Janiw estatuar adorapkänti

Nabucodonosor reyejj mä estatuampi samkaskäna uka qhepatjja, mä jachʼa estatua qorit lurayäna. Dura sat pamparuw ucharakïna. Ukarusti taqpach importante jaqenakaruw tantachthapïna. Sadrac, Mesac, Abednego waynanakarus jawsayarakïnwa. Reyisti akham sänwa: ‘Kunapachatejj jumanakajj trompetan phustʼasitapa, arpa, gaita sat instrumentonakan tuktʼasitap istʼapjjäta ukhajja, taqeniw oraqer puriñkam altʼasipjjañama. Khititï jan munkani ukajj parintat hornor jaqontatäniwa’ sasa. ¿Kimsa hebreo waynanakajj uka idolor adorapjjpachänti, jan ukajj Jehová Diosarukich adorapjjpachäna?

Reyejj music tuktʼasiñap mayïna ukhajja, taqe jaqenakaw estatua nayraqatan qonqortʼasisajj adorapjjäna. Sadrac, Mesac, Abednego waynanakakiw jan adorapkänti. Uk amuyasajj yaqhepajj akham sasaw reyir sapjjäna: ‘Aka kimsa hebreonakajj janiw estatuamar adorapkiti’ sasa. Nabucodonosor reyejj uka kimsa waynanakar jawsayasajj akham sänwa: ‘Estatuar adorapjjañamatakejj aka mä kutimpi mayipjjäma, janitï adorapkätajja hornoruw jaqontapjjäma. Janiw kuna diosas nayan amparajat salvapkätamti’ sasa. Jupanakajj sapjjänwa: ‘Mayampi mayipkitäta ukhas janiw adorapkäti. Diosajaw nanakar salvasipkitani. Janis salvapkchitanejja, janipuniw uka estatuar adorapkäti’ sasa.

Nabucodonosor reyejj wal colerasïna. Servirinakapar akham sänwa: ‘¡Qhawqhatï hornojj parintayañäki ukat sipansa, paqallq kutimp parintayapjjam!’ sasa. Ukatjja soldadonakapar akham sänwa: ‘Aka jaqenakar ñachʼantasin hornor jaqontanipjjam’ sasa. Kimspachaniruw hornor jaqontapjjäna. Hornojj wali paripunïnwa, ukar jakʼachasir soldadonakas jiwarapjjänwa. Nabucodonosor reyejj hornor uñtäna ukhajja, pusiniruw sarnaqaskir uñjäna. Walpun sustjasïna, yanapirinakaparus akham jisktʼäna: ‘¿Janit kimsaniru jaqontktanjja? Nayajj pusiniruw uñjta, ¡maynejj mä angeläkaspas ukhamawa!’ sasa.

Nabucodonosor reyejj jukʼamp hornor jakʼachasisajj akham sasaw artʼäna: ‘¡Alajjpachankir Diosan servirinakapa, mistunjjapjjam!’ sasa. Sadrac, Mesac, Abednego waynanakajj jan kuna kamachtʼat mistunipjjäna ukhajja, taqeniw wal musparapjjäna. Janiw jañchinakapasa, ni ñikʼutanakapasa, ni isinakapas nakharatäkänti, janirakiw nina ninas thujsapkänti.

Nabucodonosor reyejj akham sänwa: ‘Sadrac, Mesac, Abednego waynanakan Diosapajj wali jachʼawa. Angelap khitanisaw jupanakar salvawayi. Janiw jupanakanjam Diosapjamajj yaqha diosajj utjkiti’ sasa.

Kunas paskchïnjja, uka kimsa hebreonakajj Jehová Dios saparukiw serviñ amtapjjäna, ¿jumajj ukham lurañ munarakismati?