Tantachäwinakajj munasirïñataki suma luräwinak lurañatakiw yanaptʼistu

NAYRA tiempotpachaw Diosar adorañatakejj servirinakapajj tantachasipjjerïna. Israelitäpkäna uka chachanakajja, Jerusalenaruw maran kimsa jachʼa fiestanakar sarapjjerïna (Deut. 16:16). Nayrïr patak maranakan jakir cristianonakajja, cristiano masinakapan utanakapanwa tantachasipjjerïna (Filem. 1, 2). Jichhürunakanjja, jiwasajj asambleanakaru ukhamarak congregacionankir tantachäwinakaruw jan faltasis sartanjja, kuna laykutejj uka tantachäwinakar sarasaw Jehová Diosar adortanjja (Sal. 95:6; Col. 3:16).

² Maysa toqetjja Jehová Diosajj uka tantachäwinakanwa yatichistu (Is. 54:13). Ramanakamp Carpachasiñ Fiestanjja, sapa paqallqo marajj ukaw pasarakïna. Uka fiestat parlkasajja, Moisesajj israelitanakar akham sänwa: “Markpachar tantachtʼapjjam, mä arunjja chachanakaru, warminakaru, wawanakaru, markanakaman jakiri extranjero jaqer tantachtʼapjjam, ukhamat jupanakajj istʼapjjañapataki, yateqapjjañapataki, Jehová Diosamar ajjsarapjjañapataki ukhamarak aka Leyin taqe arunakap sum phoqapjjañapataki” sasa (Deut. 31:12). Ukhamarusa tantachäwinakajj jilat kullakanakasar sum uñtʼañatakiw yanaptʼistu, jupanakaw jiwasar wal chʼamañchtʼapjjestu.

CONGREGACIONAN TANTACHÄWINAKAPA

³ Kunjamtï yatjjataniwayktanjja, Diosan servirinakapajj tantachasipjjapunirïnwa. 33 maran Pentecostés uru pasatatjja, kuntï apostolonakajj yatichapkäna uk yateqañatakiw discipulonakajj chʼamachasipjjäna, “mä amtakiw jupanakajj templor sapüru” sarapjjarakïna (Hech. 2:42, 46). Qhepatjja Diosan amuytʼayat qellqatanakaw tantachäwinakan liytʼasirïna. Sañäni, Jesusan apostolonakapana, discipulonakapan cartanakapaw liytʼasirïna (1 Cor. 1:1, 2; Col. 4:16; 1 Tes. 1:1; Sant. 1:1). Ukatjja juntow orapjjerïna, predicación toqet experiencianaksa cuenttʼasipjjarakirïnwa (Hech. 4:24-29; 11:5-18; 14:27, 28; 20:36). Biblian yatichäwinakapatsa, kunjamsa profecianakajj phoqasiskäna ukanakatsa parlapjjarakirïnwa. Ukatsti cristianonakajj kunjamäpjjañapasa, kunjamsa Diosar servipjjañapa uka toqetwa instruccionanak katoqapjjerïna, wali kusisit predicapjjañapatakis chʼamañchtʼatäpjjarakïnwa (Rom. 10:9, 10; 1 Cor. 11:23-26; 15:58; Efes. 5:1-33).

⁴ Jichhürunakanjja ukhamarakiw tantachäwinakajj apasi, ukatwa Pablon ewjjtʼapar istʼtanjja, jupajj akham sänwa: “Tantachäwinakasjja janirak jaytanukupjjañäniti, kunjamtï yaqhepanakajj jaytanukuñar yatitäpki ukhamjja, antisas maynit maynikam chʼamañchtʼasipjjañäni, Diosan urupajj jakʼankjjatap yatisajj jukʼamp uk lurapjjañäni” sasa (Heb. 10:24, 25). ‘Jan wali jaqenak taypina, jan cheqapar sarnaqer jaqenak taypinwa’ jaktanjja. Cristianonakjamajj taqe jan walinakatwa jitheqttanjja, aka mundon munañanakapsa apanukuraktanwa (Filip. 2:15, 16; Tito 2:12-14). Cheqansa aka qhepa urunakan Diosar serviñan suma saytʼatäñatakisa Diosar taqpach chuymasamp serviñatakisa, maynit maynikamaw tantachäwinakan chʼamañchtʼasiñasa (Sal. 84:10; Rom. 1:11, 12). Bibliatsa yatjjatañasarakiwa. Ukampis ¿kawkinsa Bibliat wali sum yateqsna? Ukatakejj kunjamas sapa tantachäwejj apasi uk yatjjatañäni.

