¿Kuna qollqempis Diosan markapajj yanaptʼasi?

JEHOVÁ DIOSAN Testigonakapajja, ‘taqe aka oraqpachanwa’ yatiyasktanjja. Ukham lurasaw kuntï Jesusajj aka qhepa urunakat siskäna uk phoqasktanjja (Hech. 1:8; Mat. 24:14). Chʼamasampi ukat tiempo apstʼasisaw yatiytanjja, Diosan Reinopwa jakäwisan nayrar uchtanjja, Jehová Diosaw kunatï wakiski uk churistani sasin confiyasaw taqe chuyma yatiyaraktanjja (Mat. 6:25-34; 1 Cor. 3:5-9). Ukham luratasatjja, Jehová Diosajj jiwasar bendisiskatapwa amuytanjja.

¿KUNA QOLLQEMPIS DIOSAN MARKAPAJJ ORAQPACHAN YANAPTʼASI?

² Kunapachatï jaqenakajj Biblia ukat qellqatanak ukhamak katoqapjje ukhajja, ‘¿kunatsa jan cobrapkpacha?’ sasaw jisktʼasipjje. Biblianaka ukat qellqatanak lurañasa, imprimiñasa, Betel utanak lurañasa, mantenimiento lurañas walja qollqetakiwa. Khitinakatï imprentanakan trabajipki ukanakasa, predicación pʼeqtʼapki ukanakasa, suma yatiyäwinak yatiyasiñapatak kunaymaninak lurapki ukanakas Betel utanakanwa jakapjje. Superintendente de circuito jilatanakarusa, misioneronakarusa, precursor especialanakarusa ukhamarak sapürunjam Diosar servir (servicio especial de tiempo completo) jilat kullakanakarus mä jukʼa qollqempiw yanaptʼasi, ukhamat Diosan markapan utjki uka lurañanakamp sum phoqapjjañapataki. Cheqansa Reinon suma yatiyäwinakap yatiyasiñapatakejj walja qollqew munasi. ¿Ukhamajj kawkitsa qollqejj irtasi?

³ Jan Testigöpki uka jaqenakat waljanejja, suma yatiyäwinak yatiyatas wali valoranitwa uñjapjje, ukatwa oraqpachan yatiyasiskakiñapatakejj donación churapjje. Ukampis jilpachajj Jehová Diosan Testigonakapaw donacionanak churapjje, jupanakat yaqhepajj sucursalaruw cheqak aptʼayapjje. Nayra tiemponjja waljaniw taqe chuyma donacionanak churapjjäna, ukhamat Diosar adorañatak lugaranak lurasiñapataki. Jichha tiemponjja jilat kullakanakajj uka pachparakwa lurapjje (Éx. 35:20-29; 1 Crón. 29:9). Yaqhepanakajj testamentonak toqew yänakap donacionat churapjje, ukampis jilpachajj jilat kullakanaka, congregacionanaka, jan ukajj circuitonakaw donacionanak churapjje. Taqe ukanakaw Diosan Reinopat yatiyasiskakiñapatakejj yanaptʼi.

⁴ Jesusasa discipulonakapas qollqe imañ cajitanïpjjänwa sasaw Bibliajj qhanañchi, ukhamajj gastonakapatakejj qollqe toqet yanaptʼanakwa katoqapjjäna (Juan 13:29). Jesusampiru discipulonakapampir yanaptʼir warminakaw utjarakïna (Mar. 15:40, 41; Luc. 8:3). Apóstol Pablojja suma yatiyäwinak yatiyasiñap munapkäna uka jilat kullakanakan yanaptʼap taqe chuymaw katoqasïna, ukanakat wal yuspärarakïna (Filip. 4:14-16; 1 Tes. 2:9). Jupanakan Diosar wal serviñ munapjjatapasa wajjtʼasir chuymanïpjjatapasa jiwasatakejj wali yateqaskayawa. Suma yatiyäwinak yatiyasiñapatak qollqe ukat yänak churañajj jiwasatakejj mä privilegiowa. Ukham lurasitapatwa ‘jakañ churir umat’ oraqpachankir jaqenakajj gratisak umtʼapjjaspa (Apoc. 22:17).

¿KUNJAMSA CONGREGACIONANAKAJJ GASTONAKAPATAK QOLLQE JIKJJATAPJJE?

⁵ Jilat kullakanakajj taqe chuyma donación churapki ukanakampiw congregacionanakan gastonakapajj pagasi. Maynejj qhawqha qollqsa churañapa ukajj janiw khitirus obligaskiti. Jan ukasti tantachasiñ utanakanjja, donación irantañatakejj cajitanakaw utji, ukaruw “kunjamtï chuymapan amtki ukarjam” maynejj irantaspa (2 Cor. 9:7).

