Uma Juiciox chiqapuniw utjaskäna, janiw mä säwikïkiti
TAQINIS wali sum apasxsna, janirak chʼaxwañasa tʼaqhisiñanakasa ni lunthatasiñas utjxaspati, ¿ukham sum jakasiñ munasmati? Ukhamächi ukhaxa, nayra mä sarnaqäwit amtañaw wali askïspa, ukaw chuymachtʼistaspa. Noé sat nayra jaqit amtañäni, kunapachatï Uma Juicion ñanqhanakax jiwarapxañapäkäna ukhaw uka aski jaqix mä arka luratayna, ukanwa familiapampi qhispipxatayna.
Ukham wali uñtʼat nayra sarnaqäwinakax mä qhawqhakiw utji. Noen sarnaqäwipax Biblian qillqatawa, Génesis libron suxtat llätunkkam jaljanakanwa jikxatasi, ukat Corán sat libronsa jikxatasirakiwa, ukampis walja chiqanakanwa uka sarnaqäwitxa wal parlasi. ¿Chiqapunit Uma Juiciox utjäna, jan ukax jaqinakan sum sarnaqapxañapataki axsarayir mä säwikïpachacha? Walja maranakaw uka tuqit wali yatxattʼat jaqinakax parlapxi, chiqapunit janicha sasa. Ukampis Diosan Arupaxa, mä arunxa, Bibliax wali sumwa uka tuqit qhanañchi: chiqapuniw Uma Juiciox utjaskäna sasaw qhanañchi, ukhamax janiw mä siw säwikïkiti. Ukampis kunatsa chiqaw sisna uka tuqit jichhax amuytʼañäni.
Kuna maransa, kuna urunsa Uma Juiciox qalltäna ukxa qhan Génesis librox parli. Kunapachasa jan ukax kawkirus arkax purïna ukxa sum qhanañchistu, ukat kunapachas Uraqix wañäxan uksa sumwa qhanañcharakistu. Maysa tuqitsti, uka arkax kunjamänsa, qhawqchʼänsa ukat kunat luratänsa ukasa wali qhanarakiwa. Ukampis siw säwinakanxa, janiw ukham qhanañchapkiti, jan ukasti jan amuykañ mayjanak parlapxi.
Biblianxa nayra jaqinakatwa pä listax utjaraki, ukanwa Noé chachat aytasiraki (1 Crónicas 1:4; Lucas 3:36). ¿Khitinakas uka listanak lurapxpachäna? Esdrasampi Lucasampiw uk qillqapxatayna, wali sum yatxatasaw lurapxatayna. Ukat Lucasax Noé chachat Jesuskamaw qillqatayna.
Isaías, Ezequiel profetanakasa ukat Pablosa Pedrosa Uma Juiciot ukat Noé chachat parlapxarakïnwa (Isaías 54:9; Ezequiel 14:14, 20; Hebreos 11:7; 1 Pedro 3:19, 20; 2 Pedro 2:5).
Jesús pachpaw uka tuqit parlarakitayna, ukat akham sänwa: “Kunjämtix Noé chachax jakkäna uka urunakapanxa pasäna, ukhamarakiw pasani Jaqin Yuqapan jutañap, urunakanxa. Manqʼasipkäna, umasipkäna, casarasisipkäna, ukhamarak phuchanakaps casarasiñatak churasisipkäna, Noen arcar mantañap urukama, ukapachaw uma juiciox purinïna, ukat taqiniw jiwarapxäna” sasa (Lucas 17:26, 27). Uka Uma Juiciox jan utjkaspäna ukhaxa, janiw Jesusax “Jaqin Yuqapan jutañap uruna[kat]” parlkaspänti.
Kuntï Bibliax siski ukanakat “phiskasiri jaqinakaw sartapxani” sasaw apóstol Pedrox satayna. Ukat akham säna: “Jupanakax janiw amuytʼasiñ munapkiti, [...] [Noen urunakapanxa] uraqixa uma juiciompi tʼunjatäxarakïnwa” sasa. ¿Kuntï Pedrox siskäna uk jiwasax amtañasarakïspati? Jïsa, amtañasawa. Ukat Pedrox akham saskakïnwa: “Aka uraqimpi alaxpachampisti ninampi tʼunjatarakïniwa, Diosan arunakaparjama, ukatak imatäskarakiwa. Uka ninawa qʼal nakhantani taripäwi urunxa, kunapachatï jan wali jaqinakax tukjatäkani ukapacha” sasa (2 Pedro 3:3-7).
Mä kutimpiw Diosax jan wal sarnaqirinakar tukjarakini. Ukat jakaskirinakas utjarakiniwa. Ukhamasti Noé chachat yatiqasis sarnaqañäni ukhaxa, aski jaqinakamp chikaw mä suma uraqin jakasxañäni.