SEMANA TUKUYAR APASKI UKA TANTACHÄWI

⁵ Tantachäwi qalltanjja, taqenitak mä discursow arstʼasi. Yaqhep jaqenakajj inas nayrïr kuti uka tantachäwir sarapjjchi. Uka discursonakajj jichhak tantachäwinakar jutapki ukanakampiru, congregacionankir jilat kullakanakampiruw Diosar jukʼamp uñtʼapjjañapatak chʼamañchtʼi (Hech. 18:4; 19:9, 10).

⁶ Jichhürunakan apaski niya uka pachpa tantachäwinakwa Jesusasa, apostolonakapasa, mayni cristianonakas apapjjerïna. Jesusajj wali suma arstʼirïnwa, “janipuniw khiti jaqes ukham parlirïkiti” sasaw jaqenakas sapjjäna (Juan 7:46). Wali autoridadamp parlasajja, jaqenakarojj wal musparayäna (Mat. 7:28, 29). Khitinakatï arunakaparjam sarnaqapkäna ukanakajja, walja bendicionanakwa katoqapjjäna (Mat. 13:16, 17). Apostolonakajj yatichiripatwa yateqasipjjarakïna. Ukanakat mayajj Hechos 2:14-36 textonwa jikjjatasi. Ukanjja kunjamsa 33 maran Pentecostés urun chuymar purtʼkir mä discurso Pedrojj arstʼäna uka toqetwa parli, discursopajj jakäwinakapan cambionak lurapjjañapatakiw walja jaqenakar yanaptʼäna. Mä qhawqha maranak qhepatjja, Pablojj Atenas markanwa mä discurso arstʼäna, ukajj cristianöjjapjjañapatakiw mä qhawqha jaqenakar yanaptʼäna (Hech. 17:22-34).

⁷ Jichhürunakanjja, walja jaqenakaw sapa semana congregacionanakan arstʼaski uka discursonak istʼir sarapjje, asambleanakarus discursonak istʼirejj sarapjjarakiwa. Uka discursonakajj cristianjam sum sarnaqañataki, Diosar serviskakiñatakiw yanaptʼistu. Ukhamajj Diosat yatiñ munapki ukanakarusa yaqha jaqenakarus uka tantachäwinakar invittʼapjjañäni, ukhamatwa Bibliat wali sum yateqapjjani.

⁸ ¿Kunanakatsa discursonakan parlasi? Biblian yatichäwinakapata, jan ukajj profecianakata, Biblian wiñay yatichäwinakapata (principios bíblicos), matrimoniota jan ukajj familiatwa parlasi wayn tawaqonakajj kuna jan walinakarus saykatapjje uka toqetsa, kunjamsa cristianonakajj sarnaqapjjañapa uka toqets parlasirakiwa. Yaqhep discursonakajj Diosan wali suma luratanakapatwa parlaraki. Yaqhanakasti Biblian parlki uka Diosan nayra servirinakapajj kunja jan ajjsartʼirïpjjänsa, kunja Dios chuymäpjjänsa, Diosarus qhawqsa confiyapjjäna ukanakatwa parlaraki.

⁹ Uka discursonak wali atencionampiw istʼañasa, jilatajj liytʼkani qhanañchtʼkarakini uka textonak thaqtasas liytʼañasarakiwa (Luc. 8:18). Ukhamatwa kuntï siski ukan cheqätap yatiñäni, ukatjja ukarjamaw sarnaqarakiñäni (1 Tes. 5:21).

¹⁰ Congregacionanakanjja sapa semanaw discursonakajj arstʼasi. Uka discursonakjja yaqha congregacionanakat jutir jilatanakaw arstʼapjje. Ukampis yaqha discursantenakajj jan jikjjatañjamäki ukhajja, pachpa congregacionankir jilatanakaw discursonak arstʼapjje.

¹¹ Discurso pasatatjja, Yatiyañataki revistatwa yatjjatasi. Ukanjja jisktʼanakampi respuestanakampiw kunayman yatichäwinakat yatjjatasi. Jehová Diosajj uka revista toqew jupar serviñasatakejj yanaptʼistu.

