5 JISKTʼA

Colegion jiskʼachat uñjasirista ukhajj ¿kunsa luriristjja?

¿KUNATSA UK YATIÑAJJ WAKISI?

Kuntï lurkäta ukajj yanaptʼiristamwa jan ukajj jukʼampiw jan waltʼayiristam.

**¿KUNSA JUMAJJ LURASMA?**

Tomás waynitut amuytʼañäni. Jupajj janiw escuelar sarañ munjjeti, ¿kunatsa? Niya kimsa phajjsinak nayraw mä qawqha masinakapajj jupat jan walinak taqenir parlapjjatayna. Ukat kunaymanwa sutichapjjarakitayna. Awisajja, aleqat nuktʼasaw libronakap jaqtasiyapjjerïna, ukat janis lurañ munapkaspäna ukhamakwa tukupjjerïna. Awisasti, jupanakat mayniw qhepäjjat nuktʼirïna, khitis nuktʼi uk yatiñataki uñtasirïna ukhajja, jan kunakiw taqenis tukupjjerïna. Wasürojj jukʼamp jan walinwa Tomás waynitojj uñjasiwayi, Internet toqew jupar jan wal lurañatak ajjsarayapjjäna...

Jumatï Tomás waynitüsma ukhajja, ¿kuns lurasma?

NAYRAQAT SUM AMUYTʼASIM

Jan nuwasisakiw jarkʼaqasisma, ¿kunjamsa uk lurasma?

JAN JUPANAKAR YÄQAMTI. Bibliajj akham siwa: “Jan amuytʼan jaqejj mäkiwa kunatsa colerasi, ukampis yatiñan jaqejja colerasiñapjja mäkiwa apanuku” sasa (Proverbios 29:11). Jiskʼachapktam uka wayn tawaqonakar jan yäqkäta ukhajja, jupanakajj jumat jitheqtjjapjjaspawa, janiw jumat sawkasjjapjjaspati, ni jiskʼachjjapjjeristamsa.
JAN UKHAMAT UKHAM KUTTʼAYAMTI. Bibliajj akham siwa: “Janiraki ñanqhat ñanqha kuttʼayapjjamti” sasa (Romanos 12:17). Ukhamat ukham kuttʼayañajj jukʼamp jan waliruw puriyiristam.
JAN WALTʼAYIRINAKAT JITHEQTJJAM. Bibliajj akham siwa: “Chʼikhi jaqejj jan waltʼaña uñjasinjja jaltjjewa” sasa (Proverbios 22:3). Jan waltʼayapkiristam uka cheqanakatsa, jan wali jaqenakatsa jitheqtjjañamawa.
SUMA ARUNAKAMP JAYSAM. Bibliajj akham siwa: “Suma arumpi kuttʼayañajja colerañjja apaqewa” sasa (Proverbios 15:1). Kusisit chuymanïñaw yanaptʼiristamjja. Akham amuytʼañäni, maynitï ‘likʼïtawa’ siristam ukhajj inas akham sischisma: ‘Jïsa, ukhamäskapuniwa. Mä jukʼa rebajañajajj wakisispawa’ sasa.
SARJJAÑAMAWA. 19 marani Nora sat tawaqojj akham siwa: “Jan chʼajjwasaki sarjjatamajja, sum amuytʼasiri, jan ajjsariri, jan jankʼak colerasiri jaqëtamwa uñachtʼayi. Yaqhanakar jiskʼachir wayn tawaqonakajj janiw ukhamäpkiti” sasa (2 Timoteo 2:24).
JAN JUMA PACHPAT PÄCHASIMTI. Jiskʼachir wayn tawaqonakajja, khitinakas jupa pachpat pächasipjje, ajjsarirjamäpjje uk amuyapjjewa. Ukampis jupa pachpat jan pächasipki ukanakarojj janiw kamsapkisa.
YAQHANAKAR YATIYAM. Mä yatichirejj akham siwa: “Khitinakas jiskʼachapjje uk wayn tawaqonakajj janiw imtʼapjjañapäkiti. Ukhamatakwa mayninakarus yanaptʼapjjaspa” sasa.

Jupa pachpat jan pächasiri mä waynitojj jan ajjsarasaw jiskʼachiripar saykataski — Juma pachpat jan pächasiñaw chʼaman saytʼasiñatak yanaptʼätam, yaqhanakar jiskʼachirinakajj janiw chʼamanïpkiti.

**¿KUNJAMSA AKANAKAT QHANAÑCHTʼASMA?**
¿CHEQATI JAN UKAJJ KʼARICHA?	QHANAÑCHÄWINAKA
1 Nayra maranakatpachaw yaqhanakar jiskʼachir jaqenakajj utjäna.	1 Cheqa. Bibliajj nefilim jaqenakatwa parli, uka arojj “tukjiri” jan ukajj “yaqhanakar tinkuyiri” sañwa muni (Génesis 6:4).
2 Maynir jiskʼachañasa, jupat sawkasiñas janiw jan walipunïkiti.	2 Kʼari. Ukhamanakan uñjasisaw walja wayn tawaqonakajj jupanak pachpa jiwayasipjje.
3 Nuwasisakiw jiskʼachir wayn tawaqonakat jarkʼaqasisma.	3 Kʼari. Jiskʼachir wayn tawaqonakajj jukʼamp chʼamanïpjjaspawa, ukhamajj janiw jupanakamp nuwaskasmati.
4 Maynir jiskʼachir uñjäta ukhajja, janis uñjkasma ukhamaw tukjjañama.	4 Kʼari. Uñjasin jan yatiykäta ukhajja, jumas juchanirakïsmawa. Maynir yanaptʼañat sipansa, jukʼampikiw jan waltʼayasma.
5 Jiskʼachir wayn tawaqonakajj jupanak pachpatwa pächasipjje, ukatwa mayninakaruk jiskʼachapjje.	5 Cheqa. Jiskʼachirinakajj wali khusäpkaspas ukham amuyasipjje, ukampis jila partejj jupanak pachpatwa pächasipjje, ukatwa sum jikjjatasiñatakejj mayninakar jiskʼachapjje.
6 Jiskʼachirinakajj jan wali luräwinakap jaytapjjaspawa.	6 Cheqa. Maynin yanaptʼapampejja, jiskʼachirinakajj jan wali amtanakapsa luräwinakapsa jaytapjjaspawa.