3 Jesusar sum uñtʼañamawa
“Diosax akapachar wal munatap laykuw mä sapa Yuqapar khitani, taqi khitinakatix jupar iyawsapki ukanakax jan chhaqañapataki jan ukasti wiñay jakañanïñapataki.” (Juan 3:16.)
¿KUNATSA CHʼAMÄSPA? Jesusatxa kunaymaninak parlapxi. Janipuniw jupax utjkänti sasaw sapxi. Jiwasjam jaqikïnwa kunjamarak jiwatat jaktanispasti sasaw yaqhipanakax sapxaraki.
¿KUNJAMATSA JESUSAR SUM UÑTʼSNA? Natanael discipulotwa yatiqassna.a Felipe amigopax ‘Jesús, Nazaret markankiri Josean yuqapa’ mä arunxa Mesiasaruw uñjapxta sasin yatiyäna ukhaxa janiw chiqäkiti sänwa. Ukatwa akham jisktʼäna: “Nazaret markatx ¿kuna sumarak mistuspa?” sasa. Ukat Felipex akham sänwa: “Jutam uñjiri” sasa. Natanaelaxa jupapachpaw uñjir saräna (Juan 1:43-51). Uka kikparakiw Jesusar sum uñtʼañatakix jiwas pachpa sum yatxatañasa.
¿Sarnaqäwinakat yatxatirinakax Jesusat kamsapxarakisa? Josefo ukat Tácito sarnaqäwinakat yatxatirinakax janis cristianüpkchïnxa, Jesucristox wali uñtʼatänwa sasaw qillqapxäna. Amtañäni, 64 maran Roma marka ninamp phichhantapkäna uka tuqit Tácito qillqirix akham siwa: “Nerón apnaqirixa cristianonakaruw juchañchäna ukat jan wali jaqinakat uñjayarakïna, khitinakarutix markankirinakax cristianonaka sapkäna ukanakaru. Jupanakaxa Criston sutip apapxäna, Tiberiox Roma marka apnaqkäna ukhaw Poncio Pilaton arsutaparjam Cristor jiwayapxäna” sasa.
Uka kikparakiwa, 2002 maran lurata Encyclopædia Britannica qillqatax pä patak maranakan paskäna uka tuqit akham qhanañchi: “Cristianonak contra saytʼirinakasa Jesusan wali uñtʼatätapatxa janiw payachasipkänti, 1700, 1800 ukat 1900 maranakanxa jan sum yatxatasakiw Jesusax janiw utjkänti sasax sapxäna” sasa. Ukat 2002 maranxa, The Wall Street Journal sat periodicox akham qillqatayna: “Diosan utjatap jan yatiñ munirinakat (ateo) sipansa sarnaqäwinakat wali yatxatat (eruditos) jaqinakatxa, Nazaretankir Jesusan sarnaqäwipax chiqapunïtapsa waljaniw amuyxapxi” sasa.
¿Jesusax chiqapunit jaktawayi? Jesusar katuntapkäna ukhax kunas pasäna uka tuqit jichhax amuytʼañäni. Arkirinakapasa ukat wali munat amigonakapasa jaytxapxänwa. Pedro amigopaxa, wal sustjasisax jan uñtʼiriw tuküna (Mateo 26:31, 55, 56, 69-75). Ukampis Jesusan jiwatapatxa, muspharkañanakapuniw pasäna ukaw arkirinakaparux wali chʼamampi Jesusat yatiyañatakix yanaptʼäna. Pedrompi Juanampixa khitinakatï yatichiripar jiwayapkäna ukanakarux janiw axsarxapxänti, janiw kunäkipansa amuktʼapkänti ukatwa Roma markpachan yatiyapxäna. Jakäwinakap aptʼasirjamäpkchïnsa iyawsäwip lakuw jan jaytasa yatiyasipkakïna.
¿Kunatsa ukham amtapxäna? Arkirinakapatxa waljaniw Jesusan jaktanitap uñjapxäna, ukatwa ukham amtapxäna. ¿Jesusax jaktanisin khitinakarus uñstpachäna? Apóstol Pablox akham siwa: “Pedroruw uñstänxa, ukhamarak yaqha apostolunakarusa. Uka qhipatsti phisqa pataka jilatanakarurakiw uñstänxa” sasa. Uka arunak Pablox qillqkäna uka urunakanxa, Jesusan jaktanitap uñjirinakax jakasipkänwa (1 Corintios 15:3-7). Jesucriston jaktanitapat pä jaqiki parlaspäna ukhaxa, waljaniw jan iyawsapkasapänti (Lucas 24:1-11). Niyakixay phisqa patak jaqinakax uñjapxchïnxa janipuniw khitis payachaskasapänti.
¿KUNA ASKINAKSA JIKXATSNA? Jesusar iyawsapki ukat mayitanakaparjamas sarnaqapkaraki ukanakaxa, juchanakapatsa pampachatawa ukat concienciapansa qʼumäpxarakiwa (Marcos 2:5-12; 1 Timoteo 1:19; 1 Pedro 3:16-22). Jiwapkani ukhasa, jaktaniñatakisa suytʼäwinïpxiwa, Jesusax “qhipa urunxa jakatatayarakïwa” sänwa (Juan 6:40).
Jukʼamp yatxatañatakixa, ¿Kunsa Bibliax chiqpachapuni yatichi?,b sat libron pusi ukat phisqa jaljanakap uñxattʼäta, “¿Khitis Jesucristoxa?” ukat “Qhispiyäwixa Diosan jilïri jachʼa churäwipawa” siski uka pʼiqinchäwinaka.
[Qhanañchäwinaka]
a Mateo, Marcos ukat Lucas qillqatanakarjamaxa inas Bartolomé sutimpi uñtʼatächïna.
b Jehová Diosan Qhanañchirinakapan luratawa.
[7 janan fotopa]
Jesusar sum uñtʼañatakixa jiwas pachpaw sum yatxatañasa, kunjamtï Natanaelax lurkäna ukhama