¹² Uka yatichäwinakajj Biblian wiñay yatichäwinakaparjam sarnaqañatakiw yanaptʼistu. ‘Aka mundon espiritupar’ atipjañatakis yanaptʼarakistuwa, ukatjja jan walinakatwa jarkʼaqestu (1 Cor. 2:12). Biblian yatichäwinakapsa profecianaksa qhanstayarakiwa, ukhamatwa sum amuytanjja, “cheqap sarnaqerinakan” thakipnam sarañatakis yanaptʼarakistuwa (Prov. 4:18; Sal. 97:11). Yatiyañataki revistat yatjjatañasa ukan arstʼañasa, Jehová Diosajj churkistani uka paraíso kusisit suyañatakiw yanaptʼistu (Rom. 12:12; 2 Ped. 3:13). Diosar kusisit serviñatakisa espíritu santon achuparjam sarnaqañatakis yanaptʼarakistuwa (Gál. 5:22, 23). Ukatjja yantʼanakar saykatañataki, ‘jutïrin suma saytʼatäñatakiwʼ yanaptʼistu, ukhamat ‘cheqpach jakañ’ katoqañasataki (1 Tim. 6:19; 1 Ped. 1:6, 7).

¹³ Uka yatichäwinakamp sapa semana chʼamañchtʼasiñatakejja, sapakisa jan ukajj familiasampis sumwa Yatiyañataki revista wakichtʼasiñasa, textonaksa thaqtañasarakiwa, pachpa arunakasampiw tantachäwin arstʼañasaraki. Ukham arstʼatasajj istʼapkistu ukanakaruw chʼamañchtʼi, mayninakan comentarionakap wali atencionamp istʼasas chʼamañchtʼasiraktanwa. Jiwasatï taqe ukanakamp yanaptʼayasiñäni ukhajja, kuntï yateqktan ukajj chuymasaruw quedasini.

SEMANAN APASKI UKA TANTACHÄWI

¹⁴ Jilat kullakanakajj sapa semanaw Cristianjam Jakañataki ukat Yatiyañataki tantachäwir sarapjje, kimsa parter jaljat uka tantachäwejj suma predikirïñatakiw yanaptʼistu (2 Cor. 3:5, 6). Cristianjam Jakañataki ukat Yatiyañataki: Tantachäwin yatjjatañataki sat qellqat katoqtan ukanwa tantachäwin programapasa, kunanakatsa yatjjatasini ukanakasa, kunjamsa predicacionan parlsna uka yanaptʼanakas jikjjatasi.

¹⁵ Nayrïr partejja, “Biblian suma yatichäwinakapa” satawa. Bibliatwa uka cheqan wali sum yatjjatasi, mä toqet yatjjatkasajj kunanaksa yateqsna ukas qhanañchasirakiwa. Uka parten mä discursow arstʼasi, ukjjarojja semanan Bibliat liytʼasiwayki uka capitulonakatwa tantachasirinakar jisktʼasi, tukuyarusti Bibliatwa liytʼasiraki. Cristianjam Jakañataki ukat Yatiyañataki qellqatanjja, dibujonakampi, mapanakampi, recuadronakampi ukat jisktʼanakampiw utji. Bibliat ukham yatjjatasajj jukʼamp suma yatichirïñäniwa, suma cristianöñäniwa, ukatjja “taqe suma luräwinak lurañatakis” wakichtʼatarakïñäniwa (2 Tim. 3:16, 17).

¹⁶ Payïr partejja, “Sum yatichañatak chʼamachasiñäni” satawa. Uka cheqanjja suma predikirïñataki, suma yatichirïñatakiw yatichasi, jilat kullakanakan practicapjjañapatakis asignacionanakaw churasi, ukatjja yatiyañatak videonakatwa yatjjatasiraki. Taqe ukanakaw puntopar sum parltʼañatak yanaptʼistu, mä qarit jaqer “wakisir arunakampi” parlañatakis yanaptʼarakistuwa (Is. 50:4).

¹⁷ Kimsïr partejj “Cristianjam jakañataki” satawa. Uka cheqajj Biblian wiñay yatichäwinakaparjam sarnaqañatakiw yanaptʼistu (Sal. 119:105). Uka cheqanjja Congregacionan Bibliat yatjjatañaw jukʼamp wakiskirejja, Yatiyañataki revistjamaw uka cheqajj yatjjatasiraki.

