Yatiyir mistuñatak tantachäwinakajj mä suma amtampi waktʼayatawa

1. ¿Kuna amtampis yatiyir mistuñatak tantachäwejj waktʼayasiwayi?

¹ Jesusajj mä kutejja, 70 arkirinakapampiw janïr yatiyir khitkasajj tantachtʼasïna (Luc. 10:1-11). Janiw sapakïpktati, ‘Yapuniw’ jumanakampïski, mä arunjja, Jehová Diosaw irpasipktam sasaw chʼamañchtʼäna. Kunjamsa yatiyapjjani uksa yaticharakïnwa, ukaw yatiyañatakejj jupanakar yanaptʼäna, ukatjja ‘panin panini’ yatiyapjjañapatakiw khitäna. Jichha tiemponjja, yatiyir mistuñatak tantachäwejj uka amtampi waktʼayatarakiwa: chʼamañchtʼañataki, yatichtʼañataki ukat organistʼañataki.

2. Abril phajjsitjja, yatiyir mistuñatak tantachäwejj ¿qawqha tiemponaksa apasjjani?

² Yatiyir mistuñatak tantachäwejj 10 ukat 15 minutonakanwa jichhakamajj apasiski. Ukanjja, kunjamsa yatiyasini, kawkhansa yatiyasini ukaw qhanañchtʼasi ukat Diosarus mayisirakiwa. Ukampis abril phajjsitjja, 5 ukat 7 minutonakanakwa uka tantachäwejj apasjjani. Taman yaqha tantachäwip tukuyaru apasini ukhajja, jukʼamp minusakïñapawa, kunatejj tantachasirinakajj Diosan yatichäwinakap katoqawayjjapjjewa. Yatiyir mistuñatak tantachäwejj jukʼa tiemponak apasjjani ukhajja, yatiyañatakejj walja tiempow utjani. Ukat precursor regularanakasa, yatiyirinakasa janïr tantachäw qalltkipan yatiyañ qalltapjjani ukhajja, mä jukʼsa samartʼapkaspa ukhamakïniwa.

3. ¿Kunjamsa yatiyir mistuñatak tantachäwejj waktʼayasiñapa?

³ Yatiyir mistuñatak tantachäwejja, yatiyirinakar yanaptʼañatakjamaw waktʼayasiñapa. Walja tamanakatakejja, gruponakajj yaqh yaqha cheqat mistuñapaw wali askejja, ukhamatwa yatiyir mistuñatak tantachäwir sarañasa, territorios taqenitak jan jayankkaniti. Ukat jilat kullakanar kawkïr gruponkanisa uk jalanoqtʼañas janiw chʼamäkaniti ukat grupo uñjir jilatanakas sum grupop uñjarakini. Ukatakejj irpir chuyman jilatanakaw kunas tamatak wakisi ukarjam amtapjjañapa. Janïr oracionampi tukuykasajj taqeniw kawkhansa yatiyasini, khitimpis yatiyani uk yatjjañapa.

4. ¿Kunatsa yatiyir mistuñatak tantachäwejj mayni tantachäwinakjam wali wakiskirejja?

⁴ Mayni tantachäwinakjam wali wakiskirirakiwa. Aka tantachäwirojj yatiyir misturinakakiw sarapjje, janiw tampachajj tantachasipkiti. Ukhamäkchisa mayni tantachäwinakjam wali wakiskiriwa, Jehová Diosan regaloparakiwa. Uka tantachäwejj maynit maynikam chʼamañtʼasiñataki, suma luräwinak lurañatakiw yanaptʼarakistu (Heb. 10:24, 25). Ukhamasti, uka tantachäw sarayirinakajj sum wakichtʼasipjjañapa, ukhamatwa uka tantachäwejj Jehová Diosarus jachʼañchani ukat jilat kullakanakarus yanaptʼarakini. Yatiyirinakajj horasapar puriñatakiw chʼamachasipjjañapa.

