LECCIÓN 102
Apóstol Juanajj visionanak uñjäna
Apóstol Juanajj Patmos sat islan presot katuntatäskäna ukhajja Jesusajj jutïr urunakat parlir 16 visionanakwa uñjayäna. Ukanwa apóstol Juanajj kunjamsa Jehová Diosan sutipajj santor tukuyatäni, kunjamsa Reinopajj jutani, kunjamsa munañapajj alajjpachansa aka oraqens lurasini ukanakwa uñjäna.
Mä visionanjja, Jehová Diosan alajjpachankir tronopwa Juanajj uñjäna. 24 ancianonakamp muyuntatänwa. Jupanakajj janqʼo isinïpjjänwa, qori coronanïpjjarakïnwa. Tronotjja lliju llijunakaw mistüna, qʼejjo qʼejjonakjamaw ukan suynarakïna. 24 ancianonakajj Jehová Dios nayraqatan pʼeqenakap altʼasisaw adorapjjäna. Yaqha visionanjja, Juanajj Jehová Diosar adoraskiri walja jaqenakaruw uñjarakïna. Jupanakajj kunayman markatäpjjänwa, kunayman arunak parlapjjarakïna. Jupanakarojj Corderowa, mä arunjja Jesusaw uñjaskäna, jakañ churir umaruw irpaskarakïna. Qhepat yaqha visionanjja Jesusajj Reyjamaw 24 ancianonakamp alajjpachan apnaqañ qalltäna. Ukjjarojj yaqha visión apóstol Juanajj uñjarakïna, ukanjja Jesusajj Dragonampi, mä arunjja Supayampi demonionakampiw nuwasïna. Jesusajj jupanakar atipjasajj aka oraqeruw jaqoqanïna.
Yaqha visionanjja Corderoruw 144.000 ajllitanakamp Sión qollu patjjan saytʼat uñjäna. Ukatjja mä angelaruw aka oraqpachan jalnaqaskiri uñjarakïna, uka angelajj ‘Diosar ajjsartʼapjjam, jachʼañchapjjarakim’ sasaw jaqenakar säna.
Yaqha visionanjja Armagedón sat guerra uñjarakïna. Uka guerranjja Jesusampi ejercitopampejj Supayan jan wali mundoparuw atipjapjjäna. Qhep qhepa visionanjja, alajjpachansa aka oraqensa sumankañan mayachtʼat jakasiñ utjatapwa uñjarakïna. Supayampi arkirinakapampejj qʼala tʼunjatäjjapjjänwa. Alajjpachansa aka oraqensa taqeniw Jehová Diosan sutiparojj santot uñjapjjäna, jupa saparukiw adorapjjarakïna.
“Jumampi warmimpirojja enemigo tukuyapjjäma, juman wawamampi jupan wawapampirojja enemigo tukuyarakëjja. Warmin wawapajja pʼeqetwa jumarojj takjjatätam, jumasti kayu talonatwa juparojj achjarakïta” (Génesis 3:15).