¹⁸ Cristianjam Jakañataki ukat Yatiyañataki qellqatajj purini ukhajja, coordinador jilatawa jan ukajj jupar yanapir mä anciano jilataw uka qellqat sum uñakipi, ukatjja ukankir partenak khitinakas arstʼapjjani ukwa asignaraki. Sapa semanajj suma yatichirïki, ancianonakan aprobatäkaraki uka jilatanakaw tantachäwi sarayapjje. Uka jilatanakajj tantachäw horasaparuw qalltapjjañapa, tukuyapjjañaparaki, arstʼapkani uka jilat kullakanakarus chʼamañchtʼañapawa, yaqheparusti ewjjtʼañaparakiwa.

¹⁹ Uka tantachäwitak waktʼayasiñasa, jan faltasis sarañasa, ukan arstʼañas Biblia sum amuyañatakiw yanaptʼistu, Biblian yatichäwinakap sum uñtʼañatakisa, jan ajjsaras predicañatakisa, suma yatichirïñatakis yanaptʼarakistuwa. Jan Testigöpki ukanakarus uka tantachäwejj wal yanaptʼi, kuna laykutejj jilat kullakanakampiw uñtʼasipjje, Diosarus jukʼampiw uñtʼapjjaraki. Uka tantachäwitaki ukhamarak yaqha tantachäwinakatak waktʼayasiñatakejj aka yanaptʼanakaw utjistu: Watchtower Library, JW Library^®, Watchtower INTERNETANKIR BIBLIOTECA^™, Jehová Diosan Testigonakapan Bibliat yatjjatapjjañapataki, Salón del Reinonkir biblioteca. Uka bibliotecanjja Testigonakankir walja qellqatanakaw utji, sañäni: Índice de las publicaciones Watch Tower, kunayman Biblianaka, concordancia, mä diccionario ukat yaqha libronakampi. Uka bibliotecankir qellqatanakjja, janïr tantachäwi qalltkipana jan ukajj tantachäwi tukuyaruw khititï munki ukajj liytʼaspa.

PREDIKIR MISTUÑATAK TANTACHÄWINAKA

²⁰ Predikir mistuñatak tantachäwinakajja, semanan kunayman urunakaru ukat kunayman horanakaruw waktʼayasi. Uka tantachäwinakajj jilat kullakanakan utanakapanwa apasi, Salón del Reino utansa apasirakiwa. Predicañatak jiskʼa gruponakan utjatapajja, walja askinakwa utjayi. Gruponkir jilat kullakanakajj facilakwa predikir mistuñatak tantachäwirusa territoriorus puripjjaspa, superintendente de grupo jilatatakis organiztʼañajj facilakirakiwa, ukhamat ratuki predicañ qalltañataki. Ukhamarusa gruponkir jilat kullakanakar sum uñjañatakiw jupar yanaptʼaraki. Awisajja walja gruponakarojj predikir mistuñatakejj mayaruk tantachtʼañaw wakisi. Amuytʼañataki, semanantï jilat kullakanakajj jukʼanik predikir mistupjjchi ukhajja, mä grupo mistuñakiw wakisispa, predikir mistuñatakejj Salón del Reino utana jan ukajj yaqha lugaranwa tantachasipjjaspa. Ukhamatwa jilat kullakanakajj panin panini predikir sarapjjaspa. Ukatjja fiestanakajj utjki ukhasa jan ukajj Yatiyañataki revista yatjjatañ tukuyarusa predikirejj juntokiw mistusispa.

²¹ Gruponakajj jan juntok tantachasipki ukhajja, superintendente de grupo jilataw tantachäwi sarayi. Awisajja uka jilatajj auxiliaraparu jan ukajj experienciani jilataruw predicación irpsuñapatak mayispa. Jupanakajj predicacionan kunanakatï yanaptʼaskaspa uka toqetwa parlapjjañapa, chʼamañchtʼapjjañaparakiwa. Ukat grupo organiztʼasajja, jukʼamp experiencianïpki ukanakarojj machaqanakampi jan ukajj yanaptʼa munirinakamp predikir mistupjjañapatakiw mayipjjaspa. Tantachäwi tukuyañatakisti mayniw oración lurañapa, ukjjarusti predikiriw jankʼak sarasiñapa. Uka tantachäwejj phesqa jan ukajj paqallqo minutonakakïñapawa, mä tantachäwi tukuyarüchi ukhajja jukʼamp minusakïñapawa.