⁶ ¿Kunatakis uka qollqejj irtasi? Nayraqatajj Salón del Reinon gastonakapatakiw irtasi. Ukhamarusa ancianonakajj uka donacionanakat mä partjja sucursalar apayañwa amtapjjaspa, ukhamat suma yatiyäwinakajj oraqpachan yatiyasiskakiñapataki. Ukham lurañatakejja nayraqatajj congregacionaw mä resolución lurañapa. Cheqas walja congregacionanakaw ukham lurapjje. Kunanakatakis qollqejj congregacionan munasi uk sapa mayni sum amuyañäni ukhajja, janiw “cajitanakar qollqe irantapjjam” sasin yatiyasiñap suykañäniti.

¿KUNAS DONACIONANAKAMPEJJ LURASI?

⁷ Sapa tantachäwi tukuyarojja, pä jilatanakaw cajitanakat contribucionanak apsupjje, qhawqhas apthapisi uksa anottʼapjjarakiwa (2 Rey. 12:9, 10; 2 Cor. 8:20). Sucursalar apayañataki jan ukajj congregacionan gastonakapatak janïr irtasiñapkamajja, ancianonakaw qollqe sum uñjasiñapatakejj encargasipjje. Qollqe apnaqki uka jilatajja, sapa phajjsi tukuyaw mä informe waktʼayi. Ukat coordinador jilatajja sapa kimsa phajjsi cuentanak sum uñakipasiñapatakiw encargasi.

MÄ CIRCUITON UTJKI UKA GASTONAKATAKEJJ ¿KUNJAMSA QOLLQEJJ JIKJJATASI?

⁸ Mä circuitonkir publicadoranakan donacionanakapaw asambleanakataki ukat yaqha gastonakatak irtasi. Jupanakajj asambleanakanwa cajanakar taqe chuyma irantapjje. Ukhamarus mä circuitonjja gastonakajj utjakipuniniwa, ukatwa congregacionanakajj circuitor mä jukʼa qollqe apayapjjañapa.

⁹ Gastonakatjja circuitonkir jilat kullakanakaw encargasipjjañapa, jiltʼkani uka qollqjja obra mundialatakiw apayjjapjjañaparaki. Ukampis asamblean gastonakapatakitï circuiton cuentapan jan walja qollqejj utjkchi, jan ukajj asambleatak mä lugar alquilañatak jan walja qollqejj utjkchi ukhajja, superintendente de circuito jilataw donacionanak irantapjjañapatak congregacionanakankir ancianonakar amtayaspa. Congregacionapajj qhawqha qollqsa churaspa ukjja ancianonakaw sum amuytʼapjjañapa, ukatjja mä resolucionaw congregacionan lurasiñapa.

¹⁰ Qollqe toqet amtanakar puriñatï wakischi ukhajja, ancianonakaw asamblea de circuito urojj tantachasipjjañapa. Mä circuiton utjki uka qollqetï yaqha gastonakatak irtasini ukhajja, ancianonakaw mä resolución lurapjjañapa. Uka resolucionanjja qhawqha qollqes irtasi ukajj qhana qellqtʼatäñapawa.

¹¹ Superintendente de circuito jilatajja, sapa kuti circuiton cuentap revisasiñapatakiw encargasiñapa.

YANAPTʼA MUNAPKI UKANAKATAKIW QOLLQEJJ IRTASI

¹² Kunjamtï qalltan saniwayktanjja, Jesusampi discipulonakapampejj qollqe imañ cajitanïpjjänwa. Uka qollqet iraqtʼasaw pobrenakar yanaptʼapjjäna (Mar. 14:3-5; Juan 13:29). Jiwasajj ukhamarakiw yanaptʼa munapki ukanakar yanaptʼañasa, kuna laykutejj Jesusajj akham sänwa: “Pobrenakajj jumanakamp chikäskapuniwa” sasa (Mar. 14:7). ¿Kunjamsa yanaptʼsna?