Yatiyir mistuñatak tantachäwirojj mayni tantachäwinakjam wali askitwa uñjañasaraki

5. 1) Yatiyir mistuñatak tantachäwinak sum sarayasiñapatakejj ¿kunjamsa yatiyañ toqet irpir chuyman jilatajj yanaptʼaspa? 2) ¿Kunjamsa kullakanakajj yatiyir mistuñatak tantachäw sarayapjjaspa?

⁵ Sarayañatakejj kunjamsa wakichtʼassna. Mä arstʼäwi sum wakichtʼasiñatakejja maynejj jayäkipanwa katoqañapa. Yatiyir mistuñatak tantachäwitakejj ukhamäñaparakiwa. Gruponakajj yatiyir mistuñataki yaqh yaqha cheqan tantachasipjjani ukhajja, grupo uñjirimpi, yanapiripampiw sarayañapa. Ukampis tamjam mayawjatak mistupjjani ukhajja, yatiyañ toqet sarayir irpir chuyman jilataw tantachäw sarayañapataki mä jilatar ajlliñapa. Yatiyañ toqet yaqhep irpir chuyman jilatanakajja, sarayirinakarojj mä wakichäwi churapjje ukat tablerorus lipʼkatayapjjarakiwa. Tantachäwi sum apasiñapatakejja, sarayirinakajj yatichañsa, organistʼañsa sum yatipjjañapa. Khitinakas yatiyir mistuñatak tantachäw sarayani ukjja, yatiyañ toqet sarayir irpir chuyman jilatajj sum amuytʼasaw ajlliñapa. Yaqhep urunakatak irpir chuyman jilatasa ni irpir chuymanin yanapiripasa jan ukajj mä wakichtʼat jilatas sarayañatak jan utjkani ukhajja, experiencian mä kullakaruw ajlliñapa. (“Kullakan sarayañap wakisini ukhajj ¿kunjamsa sarayaspa?” siski uka yatichäwi uñjjattʼäta.)

6. ¿Kunatsa yatiyir mistuñatak tantachäwi sarayirejj sum wakichtʼasiñapa?

⁶ Diosan Arunakap Yatiyañ Escuelataki jan ukajj Yatiyañataki Tantachäwitakis mä arstʼäwi katoqtan ukjja, wali askit uñjtanjja ukat sum wakichtʼasiraktanjja. Janiw khitis tantachäwir sarkasaki, kunjamsa arstʼani uk wakichaskaspati. Yatiyir mistuñatak tantachäw sarayañ waktʼistani ukhajja, ukhamarak wali askit uñjañasa. Niyakejjay uka tantachäwejj jukʼamp jukʼa tiemponak apasjjchinejja, sum yatichañatakisa ukat pachaparjam tukuyañatakis sum wakichtʼasiñasaw wakisini. Kawkhansa yatiyasini ukjja, janïr tantachäwi qalltkipanwa sum yatjjañasa.

7. ¿Kunanakatsa yatiyir mistuñatak tantachäwin parltʼasispa?

⁷ Kunanakats parltʼasispa. Territorionakajj janiw mä pachpäkiti, ukatwa amuyasir cheqap uywatajj uka tantachäwitakejj jan mä bosquejo wakichkiti. “Yatiyir mistuñatak tantachäwin akanakatwa qhanañchtʼasispa” siski uka recuadron walja yanaptʼanakaw utji. Uka tantachäwinjja, jilapartejj tantachasirinakan arstʼapjjañapatakiw mayisini. Awisajj mä demostracionas uñachtʼayasirakispawa jan ukajj Internetan jw.org cheqan utjki uka videonaksa uñtayasirakispawa, ukampis yatiyañ toqet parlañapa. Tantachäw sarayirejja, kunas yatiyir misturinakar chʼamañchtʼaspa ukat yanaptʼaspa ukwa wakichtʼaskasajj lupʼiñapa.

