Jesusajj 12 apostolonak ajlli

Jesusajj niya mara chikataniw predikjjäna, ukapachaw mä wakiskir amtar puriñapäna. ¿Khitinakarus jupamp chika predicañapatakisa, congregacionan pʼeqtʼañapatakisa ajlliñapäna? Janïr uk amtkasajj Jehová Diosaruw yanaptʼa mayisïna. Ukatwa mä qollur sapak sarasajj arum paqar orasïna. Qhepür alwasti Jesusajj mä qhawqha discipulonakaparuw tantachthapïna, jupanak taypitjja 12 apostolonak ajllirakïna. ¿Jupanakan sutinakap amttati? Sutinakapajj akanakawa: Pedro, Andrés, Santiago, Juan, Felipe, Bartolomé, Tomás, Mateo, Alfeon yoqapäki uka Santiago, Tadeo, Simón, Judas Iscariote.

Uka 12 apostolonakajj Jesusampiw sarnaqapjjäna. Jupanakarojj predicañwa Jesusajj yatichäna, qheparojj jupanak saparukiw predikir khitjjäna. Jehová Diosajj chʼamapwa jupanakar churäna, ukhamat demonionak alissupjjañapataki, usutanakarus qollapjjañapataki.

Jesusajj ‘amigonakaja’ sasaw 12 apostolonakapar sirïna, wal jupanakar confiyarakïna. Apostolonakajj janis suma yatjjatatäpkaspa, aleq jaqenakakïpkaspasa ukhamwa fariseonakajj amuyapjjäna. Ukampis Jesusajj janiw ukham amuykänti. Jesusajj sum jupanakar yatichäna. Jupanakaw walins jan walins Jesusar compañapjjañapäna. Amuytʼañataki, janïr jiwkäna ukhasa jiwatat jaktanjjäna ukhas jupanakaw compañapjjäna. Niya taqeniw Galileatäpjjäna, Jesusas uksan jakirirakïnwa. Yaqhep apostolonakapajj casadöpjjänwa.

Apostolonakajj pantjasir jaqenakäpjjänwa. Awisajj jan amuytʼasisaw parlapjjäna, jan pacienciampiw kuns lurapjjäna, awisasti janirakiw suma amtanakar puripkänti. Awisajj khitis jukʼampi jilïrejj uka toqetwa jiskhisipjjäna. Ukampis Jehová Diosar munasir suma jaqenakäpjjänwa. Jesusajj alajjpachar kuttʼjjäna uka qhepatjja, jupanakampiw cristiano congregacionajj qalltäna.