¿Kunatsa jan walinakajj suma jaqenakar paspacha?

Jehováa Diosaw taqe kuns lurawayi ukat Taqe Chʼamanirakiwa. Ukatwa waljanejj kunanakatï aka Oraqen paski ukat jan walinakats Diosar juchañchapjje. Ukampis Bibliajj Jupat akham siwa:

• “[Jehová] Tatitojj taqe sarnaqäwipan cheqap uñjiriwa.” (Salmo 145:17.)

• ‘Diosan thakhinakapajja, cheqapawa. Jupasti cheqapa Diosawa, janiw jupan kunatejj jan cheqapäki ukajj utjkiti, ¡jupasti cheqapawa, askirakiwa!’ (Deuteronomio 32:4.)

• “[Jehová] Tatitojj wali munasiri, khuyapayasiriwa.” (Santiago 5:11.)

Jehová Diosajj janiw jan walinak lurkiti. Ukampis yaqhepajj Jupas jaqenakar jan wali lurañapatak amtaykaspa ukham amuyapjje. ¿Ukajj cheqati? Janiwa. Bibliajj akham siwa: “Maynejj kuna jan wal lurañatakis yantʼata uñjaschi ukajja, janiw amuyañapäkiti Diosas yantʼkaspa ukhamjja. Diosasti janiw kuna jan walimpis yantʼkiti, ni khitirus yantʼar puriykarakiti” sasa (Santiago 1:13). Diosajj janiw jaqenakar jan wali lurapjjañapatak yantʼkiti. Janirakiw jan walinaks lurkiti ni jan walinak lurapjjañapatakis nuktʼkiti. Ukhamajj ¿kunarusa jan ukajj khitirus juchañchañasäspa?

MÄ AKATJAMATWA JAN WALIN UÑJASSNA

Kunatsa jaqenakajj tʼaqhestan uka toqet Bibliajj akham siwa: “Horasajj jan waltʼañajj taqeniruw [mä akatjamat] puri” sasa (Eclesiastés 9:11). Mä akatjamat kuna jan walis utji ukhajja, waljaniruw jan waltʼayaspa jan ukajj janiraki. Ukampis kunjamächiniy, kawkhanächiniy ukarjamäspawa. Pä waranqa maranak nayraw Jesusajj mä torren tinkutapat parläna, ukanjja 18 jaqenakaw jiwapjjäna (Lucas 13:1-5). Jupanakajj janiw jan wali lurapjjatapat jiwapkänti, jan ukasti ukhajj torre jakʼankasipkänwa. Haití markan enero 2010 maran oraq khatati utjkäna ukanjja, 300.000 jaqenakaw jiwapjjäna. Ukasti, mä khuskatwa jiwarayäna janiw khitits khuyaptʼayaskänti sasaw uka marka apnaqerinakajj yatiyapjje. Usunakasa, ukhamarakiw taqe kasta jaqeru mä akatjamat jan waltʼayaspa.

Inas maynejj akham jisktʼaschispa: ‘¿Diosajj janit ukanak jarktʼkaspäna? ¿Janit suma jaqenakarus ukanakat qhespiykaspäna?’ sasa. Jarkʼaqañatakejja, kuna pachas ukanakajj pasani uk yatiñapaw Diosan wakisispajja. Kunanakas jutïrinakan pasani uk yatiñatakejj Jupajj chʼamaniwa, ukampis ¿taqe kun yatiñatakit uka chʼamap apnaqpacha? (Isaías 42:9).