MACHAQA JAN UKAJJ JISKʼA CONGREGACIONANAKAN TANTACHÄWINAKAPA

²² Mä congregacionajj wal jiltjje ukhajja, yaqha congregacionanakan uttʼayasiñapaw wakisjje. Superintendente de circuito jilataw mä congregacionan uttʼayasiñapatak mayispa. Jiskʼa gruponakak utjki ukhajja, uka jakʼankir mä congregacionamp chik tantachasiñapaw wakisispa.

²³ Yaqhep jiskʼa congregacionanakanjja, kullakanakakiw utji. Ukatwa oración lurki uka kullakasa tantachäwi sarayir kullakasa, Biblian mayitanakaparjamajj pʼeq chʼoqtʼasiñapa (1 Cor. 11:3-16). Jilapartejj tantachasirinakan nayraqatapanwa uka kullakajj qontʼasi. Kullakanakajj janiw mä discurso tantachäwinakan arstʼapkiti, jan ukasti Diosan markapan waktʼayat qellqatanakatwa liytʼapjje jan ukajj parltʼapjje. Maysa toqetjja, tantachasirinakampiw yatjjatapjje jan ukajj mä demostración lurapjje. Correspondencia uñjañapatakisa tantachäwinak sarayañapatakis sucursalaw mä kullakarojj asigni. Mä siervo ministerialasa jan ukajj mä ancianos utj-jjani ukhajja, uka jilataw congregacionan lurañanakapamp phoqjjani.

ASAMBLEAS DE CIRCUITO

²⁴ Maran pay kutiw congregacionanakajj mä uru asamblea de circuiton tantachasipjje. Ukanjja jilat kullakanakampejj munasiñampiw maynit maynikamajj kusisit katoqtʼastanjja, jupanakar jukʼamp uñtʼañatakis chʼamachasiraktanwa (2 Cor. 6:11-13). Ukatakejj Diosan markapajj Bibliat apstʼat mä tema ajlli, kuna toqetsa asamblean parlasini uksa wakisitarjamaw waktʼayaraki. Ukanak sum qhanstayasiñapatakejja, discursonakampi, demostracionanakampi, escenificacionanakampi, monologonakampi, entrevistanakampiw utji. Uka yanaptʼanakajj taqeniruw chʼamañchtʼi. Ukatjja khitinakatï jakañ vidap Diosar katuyasiwayjjapjje ukanakajj uka asambleanakanwa bautisasipjjarakispa.

ASAMBLEAS REGIONALES

²⁵ Maran may kutejj jachʼa asambleanakaw apasi. Jilapartejja kimsa urunakaw asamblea regionalajj apasi, ukanjja walja circuitonakankir congregacionanakaw tantachasipjje. Yaqhep jiskʼa sucursalanakatakejja, taqpach congregacionanakan mä lugaranak tantachasipjjañapaw wakisispa. Yaqhep markanakanjja, uka asambleanakajj sapa markarjamaw mayjtʼayasispa jan ukajj Diosan organizacionapan instruccionanakaparjamaw mayjtʼayasispa. Maysa toqetjja, asambleas internacionales ukat asambleas especiales ukanakaw apasiraki. Uka asambleanakarojj kunayman markanakat walja waranqa Testigonakaw sarapjje. Uka asambleanakat yatisajja, waljaniw Reinon suma yatiyäwinakap katoqasiwayapjje.

²⁶ Ukham jachʼa asambleanakanjja, mayachtʼataw Diosarojj wali kusisita adortanjja. Uka asambleanakanjja, Biblian cheqa yatichäwinakapaw qhanstayasi, predicañatak qellqatanakasa, sapak yatjjatañatak qellqatanakasa jan ukajj congregacionan yatjjatañatak qellqatanakas presentasirakiwa. Taqe uka asambleanakanwa bautismojj utji. Asambleanakajj Diosar serviskakiñatakejj wali wakiskiriwa. Ukhamarus Diosan markapajj oraqpachan mayachtʼatätapa, munasiñ utjatapwa uka asambleanakajj uñachtʼayi (Juan 13:35).