Tantachäw sarayirejja, kunas yatiyir misturinakar chʼamañchtʼaspa ukat yanaptʼaspa ukwa wakichtʼaskasajj lupʼiñapa

8. Sabadompi domingompejj ¿kuna toqenakat parltʼañas yatiyir mistuñatak tantachäwin wakisispa?

⁸ Sabadonakajj Yatiyañataki ukat ¡Despertad! revistanakampiw jilapartejj yatiyasi. Khitinakatï, sabadonakaki mistupki ukanakatakejj kuntï Familiana Diosar Yupaychañataki Aruman yatiyir sarañataki waktʼayasipki ukanak amtañajj chʼamakïspawa. Ukatwa yatiyir mistuñatak tantachäwi sarayir jilatajj Diosan Apnaqäwipat Yatiyañataki sat qellqatan qhep qhepa janapan mistki uka yanaptʼanak amtʼayañapajj wakisi. Yaqhasti, uka yanaptʼanakarjamajj kunjamsa jukʼampinak qhanañchtʼsna uka toqetwa parlaraksna sañäni: uka cheqan kuna yatiyäwicha, fiestach utji ukat yaqha ukhamanakampita. Kunjamsa revista katoqasirinakarojj jukʼampi yatjjatañ munaskakiñapatak yanaptʼsna uksa qhanañchtʼasirakispawa. Ukat inas tantachasirinakat maynejj uka phajjsin irnaqktan uka revistanakampi yatiyjjchi, juparuw kunjam yatiyañas wali askïna, jan ukajj kuna chʼamañchtʼkir experienciapach utji, uk arstʼañapatak mayisirakispa. Domingonakajj kuna qellqatanakampitï uka phajjsejj irnaqasiski ukanakampi yatiyañatakejj niya uka pachparakwa lurasispa. Yaqha qellqatanakampi yatiyañatakis parltʼasirakispawa, sañäni, Diosan apayanit suma yatiyäwinaka ukat Diosar istʼañäni sat folletonakata jan ukajj Kunsa yatichi sat librotsa. Uka qellqatanakampejj kunürus irnaqaktanwa, ukat mayninakar yatichañatakis apnaqaraktanwa.

9. Tamatï invitacionanak jan ukajj tratadonak uka phajjsejj lakirasiskchi ukhajja, ¿kunanakatsa seman tukuyanakajj yatiyir mistuñatak tantachäwin qhanañchasispa?

⁹ Tamatï uka phajjsejj invitacionanak jan ukajj tratadonak lakiraskchi ukhajja, kunjamsa uka chikajj seman tukuyanakan revista jaytsna, jan ukajj Bibliat yateqañ munirinakarojj kunjamsa yanaptʼsna ukanakatwa uka urunakajj yatichasispa. Yaqhasti invitacionanakampi, tratadonakampi irnaqtʼañajj kunja wakiskirisa uka experiencianakatwa qhanañchasirakispa.

10, 11. ¿Kunatsa yatiyir mistuñatak tantachäwitakejj yatiyirinakajj wakichtʼasipjjañapa?

¹⁰ Kunjamsa yatiyirinakajj wakichtʼasipjjaspa. Tantachäw sum apasiñapatakejja, yatiyir misturinakajj yanaptʼapjjarakispawa. Jupanakatï jayäkipan yatiyañatak sum wakichtʼasipjjani, inas familjam Diosar yupaychkasa wakichtʼasipjjchini ukhajja, mayninakarus yanaptʼapjjaniwa. Sum wakichtʼatäñatakejja, janïr tantachäw qalltkipanwa kuna qellqatanakampis yatiyañäni uk apsuñasa. Ukhamatwa territorior jankʼak sarañäni.

