Soldadonak pʼeqtʼirimpi israelit jiskʼa imillampi

Siria markanjja, israelit mä jiskʼa imillaw utjäna. Jupajj utapatsa familiapatsa wali jayankänwa. Sirionakan soldadonakapaw uka markar apapjjäna. Ukanwa soldadonak pʼeqtʼiri Naamán chachan warmipar servïna. Jakapkäna uka utankir jaqenakatjja, uka jiskʼa imillakiw Jehová Diosar adoräna.

Naamán chachajj cuerppachar llaganakanïnwa, ukajj wal usurakïna. Israelita jiskʼa imillajj yanaptʼañ munasaw Naamán chachan warmipar akham säna: ‘Mayniw esposomar waliptayaspa. Israel markanjja Jehová Diosan mä profetapaw utji, jupajj Eliseo satawa. Jupaw qollaspa’ sasa.

Esposapajj ukwa Naamán chachar yatiyäna. Jupasti qollasiñ laykojj taqe kun yantʼañ munäna, ukatwa Eliseon ukarojj Israel markar saräna. ‘Eliseojj wali yäqat jaqerjamaw sum katoqetani’ sasaw Naamán chachajj amuyäna. Ukampis Eliseojj janiw mistunkänsa, serviriparuw akham sañapatak khitanïna: ‘Jordán jawirar saram, paqallq kuti ukan jarisirakim. Ukhamatwa qollasjjäta’ sasa.

Ukajj Naamán chacharojj janiw gustkänti, ukatwa akham säna: ‘Eliseo profetajj Diosapar artʼasisa, amparanakap wali musparkañ aynaqasaw qollitani sayätwa. Israelankir jawirar saram sakirakitusä. Siria markan jukʼamp suma jawiranakaw utjistu. ¿Janit uka jawiranakan jariskiristjja?’ sasa. Wali colerataw Eliseon utapat sarjjäna.

Naamán chachan servirinakapajj sum amuytʼasiñapatakiw yanaptʼapjjäna. Akham sapjjarakïnwa: ‘¿Janit qollasiñ laykojj kuns lurkasma? Kuntï uka profetajj mayktam ukajj janiw chʼamäkiti. ¿Janit mayitaparjam lurkasma?’ sasa. Naamán chachajj jupanakar istʼasaw Jordán jawirar saräna, paqallq kutiw ukan jarisirakïna. Paqallqöri kutinjja, suma qollataw umat mistjjäna. Wali kusisitapunïnwa, Eliseor yuspärañatakiw utapar kuttʼäna. Akham sarakïnwa: ‘Jichhaw yatta, Jehová Diosaw cheqa Diosajja’ sasa. Naamán chachajj jan usutakiw utapar purjjäna. Uk uñjasajj ¿janit israelita jiskʼa imillajj wal kusiskpachäna?