²⁷ ¿Kunatsa tantachäwinakaru, asambleanakaru jan faltasis sarañajj wali wakiskirejja? Kuna laykutejj uka tantachäwinakaw Diosar serviñan jan aynachtʼañatakejj yanaptʼistu, jan walinakat amuyasiñatakis yanaptʼarakistuwa. Ukhamarus uka tantachäwinakanwa Jehová Diosar jachʼañchtanjja (Sal. 35:18; Prov. 14:28). Ukanakan utjatapatjja walpun Diosar yuspärtanjja, kuna laykutejj uka tantachäwinakaw aka qhep qhepa urunakan Diosar serviskakiñatak yanaptʼistu.

TATITUN CENAPA

²⁸ Jehová Diosan Testigonakapajja, maran may kutejj Tatitun Cenapa, mä arunjja Jesusan jiwatap amtañatakiw tantachastanjja (1 Cor. 11:20, 23, 24). Jesusaw jupan jiwatap amtañasatak mayistu, uka tantachäwejja jiwasatakejj wali importantewa (Luc. 22:19).

²⁹ Bibliarjamajja, judionakajj Pascua amtapjjerïkäna uka pachpa fechanwa Tatitun Cenapajj amtasiraki (Éx. 12:2, 6; Mat. 26:17, 20, 26). Israelitanakajja kunjamsa 1513 antes de Cristo maran Egiptot mistupjjäna ukwa Pascua fiesta urojj amtapjjerïna. Uka urunjja, Jehová Diosajj ‘14 de nisán urojj Pascua uywa manqʼapjjäta, ukatjja Egipto markatwa mistupjjäta’ sasaw säna (Éx. 12:1-51). Uka fechajja, Jerusalén markan machaq phajjsejj (wawa phajjsejj) uñstkäna ukhat 13 urunak jakhusinwa calcultʼasirïna, ukhamatwa primavera tiempon arumas urus 12 horanakanïki uka qhepar waktʼäna. Jilapartejja, Tatitun Cenapajj primavera tiempon urtʼäki uka arumaw apasi, mä arunjja arumas urus 12 horanakanïkaraki uka qhepatwa apasi.

³⁰ Kunjamas Jesusan jiwatapajj amtasiñapa ukajj Mateo 26:26-28 textonwa qhanañchasi. Tatitun Cenapajj apaski uka arumajja, tʼantʼajj Jesusan cuerpoparus tukkaspa, vinojj Jesusan wilaparus tukkaspa ukham ritualajj janiw apaskiti. Jan ukasti mä cenaw (comida simbólica) amtasi, ukanjja alajjpachar sarasin Jesusamp apnaqanipkani uka cristianonakaw tʼantʼsa manqʼapjje, vinsa umtʼapjje (Luc. 22:28-30). Ukatjja aka oraqen jakapkani uka cristianonakasa, Jesusat yatiñ munapki ukanakas Tatitun Cenap amtañatakejj invitatäpjjarakiwa. Uka tantachäwir sarasajja, kuntï Jehová Diosajj jiwas layku lurawayki ukar yuspärataswa uñachtʼaytanjja. Janïra Tatitun Cenap amtkasajj mä wakiskir discursow arstʼasi, ukhamat Jesusan jiwatap amtañ uru wal suytʼañasataki ukhamarak jaqenakan Bibliat jukʼamp yatiñ munapjjañapataki.

³¹ Jiwasatakejja tantachäwinakan jilat kullakanakamp chikäñajj wali wakiskiriwa. Uka tantachäwinakaw ‘mayninakajj kunjamäsipkis uk amuyañatakisa, munasiña utjañapatakisa ukat suma luräwinak jukʼamp utjañapatakis’ yanaptʼistu (Heb. 10:24). Suma phoqeri amuyasiri esclavojja, tantachäwinak toqew Diosar serviskakiñatak yanaptʼistu. Ukhamajj jiwasatï Diosan serviripäjjstan, jan ukajj jichhak Diosat yateqaskstan ukhajja, tantachäwinakat janipun faltasipjjañäniti. Kuntï Diosajj organizacionap toqe churkistu uk wali valoranit uñjañäni ukhajja, mayachtʼatäñäniwa, jukʼampis Jehová Diosaruw jachʼañchañäni (Sal. 111:1).