BIBLIA TOQET JISKTʼANAKA
¿Kunatakis Jesusajj kuttʼanini?
Jesucristojj 33 maran janïr alajjpachar sarkasajja, kuttʼanïwa sasaw arsuwayäna. Ukat kunjamtï wali aytat familiat jutir mä jaqejj jaya markar sarjjasin reyit uttʼayat walja tiempot kuttʼankänjja, ukar uñtasitätwa sasaw sarakïna. Ukhamajja, jaqenakar sum apnaqañatakiw Cristojj kuttʼanini. (Lucas 19:11, 12 liytʼäta.)
Jesusaw jaqenakarojj wali sum apnaqjjani
¿Kunjamsa Cristojj kuttʼanpachäni? Jupajj mä ajayjam jaktayatänwa (1 Pedro 3:18). Alajjpachar makatjjäna ukhajja, Diosan kupëjjaparuw qontʼasïna (Salmo 110:1). Ukat qhepatjja, ‘Jilïri chuymani’, Jehová Dios nayraqataparuw jakʼachayapjjarakïna. Jupaw Jesusarojj taqe markankïr jaqenakjjar apnaqañapatak munañanïñ churäna. Ukhamajja, Jesusajj kuttʼankani ukhajj janiw mä jaqjam kuttʼankaniti, jan ukasti jan uñjkayakiw Reyjam kuttʼanini. (Daniel 7:13, 14 liytʼäta.)
Jesusajj kuttʼankani ukhajj ¿kunsa lurani?
Jesusajj angelanakapamp kuttʼankani ukhajja, jaqenakaruw taripani, mä arunjja, juzgani. Jupaw jan wali jaqenakarojj tukjani, ukampis Jupar iyawsapki ukanakarojj wiñay jakañwa churani. (Mateo 25:31-33, 46 liytʼäta.)
Jesusajj Reyjam apnaqjjani ukhajja, Oraqjja mä paraisoruw tukuyani. Ukat jiwatanakarojj Paraisoptayat Oraqen jakasipjjañapatakiw jaktayani. (Salmo 37:29 ukat Juan 11: 25 liytʼäta.)