istʼasajj akham sasaw Jairor säna: “Jan llakisimti, Diosar confiyaskakim” sasa (Marcos 5:36).

Jesusajj Jairompi chikaw utapar saräna. Jairon utapar puripjjäna ukhajja, jaqenakajj wal jacharasipkäna, yaqhepasti wali jachʼat wararipjjarakïna. Jesusajj jupanakan ukar mantasajja, akham sasaw säna: “Uka wawajj janiw jiwatäkiti, jan ukasti ikiskiwa” sasa (Marcos 5:39). Uk istʼasasti jaqenakajj Jesusat larusipjjänwa, jupanakajj uka wawan jiwatap sum yatipjjäna. Ukampis Jehová Diosaw Jesusarojj jiwatanakar jaktayañapatak chʼam churäna, uka chʼamampiw Jesusajj ikitsa sartaykaspa ukham jiwatanakar sartayaspäna.

Ukatjja Jesusajj janiw khitirus jupamp chik utar mantaykänti, jan ukasti Pedrompiru, Juanampiru, Santiagompiru ukhamarak uka imill wawan awk taykapampirukiw irpantäna. Uka phesqanir irpantasajja, kawkjankkäntï imill wawajj ukaruw Jesusajj saräna. Uka imill wawar amparat kattʼasasti, akham sänwa: “Tálita cúmi” sasa. Ukajja “Imill wawa, nayajj sartam sissmawa” sañ muni (Marcos 5:41). Ukaratpachaw uka wawajj sarthapisin sarnaqjjäna. ¡Uk uñjasajj Jairosa esposapasa walpun kusisipjjpachäna! Imill wawajj jakaskatap taqeniw uñjapjjäna, Jesusasti uka wawar manqʼa churapjjam sasaw sarakïna.

Uka nayrajj yaqha milagronak Jesusajj lurkäna ukhajja, janiw yaqhanakarojj yatiyapjjätati sasaw säna, uka kikparakiw Jairompir esposapampir säna. Ukhamäkchïnsa imill wawan jiwatat jaktatapajj “taqe uksa toqenakanwa” yatisïna (Mateo 9:26). Familiamat maynejj jiwatat jaktayatäspa ukhajja, ¿janit mayninakar yatiykarakisma? Ukhakamajja pä jaqenakaruw Jesusajj jiwatat jaktayjjäna.