LECCIÓN 14

Wakiskir puntonak qhanstayaña

Hebreos 8:1

¿KUNSA LURAÑAMA? Kuna toqetsa parläta ukajj qalltat tukuykamajj qhanäñapawa. Parlkäta uka puntonakajj kunjamsa arstʼäwimar yanaptʼaraki, ukat kunatsa uka toqet arstʼaskta ukajj qhanäñapawa.

¿KUNJAMSA UK LURASMA?

Kunatsa uka toqet parlañajj wakisi uk amtam. Kunsa arstʼäwimampejj yatichañ munta ukwa amuytʼañama. ¿Istʼirinakarojj chʼamañchtʼañti, qhanañchañti, jan ukajj yatiyañti munta? Wakichtʼaskasajja, uka toqenakatwa lupʼiñama. Kawknïr puntonakattï parlkäta ukanakajja, arstʼäwimarojj yanaptʼañapawa.

Akham sas jisktʼasim: “Parlkä uka toqetjja, ¿kunanaksa jaqenakajj jisktʼapjjetaspa? ¿Kawknïr jisktʼanaksa nayraqat jisktʼapjjetaspa?” sasa. Ukjjarojja, arstʼäwim ukarjamaw wakichtʼasiñama. Ukhamtï lurätajja, istʼirinakajj arstʼäwim sum amuyapjjani, kuntï yatichkäta ukarus iyawsapjjarakiniwa.
Kuna toqetsa parläta uk qhanstayam. Arstʼkäta ukhajja, kuna toqetsa arstʼaskta ukajj qhanäñapawa, uka toqet parlir arunaksa kutin kutinwa sañamaraki.
Qhana ukat fácil amuykañ wakiskir puntonak qhanañcham. Qhawqha tiempontï arstʼañamäki, ukarjamaw kuna puntonakatsa parläta uk amtjjañama, ukanakajja arstʼäwimar yanaptʼañapawa. Mä qhawqha wakiskir puntonakatakwa parltʼañama ukat sum qhanañchañamaraki. Mä puntot parlasajj janiw mäki yaqha toqet parlañamäkiti.

Istʼirinakan sum amuyapjjañapatakejja, arstʼañ qalltkäta ukhaw wakiskiri puntonak arsusma. Arstʼäwim tukuykäta ukhajj mayampiw uka wakiskir puntonak arsurakisma, ukham lurasaw jan armasipjjañapatakejj istʼirinakar yanaptʼäta.