¹³ Awisajja Diosar taqe chuyma servir yaqhep jilat kullakanakajj jilïrëjjapjjewa, yaqhepasti usutäpjjarakiwa, jan ukajj yaqha ukham jan walinakanwa uñjasipjje, ukatwa qollqe toqet yanaptʼa munapjje. Uk yatisajj inas mä familiarasa jan ukajj congregacionankir mä jilatasa jan ukajj mä kullakas yanaptʼchi. Ukham lurasajj aka mandatompiw phoqaski: “Maynitejj aka mundon utjirinïchi, ukampis jilatapar jan kunani uñjkasas jan jupat khuyaptʼaskchejja, ¿kunjamarak jupajj Diosar munasispasti? Munat wawanaka, janiw arumpikisa ni lakampikisa munasiñasäkiti, jan ukasti luratasampi cheqapampi munasiñasawa” (1 Juan 3:17, 18; 2 Tes. 3:6-12). Yanaptʼa munapki uka jilat kullakanakar yanaptʼañajja, Jehová Diosar adorañampi sasirakiwa (Sant. 1:27; 2:14-17).

¹⁴ Uka toqet apóstol Pablojj 1 Timoteo 5:3-21 textonwa sum qhanañchäna. Cheqas taqe cristianow familiapar taqe kunan sum uñjañapa. Ukatwa edadani jan ukajj usuta jilat kullakanakarojj wawanakapa, allchhinakapa, jan ukajj yaqha jakʼa familiaranakapajj yanaptʼapjjañapa. Yaqhep markanakanjja, ayudas sociales jan ukajj gobiernon yanaptʼanakapaw utji, uka yanaptʼa katoqapjjañapatakiw familiaranakapasa jan ukajj jilat kullakanakas yanaptʼapjjaspa. Ukampis walja maranak Diosar servir jilat kullakanakat yaqhepajja, janiw yanaptʼayasiñatakejj familiaranïpkaspati, ni gobiernon yanaptʼapsa katoqapkaspati. Ukhamäspa ukhajj congregacionankirinakaw yanaptʼa munapki uka jilat kullakanakar yanaptʼapjjañapa, kunjamsa yanaptʼapjjaspa uk ancianonakaw amtapjjañapa. Jilat kullakanakatakejja, kunatï munaski ukanakamp mayninakar yanaptʼañajj mä privilegiowa.

¹⁵ Awisajj jilat kullakanakajj guerranakana, terremotonakana, inundacionanakana, manqʼat pistʼañanakana, jan ukajj yaqha ukham jan walinakanwa aka qhepa urunakan uñjasipjje, ukatwa yanaptʼa munapjjaspa (Mat. 24:7-9). Ukhaman uñjasirinakarojj inas congregacionanakajj jan yanaptʼañ puedipkchispati. Ukampis Cuerpo Gobernantew jan walin uñjasirinakar yanaptʼapjjañapatakejj yaqha cheqankir jilat kullakanakar mayispa. Niya ukhamaw nayra tiempon pasarakïna, Asia Menor toqenkir cristianonakajja, Judea markan manqʼat pistʼañajj utjkäna ukhajj manqʼañanakwa jilat kullakanakapatak apayapjjäna (1 Cor. 16:1-4; 2 Cor. 9:1-5). Jupanakat yateqasis mayninakar yanaptʼtan ukhajja, jilat kullakanakasar munasitasa, Jesusan cheqpach arkiripätaswa uñachtʼaytanjja (Juan 13:35).

BIBLIAT APSTʼAT QELLQATANAKAW LAKIRASI

¹⁶ Diosan Reinopat yatiyañatakejj Biblianaka, Bibliat apstʼat qellqatanakaw munasi. Jilapartejja, ancianonakajj mä siervo ministerialaruw qellqatanakat encargasiñapatak mayipjje. Jilatajj uka luräwip wali valoranitwa uñji, ukatwa inventario lurañatak chʼamachasi, ukhamat jan kuna qellqatas congregacionan faltañapataki.

¹⁷ Kunanaktï lurañ yatktan ukasa, tiemposasa, yänakasasa, vidasas Jehová Diosan regalopawa. Uka toqet Jesusajj akham sänwa: “Gratisakiw katoqapjjtajja, gratisakirak churapjjam” sasa (Mat. 10:8). Niyakejjay Jehová Diosar jakañ vidas katuyasstanjja, taqe kun jupat katoqatasat jupar jachʼañchañatakiw chʼamachasiñasa (Luc. 17:10; 1 Cor. 4:7). Kunatï jiwasatak wali valoranïki ukanakamp Jehová Diosar jachʼañchtan ukhajja juparuw kusisiytanjja, qhawqsa jupar munastan, serviñs munaraktan uksa uñachtʼayaraktanwa (Prov. 3:9; Mar. 14:3-9; Luc. 21:1-4; Col. 3:23, 24). Jiwasatï jakañ vidas Jehová Diosar katuyañäni, taqe kunatï utjkistu ukanakamp jupar jachʼañchañäni ukhajja, wali kusisitaw jikjjatasiñäni (Hech. 20:35).