¿Yatiyätati?

¿Kuna yaqha qillqatanakasa Jesusan utjaskapunitap qhanañchi?

▪ Jesusan tiemponakapan jakapkäna uka sarnaqäwinakat qillqirinakax Jesusarux aytapxapunirïnwa. Amuytʼañataki, Cornelio Tácito sat chachax Roma markax emperadoranakampi apnaqatakäna uka tiemponakat qillqkasaxa, Cristot qillqarakïnwa. Ukat Roma markax 64 maran phichhantata uñjaskäna uka tuqit parlkasaxa, Nerón sat emperadorax “cristiano” sasin uñtʼatapkäna ukanakaruw juchañchañ munäna, ukampis jupapachpan phichhantaskatapaw yatisiraki sasaw säna. Ukatxa akham sasaw qhanachtʼaskakïna “Cristox Tiberio emperadorax apnaqkäna ukhaw Poncio Pilato sat apnaqirimpi jiwayat uñjasïna. Cristo sat sutitwa [cristianonakax] cristiano sas uñtʼayasxapxarakïna” sasaw sarnaqäwinakat qillqiri Cornelio Tácito chachax saraki (Anales, XV, 44).

Ukat sarnaqäwinakat qillqiri Flavio Josefo sat judío chachaxa, Jesusax utjaskapunïnwa sasaw saraki. Ukat 62 maran Judea marka apnaqiri Festo sat chachan jiwatapata Albino sat chachan apnaqirjam uttʼayasxañapkamaxa “[Ananías sat jilïr sacerdotex] sanedrinankirinakaruw tantachthapïna. Criston Jacobo [Santiago] sat jilapar taripañatakiw jawsayäna” sasaw Josefox qhanañchi (Antigüedades Judías, libro XX, cap. IX, sec. 1, [200])”.

¿Kunatsa Jesusarux “Cristo” sasïnxa?

▪ Mateo, Marcos, Lucas, Juan qillqatanakarjamaxa, Gabriel angelax Mariar usur jaqiptätaw sasin yatiyañatak uñstäna ukhaxa, wawamarux Jesús sasaw sutichäta sasaw säna (Lucas 1:31). Biblia qillqaskäna uka tiemponakanx uka sutix judionak taypinxa wali uñtʼatapunïnwa. Sarnaqäwinakat qillqiri Josefo sat judío chachaxa, Biblian qillqatäki ukat sipans yaqha 12 uka pachpa sutini jaqinakaruw ayti. Mayninakamp jan pantjasiñatakixa, Marian yuqaparux Nazaret markan jilsuwayatapatxa ‘Nazaretankiri’ sasaw sapxirïna (Marcos 10:47). Ukat “Cristo”, jan ukax Jesucristo sat sutimpi uñtʼatarakïnwa (Mateo 16:16). ¿Cristo aruxa kamsañs muni?

“Cristo” aruxa kjristós siski uka griego arutwa juti, hebreo arutxa maschíaj (mesías) sasirakispawa. Uka paypach aruxa “ajllita” sañ muni, Jesús nayrax yaqha jaqinakarus ukham sasirakïnwa. Sañäni, Moisés, Aarón ukat David reyis ajllitjam uñtʼatäpxarakïnwa, kunattix Diosaw jupanakarux kunayman aski luräwinak lurapxañapataki ukat pʼiqtʼapxañapatak uttʼayäna (Levítico 4:3; 8:12; 2 Samuel 22:51; Hebreos 11:24-26). Ukhamasti, niyakixay Jesusax jutaniw sat Mesiasächixa, jupaw Jehová Diosan ajllitapaxa, ukatwa ‘Cristo, jakkir Diosan Yuqapa’ sasin sataraki (Mateo 16:16; Daniel 9:25).

[15 janan fotopa]

Flavio josefon retratopa