Bibliajj akham siwa: “Diosasajj alajjpachankiwa, kuntejj jupajj munki uk luri” sasa (Salmo 115:3). Kunanakas wakisispa ukanakakwa Jehová Diosajj luri, ukampis janiw taqe kuntï lurkaspa ukpun lurkiti. Ukajj kunatï jutïrin paskani ukanwa qhan amuyasi. Amuytʼañataki, Sodoma, Gomorra markanakajj jan walinakampi phoqantatäjjän ukhajja, Abrahamarojj Diosajj akham sänwa: “Jichhajj nayajj uñjiriw sarä cheqpachapuniti jucha luratanakapajj sintïpacha janicha uk yatiñataki, ukhamatwa yatirakëjja” sasa (Génesis 18:20, 21). Mä tiempojja, kuna jan walinakatï uka markanakan pasaskän uk janiw Diosajj yatiñ munkänti. Jichhürunakan ukhamarakiw kunanakatï jutïrin paskani ukanak jan taqpach yatiñ munkaspati (Génesis 22:12). Ukampejj janiw pantjasirïkaspasa, janis chʼamanïkaspa uk sañ munkiti. Bibliajj akham siwa: ‘Luräwipajja cheqapawa’ sasa, ukhamajja kunanakatï jutïrin paskani uk qhanañchañatak chʼamanïkchisa amtaparjamaw kuns qhanañchi. Janiw khitirus munkir jan munkir leyinakap phoqaykiti (Deuteronomio 32:4).b Ukhamajj Diosakiw kunanaksa yatiyani jan ukajj jan yatiykani uk amtaspa.

¿JAQENAKAT JUCHANÏPACHA?

Jan walinak utjañapatakejj jaqes juchanirakiwa. Kunjamatsa mä jan walejj jukʼamp jan walëjjaspa ukjja Bibliajj akham qhanañchi: ‘Kunapachatï maynejj jan wali amtatanakapampi atipjayasi ukhaw tentacionarojj puri. Uka jan wali amtäwinakatwa juchajj sarti, ukat uka juchajj jachʼäjje ukhajja, jiwañakiw purinjjaraki’ sasa (Santiago 1:14, 15). Jaqenakajj jan wali amtanakapampi apayasipjjatap laykojja, jan walinakanpunwa uñjasipjjaspa (Romanos 7:21-23). Nayratpachwa jaqenakajj sinti jan walinak lurawayapjje, ukaw jukʼamp tʼaqhesiñanak utjawayi. Janiw ukakïkiti, ñanqha jaqenakajj yaqhanakaruw jan wali lurapjjañapatak chʼamañchapjje, ukatwa jan walinakajj utjaskaki (Proverbios 1:10-16).

¿Diosat ukanak jarkʼañapa? Jan walinak jan lurañasatakejj ¿Diosat jarkʼañaparaki? Kunjam lurtʼatäktantï uka toqet amuytʼañäni. Diosajj Jupar uñtasit lurawayistu sasaw Bibliajj qhanañchi. Ukhamajja, kunjam Diosäkitï uk yateqassnawa (Génesis 1:26). Ukat jiwas pachpa kuns ajllisirwa lurtʼawayistu. Ukhamajj jiwasaw Jupar munasiñäniti, leyinakap istʼañänit uk amtjjañasa (Deuteronomio 30:19, 20). Diosatï munkir jan munkir kuns lurayistaspajja, churkistu ukats jarkʼkistaspa ukhamäspawa, yaqhamp apnaqat maquinjamäsnawa. Ukat destino siskis ukarjam tʼaqhesisksnajja, uka pachparakïspawa. Diosajj wali munasiñampiw uñjistu, ukat kuntï lurañ munktan ukanakat janiw jarkʼkistuti, ukham luratapat wal yuspärtanjja. Ukampis janiw mayninakan pantjasitap layku, jan walinak lurañ amtapjjatap layku wiñay tʼaqheskañäniti.

¿KARMA LAYKUT TʼAQHESPACHÄTANJJA?

