Jesusan yatichäwinakapa

Diosan Apnaqäwipa

¿Kunasa?

Uraqpach apnaqkani uka gobiernowa. Jesusax akham sänwa: “Jumanakax akham mayisipxätaxa: ‘[...] Munañamampisti apnaqapxita. Munañamasti luratäpan akapachanxa, kunjämatï alaxpachana luratäki ukhama’” sasa (Mateo 6:9, 10, NM; Daniel 2:44).

¿Khitinakas apnaqapxani?

Jesusaw uka Apnaqäwin apnaqiripjamax yurïna. Akham sasaw mamapar mä angelax satayna: “Tatituw juparux reyit uttʼayani nayra Davidarjama, [...] apnaqañapax janipuniw tukuskaniti” sasa (Lucas 1:30-33). Ukatxa jupamp chika apnaqapxañapatakiw mä qhawqhanir Jesusax ajlliraki, ukatwa arkirinakapar akham säna: “Jumanakax nayamp chikäsipkapuntawa tʼaqhisiñanakaxanxa. Ukatwa nayax jumanakarux mä reino churapxsma, kunjämatï Awkixax nayar churkitu ukhama” sasa (Lucas 22:28, 29; Daniel 7:27). Taqpachanixa, 144.000 ukha arkirinakapaw Jesusamp chika apnaqapxani (Apocalipsis 5:9, 10; 14:1).

¿Kawkinkisa?

Diosan Apnaqäwipax alaxpachatwa apnaqanini. Jesusax akham sasaw arkirinakapar säna: “[Alaxpachar] sarasinsti ukat mä utjäw wakichasinxa, wasitampiw jutä jumanakaru irpasxañataki, kawkhankkätï nayax jumanakax ukkhankapxañamatakiraki. [...] Awkixax kawkinkkitix [ukaruw saraskta]” sasa (Juan 14:2, 3, 12; Daniel 7:13, 14).

¿Kunsa jan walinakampix lurani?

Jesusax jan wali jaqinakaruw aka Uraqit qʼumachani. Jupa pachpat parlkasax akham sänwa: “Kunapachatix Jaqin Yuqapax reyjama jutkani ukapachaxa, angelanakapampi muyuntataw jupax quntʼasini tronoparuxa taqi chʼaman kankañapampi. Taqi markanakankir jaqinakarakiw jupan nayraqataparux tantachtʼasipxani. Jupasti jupanakarux jaljarakiniwa [...]. Wiñay tʼaqhisiñaruw [ñanqha jaqinakax] sarapxarakini, aski jaqinakasti wiñay jakañarurakiw sarapxani” sasa (Mateo 25:31-34, 46).

¿Khitinakas uka Apnaqäwin apnaqata aka Uraqin jakasipxani?

Jesusax akham sarakïnwa: “Kusisiñanïpxiw llampʼu chuymaninakaxa, jupanakarakiw Diosan arsutaparjama uraqi katuqapxani” sasa (Mateo 5:5; Salmo 37:29; 72:8). Aka suma Uraqixa jupanakkam munasir jaqinakampi phuqantatäniwa. Ukat akham sasarakiw Jesusax arkirinakapar säna: “Machaq mandamientwa churapxsma: Maynit maynikama munasipxam. Kunjämtix nayax munasipxsma, ukhama jumanakax maynit maynikam munasipxañamarakiwa. Jumanakatix maynit maynikama munasipxätaxa, taqiniw amuyapxani nayan discipulonakaxäpxatama” sasa (Juan 13:34, 35).

¿Kunsa jaqinakataki lurani?

Jesusax taqi kasta usunakwa chhaqtayani. Aka Uraqinkkasaxa “Diosan reinopat yaticharakïna, ukhamarak usutanakarus kʼumaraptayarakïna” (Lucas 9:11). Jaktanit Jesusar uñjasaw chuymankipstat Juan sat apostolax akham sarakïna: “Uñjaraktwa machaq alaxpachampi, machaq uraqimpi. [...] Ukatsti mä jachʼa aru istʼarakta alaxpachat artʼasiniri: ‘¡Akaxay, Diosax jichhax [jaqinakampiwa] [...] Diosax taqi jachanakapwa nayranakapatxa picharani, janirakiw jiwañas [...] utjkxaniti’” sasa (Apocalipsis 21:1-4).

Diosan Apnaqäwipaw aka Uraqinxa Paraíso uttʼayani. Jesusamp chika jiwiri mä jaqiw jupar akham achiktʼasitayna: “Taqi markanak apnaqkäta ukkhax nayat amtʼasitätawa” sasa. Ukat Jesusax jupar akham sarakïnwa: “Chiqpachawa [jichhürpacha, NM] sisma, [...] jumax nayampi chika[w] paraisonkxäta” sasa (Lucas 23:42, 43; Isaías 11:4-9).

Jukʼamp yatxattʼañatakix ¿Kunsa Bibliax chiqpachapuni yatichi?a siski uka libron 8 jalja uñxattʼäta

[Qhanañchäwi]