Diosajj mä milagro Mar Rojo qotan luräna

Israelitanakajj Egiptot sarjjapjjänwa, uk yatisajj faraonajj jupanakar khitjjatapat wal arrepentisïna. Ukatwa soldadonakapar akham säna: ‘Guerran nuwasiñatak carronak taqpach wakichtʼapjjam, israelitanakar arktañäni. Jupanakar libre khitatasajj janiw walïkiti’ sasa. Ukatsti faraonasa, soldadonakapas israelitanakaruw arktapjjäna.

Jehová Diosaw markaparojj irpaskäna, urojj mä qenayampiw irpäna, arumasti mä ninampiw irparakïna. Mar Rojo sat qotar puriyasajja, akawjar carpanakam saytʼayapjjam sarakïnwa.

Israelitanakajj faraonampi soldadonakamp jutapjjatap amuyasajj janiw kawkir escapañsa puedipkänti. Mä toqetjja qotaw jarktʼanïna, maysa toqetsti faraonampi soldadonakapampiw jutapjjäna. Ukatwa Moisesar akham sapjjäna: ‘¡Jiwarañäniwa! ¿Kunatsa Egipto markat irpsunipjjesta?’ sasa. Moisesasti sarakïnwa: ‘Jan ajjsarapjjamti. Suytʼapjjam, kunjamsa Jehová Diosajj salvistani uk uñjapjjarakim’ sasa. ¿Qhawqsa Moisesajj Diosar confiyäna uk amuyasmati?

Qhepatsti sarjjañatak wakichtʼasipjjam sasaw Jehová Diosajj israelitanakar säna. Uka arumajja, Jehová Diosajj mä qenaywa egipcionakampiru israelitanakampir jaljtayañatak uchäna. Egipcionak toqenjja chʼamakänwa, israelitanak toqensti qhanarakïnwa.

Jehová Diosajj ‘amparam qota toqer loqtam’ sasaw Moisesar säna. Thayajj arum paqaraw wal thaytʼäna. Mar Rojo qotajj payaruw jaljtäna, qota taypejj thakëjjarakïnwa. Walja israelitanakaw waña oraqnam paskatapjjäna. Uksats aksats umajj perqjamaw saytʼäna.

Faraonan soldadonakapajj qota taypin waña oraqëkäna uknamwa israelitanakar arktapjjäna. Ukampis Jehová Diosaw egipcionakar jan waltʼayäna. Carronakapan ruedanakapas jalstjjarakïnwa. Ukatwa soldadonakajj akham sasin arnaqasipjjäna: ‘¡Akat escapjjañäni! Jehová Diosaw markap laykojj jiwas contrajj nuwasiski’ sasa.

Diosajj Moisesar akham sänwa: “Mar Rojo qota toqer amparam loqtam” sasa. Loqtäna ukhasti uma perqanakajj egipcionakarojj qʼal chhaqtayäna. Faraonas soldadonakapas taqeniw jiwarapjjäna.

Qota khurkatansti, taqeniw Jehová Diosarojj mä cancionamp jachʼañchapjjäna. Akham sasaw cantapjjarakïna: ‘Jehová Diosaruw nayajj cantäjja, jupajj wali jachʼañchatawa. Jupajj caballorusa caballot saririrus qotaruw jaqonti’ sasa. Diosan markapajj cantasipkäna ukhajja warminakajj thoqtʼasisaw panderetanakap tuktʼapjjäna. Cheqapun librëjjasajj taqeniw wal kusisipjjäna.