Jesusan qollun yatichatapa

Jesusajj 12 apostolonakapar ajllkäna uka qhepatjja, qollut saraqanisajj walja jaqenakajj tantachatäsipkäna ukaruw saräna. Uka jaqenakajj Galilea, Judea, Tiro, Sidón, Siria lugaranakatwa jutapjjäna, Jordán jawir khurkatatsa jutapjjarakïnwa. Jesusan ukarojj usutanaka, demonion mantat jaqenakwa apanipjjäna. Jupajj taqeniruw qolläna. Ukatsti qollur makatasaw qontʼasïna ukat jaqenakar yatichañwa qalltäna. Diosan amigopäñatakejj kunsa lurañasa ukwa qhanañchäna: ‘Jehová Diosan yanaptʼapampikiw sum jakassna uk amuyasiñasawa, juparojj munasiñasarakiwa. Ukampis jaqe masisar jan munasksna ukhajj janiw Diosar munasksnati. Taqeniruw suma chuymampi cheqaparu uñjañasa, enemigonakasarus ukhamaraki’ sasaw yatichäna.

Jesusajj akham saskakïnwa: ‘Janiw amigonakamarukejj munasipjjañamäkiti, jan ukasti enemigonakamarus munasipjjañamarakiwa, chuymatpachwa perdonapjjañama. Maynitejj jumatak coleratächejja, jankʼak jupan ukar sarasin perdón mayisinim. Kunjam uñjatäñsa munasma ukhamarak mayninakar uñjam’ sasa.

Kunanakatï utjkistu ukanak toqetjja, Jesusajj suma ewjjtʼanakwa churarakïna. Akham sänwa: ‘Qollqenïñat sipansa, Jehová Diosan amigopäñaw jukʼamp wakiskirejja. Qollqemjja lunthataw apaqeristam, ukampis Jehová Diosan amigopäñ janiw khitis apaqkiristamti. Ukhamajj jan manqʼatsa, umatsa, isitsa sint llakisimti. Jamachʼinakat amuytʼam, Diosaw jupanakarojj manqʼ churi. Wals llakiskchïtajja, janiw walja tiempo jakkätati. Jakañatakejj kunas wakisi ukjja Jehová Diosajj sum yati uk janipun armasimti’ sasa.

Jaqenakajja Jesusjam suma yatichirirojj janipuniw kunapachas istʼapjjerïkänti. Religión pʼeqtʼirinakajj janiw uka yatichäwinak yatichapjjerïkänti. ¿Kunatsa Jesusajj wali sum yatichäna? Kuna laykutejj taqe uka yatichäwinakajj Jehová Diosatwa jutäna.