¹¹ Kunjamtï mayni tantachäwinakar horasapar puriñatak chʼamachasktanjja, ukhamarakiw aka tantachäwirojj mä qawqha minutonak faltkipan puriñatak chʼamachasiñasa. Qheptʼat pursnajja, janiw pantjasiykaksnati, jan ukasti kunjam yatiyasiñaptï amtaskäna uksa mayjtʼaysnawa. ¿Kunjamatsa? Tantachäw sarayir jilatajj yäpar sum yatiyasiñapatakejj nayraqatjja, sum amuykiptʼi. Amuytʼañataki, tantachasirinakatï jukʼanikïchejja, inas pasïrin territoriojj jiltʼkäna uk tukuyañataki taqpachanir khitchispa. Territoriotï jayankchejja, inas autoninakar jan autoninakampi khitchispa. Jan wali cheqanakan yatiyaschini ukhajja, inas kullakanakkamak yatiyki uka jakʼan yatiyapjjañapatak mä qawqha jilatanakar khitchispa jan ukajj jupanakampi yatiyapjjañapatak maychispa. Mä yatiyiritï usutächi ukhajja, inas jan sinti chʼama tukuñ thaknam khitchispa jan ukajj jan sinti gradanakan utanakar khitchispa. Jan ukajj inas experienciani yatiyirinak machaq yatiyirimpi khitañ amtchispa. Ukampis qheptʼat pursnajja, inas sarayir jilatajj khitimpis maynejj yatiyani uk mun jan muna mayjtʼaychini ukat kawkhansa yatiyasini ukas mayjtʼayasirakchispa. Cheqas qheptʼañajj mä kunats utjaspawa. Ukampis ukhamar yatinoqtatästan ukhajja, akanakatwa amuykiptʼasiñasa, ¿yatiyir mistuñatak tantachäw jan askitti uñjtjja, jan ukajj sum organistʼasiñajach wakisi?

12. Pachpa jilat kullakanakampik jilapart yatiyirïstan ukhajja, ¿kun lurañatakis chʼamachasiñasa?

¹² Yatiyirinakajj maynimp irnaqtʼañatakis amtapjjarakispawa, jan ukajj sarayiriruw khitimpis yatiyani uk sañap suyapjjaspa. Ukampis jiwasatï pachpa yatiyirimpiki sapa kuti yatiyirïstanjja, ¿Janit mayninakar uñtʼañatak chʼamachasksna, ukat yaqhanakampis yatiykaraksna? (2 Cor. 6:11-13.) ¿Janit awisajj mä machaq yatiyirimpi yatiyksna, ukhamat suma yatichirïñapatak yanaptʼksna? (1 Cor. 10:24; 1 Tim. 4:13, 15.) Tantachäwin kunanakattï ewjjtʼkistani uk sum istʼañasa, sañäni kawkhatsa yatiyañ qalltañäni ukanak sum istʼañasa. Tantachäw tukuyarojja, kunatï amtasiwayki ukanak jan mayjtʼayañatakiw chʼamachasiñasa ukat jankʼakirakiw territorior sarañasa.

13. Sapa maynitï chʼamachasiñänejja, ¿kunjamsa yatiyir mistuñatak tantachäwejj yanaptʼistani?

¹³ Jesusajj 70 arkirinakapar panin panini yatiyir khitkäna ukhajja, ‘wali kusisitaw jupanakajj kuttʼanipjjäna’ (Luc. 10:17). Janïr yatiyir sarkasin Jesusampi tantachtʼasipjjatapaw ukham askinak jikjjatañatakejj yanaptʼäna. Yatiyir mistuñatak tantachäwejj niya uka pachparakwa yanaptʼistu. Sapa maynitï chʼamachasiñänejja, uka tantachäwinakajj chʼamañchtʼistaniwa, yatichistaniwa ukat organistʼasiñatakis yanaptʼarakistaniwa, ukhamat “taqe markanakan” yatiyañataki (Mat. 24:14).

Kullakan sarayañap wakisini ukhajj ¿kunjamsa sarayaspa?

