Jesusan yatichäwinakapa

Kunjamatsa familian kusisit jakassna

¿Matrimoniox kunjam uñjatäñapasa?

Matrimoniox qullanawa. Jesusarux divorciasiñax walikïskaspati sasin jisktʼapxäna ukhaxa, jupax akham sänwa: “¿Janit jumanakax Diosan arunakapana leetʼapkta, khititix qalltan lurkäna ukax chacha warmi lurki ukxa? Sarakïnwa: ‘Ukatwa chachax awkiparu taykaparu jaytanukusin warmipampi mayachasxani, panipasti mayakïxarakiniwa. Ukhamasti janiw paninïkxapxiti jan ukasti mayakïxapxiwa. Ukhamax jaqix janiw jaljtaykaspati kuntix Diosax mayachkis ukxa’”. Ukatsti saskakïnwa: “Khititix warmiparu jan wachuqa juch lurkipana apanukuxa, ukat yaqhampi casarasirakixa, uka jaqix wachuqa juchwa luri” sasa (Mateo 19:4-6, 9). Jaqichasitanakax Jesucriston uka iwxaparjama sarnaqapxi ukat wachuqa juchar jan purtʼasis sum sarnaqasipxaraki ukhaxa, familiatakix wali askiwa.

Familian kusisit jakasiñatakixa, ¿kunatsa Diosar munasiñax wali wakiskirixa?

Jesusax akham sänwa: “Tatit Diosamaruw munäta taqi chuymamampi, taqi almamampi, taqi amuyumampiraki. Akawa taqit sipansa jachʼa mandamientoxa”. Ukxarusti aka wakiskir mandamiento arsurakïna: “Jaqi masimarusti juma kipkarjam munarakim” sasa (Mateo 22:37-39). Ukhamasti, familian kusisit jakasiñatakix Jehová Diosaruw munasiñasa, Juparutï munasiñänixa, jaqi masisar munasirakiñäniwa. Chiqpachansa, familiasankirinakaw wali munat masisaxa.

¿Kunjamsa chacha warmix apasipxañapa?

Chachanakax Jesusatwa yatiqasipxaspa. Jupax arkirinakap laykuw jakäwip aptʼasiwayäna (Efesios 5:25). Chiqpachansa jupax akham sänwa: ‘Janiw serviyasiñatak jutkti jan ukasti serviriw jutta’ sasa (Mateo 20:28). Jesusax Diosan Yuqapäkchïnsa, arkirinakaparux janiw qhuru chuymamp munañaparuki apnaqkänti. Jan ukasti, taqinir munasiñampi uñjañatakiw chʼamachasïna (Mateo 11:28). Ukhamarakiw chachanakax Jesusat yatiqasisax familiapar wali munasiñampi pʼiqtʼapxañapa.

Warminakax Jesusat yatiqasipxarakispawa. Bibliax akham siwa: “Diosax Criston pʼiqip[awa]” ukat “chachasti warmin pʼiqiparakiwa” sasa (1 Corintios 11:3). Jesusax Awkipar pʼiqtʼiripjam istʼasax janiw jiskʼachatjam amuyaskänti, kunattix Juparux wal respetäna. Jesusax akham sänwa: “Nayax jupar kusisiykirpun kuns lur[txa]” sasa (Juan 8:29). Diosaw chacharux familian pʼiqtʼañapatak uttʼayi, ukatwa Diosar munasiri ukat respetir warmix chachaparux taqi chuym istʼi.

¿Awk taykanakax kunsa Jesusat yatiqasipxaspa?

Jesusax janiw wawanakatakix tiempok apsuskänti, jan ukasti kunjams jikxatasipxäna, kuns amuyapxäna ukanaksa sum amuyarakïna. Mä kutixa, Jesusan ukaruw wawanak apanipxäna ukampis arkirinakapax jupar jan jakʼachasipxañapatakiw jarktʼapxäna, uk uñjasinsti Jesusax akham sänwa: “Wawanakax nayar jutasipkpan sam” sasa (Lucas 18:15, 16). Ukat wawanakarus jachʼaruw aptarakirïna. Wawanakax Jesusar iyawsäwinïpxatap layku jachʼañchapxäna ukhax yaqhip jaqinakax wawanakarux jiskʼachapxänwa, ukampis Jesusax uka jaqinakarux akham sasaw juchañchäna: “¿Janit jumanakasti qillqatanaka leetʼapkta taqi akanakatsti? Ukasti akham siwa: ‘Jumaw munañamanxa wakichta jiskʼa wawanakan chiqa yupaychaña churañapa’” sasa (Mateo 21:15, 16).

¿Wawanakax kunjamsa Jesusat yatiqasipxaspa?

Jesusatakix Diosar yupaychañaw taqi kunat sipansa jukʼamp wakiskirïnxa, ukwa wawanakax yatiqasipxaspa. 12 maranïkan ukhaw awk taykapax “templon ley yatichirinak taypin quntʼatäskiri jikxatapxäna, jupanakaru istʼaskiri ukhamarak jisktʼaskiri”. Uka ley yatichirinakax “walpun muspharasipxäna jupan yatiñapatxa ukhamarak jisktʼanakar arusxatatapatsa” (Lucas 2:42, 46, 47). Wali yatiñanïkchïnsa janiw jachʼa jachʼa tukurïkänti ni awk taykaparus respeto faltirïkänti, kunattix “jupanakar istʼasaw sarnaqäna” sasaw Bibliax qhanañchi (Lucas 2:51).

Jukʼamp yatxatañatakixa, ¿Kunsa Bibliax chiqpachapuni yatichi?a sat libron 14 jaljap uñxattʼäta.

[Qhanañchäwi]