¿Kunatsa suma uñnaqtʼanïñat wal llakistjja?

¿KUNSA JUMAJJ LURASMA?

Julia tawaqot amuytʼañäni. Jupajj espejot uñkattʼasisajja, wali likʼïkaspas ukhamwa amuyasi. Ukatwa akham sasin amuytʼi: “Janiw akham likʼïñajajj walïkiti, rebajañajawa” sasa. Awk taykapasa amigonakapas ‘walikïsktawa’ sapkchisa, jupajj janiw ukham amuyaskiti.

Kunsa jan likʼëjjañatakejj luraspa ukwa Juliajj pasïr phajjsinakatpach wal lupʼiski. Jupatï mä qawqha urunak jan manqʼjjaspa ukhajja, inas jan likʼëjjchispati.

Jumatï ukhaman uñjasisma ukhajja, ¿kuns lurasma?

NAYRAQAT SUM AMUYTʼASIM

Suma uñnaqtʼanïñat llakisiñajj walikïskiwa. Bibliajja, suma uñnaqtʼani walja chachanakata, warminakatwa parli, sañäni: Sara, Raquel, Abigail, José ukat David jupanakajj suma uñnaqtʼanïpjjänwa. Abisag sat warmisa, ‘suma uñnaqtʼanïnwa’ sasaw Bibliajj qhanañchi (1 Reyes 1:4, NM).

Ukampis walja wayn tawaqonakajja, suma uñnaqtʼanïñatakwa llakisisipki. Ukham sinti llakisisajja, jan walinakaruw puripjjaspa. Aka toqet amuytʼam:

• Estados Unidos markan uka toqet jisktʼaskäna ukarjamajja, sapa patakat 58 tawaqonakaw likʼïpkaspas ukham amuyasipjjäna, ukampis 17 tawaqonakakiw cheqapun ukhamäpjjäna.

• Jan likʼïpkäna uka tawaqonakaruw jisktʼasirakïna, sapa patakatjja, 45 tawaqonakaw likʼïpkaspas ukham amuyasipjjäna.

• Jan likʼïñatak wal chʼamachasipki uka wayn tawaqonakat yaqhepajja, anorexia sat usumpiw usuntapjje. Uka usuninakajj jan manqʼañ munjjapjjatap laykojj jiwañar kunaw puripjjaspa.

Inas jumajj anorexia sat usu jan ukajj yaqha ukham jan wali usunïtam amuyasta, ukhamächi ukhajja, jankʼakiw yanaptʼa mayiñama. Awk taykamaru jan ukajj yaqha jilïr jaqeruw yatiyasma. Bibliajj akham siwa: “Mä amigojj taqe horasan munasiripuniwa; llakisiñansti mä jiljamaw chuymachasi” sasa (Proverbios 17:17).

¿KUN LURAÑAMAS JUKʼAMP ASKÏSPA?

Suma uñnaqtʼanïñat sipansa, kunjam jaqëtansa ukaw jukʼamp askejja. David reyin Absalón sat yoqapatjja, Bibliajj akham siwa:

“Janirakiw Absalonar uñtata yaqha jaqejj utjkänti, ukham wali suma waynätapatsti wali jachʼañchatarakïnwa. [...] Jupajj wali suma uñnaqtʼani waynänwa” sasa (2 Samuel 14:25).

Ukampis Absalonajj wali jachʼa jachʼa tukuri, jupatakik taqe kuns muniri, aljantasiri waynänwa. Ukatwa jan wali jaqet uñtʼatäna. Jupajj jaqe masipar jaytjiri, uñisiri, jaqe jiwayiri ukhamänwa sasaw Bibliajj qhanañchi.

Ukatwa akham ewjjtʼistu:

‘Jakäwiman machaqat isthapisipjjam’ (Colosenses 3:10).

“Jumanakan kʼachachasiñanakamasti jan patjjatakïkpati [...], jan ukasti suma chuymanïpjjam, ukaw jan tukuskiri, suma munkañajja” (1 Pedro 3:3, 4).

Suma uñnaqtʼanïñat llakisiñajj walikïskiwa, ukampis suma chuymanïñatak chʼamachasiñaw jukʼamp wakiskirejja. Tiempompejja, jaqenakajj kunjam chuymanïtasa ukwa jukʼamp amtapjjani, janiw suma uñnaqtʼanïtati janicha uk amtapkaniti. Phylicia tawaqojj akham siwa: “Inas suma uñnaqtʼanïtamat yaqhanakajj uñchʼukipjjchïtam, ukampis kunja suma chuymanïtas ukwa jaqenakajj jukʼamp amtapjjani” sasa.

SUM AMUYKIPTʼASIM

¿Jumatakejj cuerpomas uñnaqamas walikïskiti?

¿Jan likʼintañataki jan manqʼjjaña, jan ukajj suma uñnaqtʼanïñataki operayasiñ amtirïtati?

Askichtʼasiñajj amparamankaspa ukhajja, ¿kunanaksa askichtʼasisma? (Ukanak chimptʼasim.)

• NAYRA

• NASA

• ÑIKʼUTA

• LAKA

• CUERPO

• JAÑCHI

Inas nayrïr pä jisktʼarojj “jïsa” sasin chimptʼaniwaysta, kimsïr jisktʼanjja inas kimsa jan ukajj jilsa chʼimptʼawayaraksta, ukhamächi ukhajja, ak amuytʼasim: Mayninakajj janiw jumjam amuyapkpachati. Awisajj jan amuyasisakiw cuerposat uñnaqasat sinti llakissna (1 Samuel 16:7).