Kullakajj tantachäw sarayañatakejj pʼeqep chʼoqtʼasiñapawa, jilapartejj qontʼataw sarayani. Kuna toqettï mä jilatajj yatichkaspa uka pachpa yatichäwinakatarakwa parltʼaspa. Ukampis janiw yatichkaspas ukham amuyayañapäkiti, tantachasirinakampiw mä toqet parlakiptʼapjjaspa. Bautisat yaqha kullakaruw orañapatakejj mayispa, kullakasti pʼeqep chʼoqtʼasiñaparakiwa. Tantachäw saraykipan bautisat mä jilatajj purinini ukhajja, jilataruw tantachäw sarayjjañapatak mayiñapa. Jan ukanak pasañapatakejja, yatiyañ toqet sarayir irpir chuyman jilataw kunsa lurani uk jayäkipan ewjjtʼañapa. Amuytʼañataki, yatiyir mistuñatak tantachäwin akanakaw awisajj pasaspa: bautisat mä waynuchu jilataw uka tantachäwinkaspa, ukampis mä kullakaw tantachäw sarayaskarakispa. Irpir chuymaninakatï uka waynuchu jilatajj tantachäw sarayañapatak janiw wakichtʼatäkiti ukampis Diosat mayispawa sapjjani ukhajja, yatiyañ toqet sarayir irpir chuyman jilataw jayäkipan jupanakamp parltʼani, ukhamat kullakajj tantachäw sarayañapataki, waynitusti orañapataki. Jan ukajj mä jilatarojj janiw tantachäw sarayañapasa jan ukajj orañapas wakiskaspati, ukjja irpir chuymaninakakiw yatipjje. Kunatsa jilatajj jan saraykaspa uk jan qhanstayasaw kullakar irpir chuymaninakajj yatiyapjjañapa, uka jilatas tantachäwinkchinejja, kullakaw tantachäwi sarayañapa, Diosatsa mayiñaparaki. Kunürunakas kullakanakajj yatiyir mistuñatak tantachäw sarayapjjani ukjja, irpir chuymaninakaw jilatar yatiyapjjañapa.

Yatiyir mistuñatak tantachäwin akanakatwa qhanañchtʼasispa:

Diosan Apnaqäwipat Yatiyañataki sat qellqatan jikjjataski uka yanaptʼanakata.
Internetan jw.org sat cheqan yatiyañatakjam utjki uka videonakata.
Kunjamsa yatiyañ qalltsna, kunjamsa yatjjatañ munaskakiñapatak jaqenakar yanaptʼsna jan ukajj Bibliat apstʼat qellqatanak jaytasajj kunjamsa qollqempi yanaptʼasi ukanakjjat qhanañchtʼsna.
Yatiyir sarañatak Biblian kawkïr jiskʼa tʼaqapas chʼamañchtʼistaspa jan ukajj yatiyañ toqetsa yatichistaspa.
Territoriosan inas kuna experiencias utjawaychi jan ukajj Bibliat apstʼat qellqatanakan utjki ukanakatwa qhanañchtʼsna.
Diosan Apnaqäwipat Yatiyañataki sat qellqatan yanaptʼirjam yatichäwinakata.
Yatiyañataki Tantachäwin mä kuna toqetsa jichhak qhanañchtʼasiwayki ukata.
Yatiyañataki sat revistan yatiyañ toqet parlki ukata.
Benefíciese ukat “Jutam nayar arkita” sat libronakan yatiyañ toqet parlki uka yatichäwinakata.
Kunjamsa Internetan jw.org sat cheqampi yatiysna uka toqeta.
Diosan Arupat Yatjjatañataki sat folleton yatichäwinakapata.
Diosajj janiw utjkiti, monot jutatätanwa sirinakampi, hinduismo, budismo religionankirinakampi ukat yaqhanakampis kunjamsa parlañ qalltsna.
Jan istʼañ munirinakar kunjamsa parltʼsna.
Kunjamsa yatiyir masisar sum yatiyirïñapatak yanaptʼsna.
Yaqha aru parlirinakar jikjjatsna ukhajj kunjamsa yanaptʼsna.
Kunjamsa yaqha aru parlirinakar thaqsna, kunjamsa telefonotsa jan ukajj walja jaqenak utjki uka cheqanakansa yatiysna, Bibliat yateqañ munirinakarus wasitat kuttʼsna, jan ukajj Bibliatsa yatichsna.
Kunjamsa jan walinakat jarkʼaqassna, kunatï wakiski ukarjam parltʼsna, kusisit yatiysna, respetsa uñachtʼaysna ukanakatwa amtaysna ukat yaqhanakampita.