Mä arumpikiw ¡chʼamañchtʼapjjäna!

JESUSAJJA, “warmi” sasaw warminakar sirïna. Amuytʼañataki, mä kutejja Jesusajj 18 maranak kʼumthaptata mä warmiruw qolläna, ukjjarusti sänwa: “Warmi, usumatjja qollatäjjtawa” sasa (Luc. 13:10-13). Nayra tiemponjja, “warmi” arojj respetot apnaqatänwa, ukatwa mamaparus warmi sasin Jesusajj sirïna (Juan 19:26; 20:13). Ukat sipansa, yaqha aruw utjarakïna.

Kunjamsa yaqhep warminakarojj munasiñampi, khuyapayasiñampi uñjasïna uka toqetwa Bibliajj parli. Jesusajja, 12 maranak wila apa usuni mä warmiruw ukham uñjäna. Uka warmejja, qʼañütap laykojj janiw Moisesan Leyiparjamajj jaqenakar jakʼachasiñapäkänti (Lev. 15:19-27). Ukampis uka warmejj usupat wal qollasiñ munäna. Walja qollirinakampiw qollayasïna, “walpun tʼaqhesïna; taqe kunatï jupan utjkän ukanaks tukjasïnwa, ukampis janiw waliptkänti, jan ukasti jukʼampikiw usuntjjäna” (Mar. 5:25, 26).

Walja jaqenakaw Jesusan ukar sarapjjäna, usurnukstat warmis sararakïnwa, jupajj qhepäjjat makatasin Jesusar isip llamktʼäna, ukatsti ¡ukspachaw wila usupajj saytʼjjäna! ‘Janiw amuyaskaniti’ sasaw uka warmejj amuypachäna. Ukampis Jesusajj jankʼakiw amuyasïna, ukatwa akham säna: “¿Khitis llamktʼitu?” sasa (Luc. 8:45-47). Warmisti wal ajjsartʼayasisajja, khatattʼasisaw Jesusan kayupar qonqortʼasïna, ukatsti “taqe kunsa cheqap arsusirakïna” (Mar. 5:33).

Ukatjja, sum jikjjatasiñapatakejj munasiñampiw Jesusajj warmir akham säna: “Chʼamachtʼasim, wawa” sasa (Mat. 9:22). Hebreo arunsa, griego arunsa “wawa” siski ukajj “munasiñata, khuyaptʼayasiñatwa” apnaqasïna sasaw Bibliat yatjjatatanakajj sapjje. Jesusajj uka warmir akham saskakïnwa: “Iyawsatam laykuw kʼumaräjjtajja. Jichhasti sumak sarjjam. Usumatsti kʼumaräjjtawa” sasa (Mar. 5:34).

Wali utjirini Booz (Boaz) chachajja, “wawa” sasinwa Moab markankir Rut warmir säna. Rut warmejj jan uñtʼat jaqen yapupanwa cebada puyanak apthapiskäna, ukatwa mä jukʼa ajjsarpachäna. Booz chachajj Rut warmir akham sänwa: “Istʼit, wawa, jan saramti yaqha yapurojj cebada puyanaka apthapirejja” sasa. Ukham satajja, altʼasisin akham sänwa: ‘Yaqha markatäksta ukasa, ¿kunatsa munasiñamp uñjista?’ sasa. Booz chachajj saskakïnwa: “Nayasti yattwa kunanaktï [Noemí] taykchʼimataki lurkta ukanaka [...]. ¡Diosaw jumar kuttayjjätam!” sasa (Rut 2:8-12).

Jesusatsa, Booz chachatsa, jilïr irpirinakajj wal yateqasipjjaspa. Awisajja, yaqhep kullakanakajj ajay toqet yanaptʼa jan ukajj chʼamañchatäñwa munapjje, ukaruw pä jilïr irpirinakajj sarapjje. Jilïr irpirinakatï Jehová Diosar yanaptʼa mayisipjjani, kullakarus sum istʼapjjarakini ukhajja, Bibliarjam chʼamañchtʼasinwa chuymachtʼapjjani (Rom. 15:4).