Hinduismo, budismo religionankirinakajj jiwjjasin maynin almapajj yaqha cuerporus sarkaspa ukham amuyapjje, ukat karma siski ukarus creyipjjarakiwa. Karma siski ukajj ¿kunäpachasa? Kuntï maynejj nayra jakäwipan lurawayki ukarjamas jichhajj jakaskaspa ukham creyipjje. Ukatwa aka revistan nayrïr janan jikjjataski uka jisktʼa mä hinduistaru jan ukajj mä budistar jisktʼsna ukhajja, inas akham sischispa: “Karma siski uka laykuw suma jaqenakarojj jan walinakajj pasi: kuntï nayra jakäwipan lurawayapki ukwa jichhajj pagasipki” sasa.

Uk sum amuyañatakejja, jiwañat Bibliajj kamsisa uk yatjjatañäni. Edén jardinan Diosajj Adán chacharojj akham sänwa: “Aka huerton taqe qoqanakat manqʼasïta, ukampisa aski ukhamarak ñanqha yatiñ churir qoqatjja janiw manqʼätati. Uka qoqan achunakapjja jan manqʼamti, manqʼäta ukapachasti cheqpachan jiwäta” sasa (Génesis 2:16, 17). Adanatejj Diosar istʼaspäna, ukat jan juchachaskaspänjja, wiñayaw jakaspäna. Ukhamajj jiwañajj jan isʼtasitapatwa utjawayi. Ukat wawanakanëjjän ukhajj ‘jiwañajj taqe jaqeruw katuntawayi’ (Romanos 5:12). Ukatwa jiwañajj jucha laykuw utjawayi sasin sissna (Romanos 6:23). Ukampis “khititejj jiwki ukajj juchatjja [librëjjewa]” sasaw Bibliajj saraki (Romanos 6:7). Mä arunjja, jaqenakajj jiwjjasajj janiw juchanakapat tʼaqhesjjapjjeti.

“Karma laykuw jaqenakajj tʼaqhesipjje” sasaw waljanejj sapjje. Ukar creyirinakajja, tʼaqhesitapasa, yaqhanakan tʼaqhesitapas walikïkaspas ukham amuyapjje, ukat janiw sinti llakisipkiti. Ukampis uka amuyojj janiw kuna suytʼäwsa churkiti. ‘Qhespiñatakejja, maynejj mä cuerpot yaqha cuerpor sarki ukatjja librëñapawa, ukatakejj sum sarnaqañapa ukat suma yatiñanïñaparakiwa’ sasaw amuyapjjaraki. Uka amuyunakajja, janiw kuntï Bibliajj yatichki ukarjamäkiti.c

¿KHITIPUNIS JUCHANÏPACHA?

Jaqenakat sipansa, Supayaw jila partejj jan walinakat juchani. Qalltanjja, Diosan mä suma angelapänwa, ukampis ‘janiw cheqa parlañan achtʼkänti’, jupaw aka Oraqen jucha utjayaraki (Juan 8:44, MT). Edén jardinanjja, Dios contra saytʼapjjañapatakiw chʼamañchäna (Génesis 3:1-5). Ukat Jesusajj ‘ñanqha’ “akapacha apnaq[eri]” sasaw jupar säna (Mateo 6:13; Juan 14:30). Jila parte jaqenakajj Supayaruw arkapjje. ¿Kunjamsa? Munañanakapak lurasa, Diosan leyinakapar jan istʼasa (1 Juan 2:15, 16). ‘Oraqpachajj Supayan munañapankiwa’ sasaw 1 Juan 5:19 qellqatajj qhanañchi. Yaqha angelanakasa, Supayamp nuktʼatajj jupamp chikaw jan walinak lurjjapjjäna. Biblianjja ‘Supayajj aka oraqen jaqenakarojj wali sallqjañanak’ sajjranakapamp chika luri siwa, ukatwa taqenis tʼaqhestanjja (Apocalipsis 12:9, 12). Ukhamajj jan walinakatjja, Supayaw juchani.

Jaqenakar jan walinak pasatapatjja, janiw Diosajj juchanïkiti, ni Jupaw tʼaqhesiyi sapki ukas cheqäkiti. Antisas ‘taqe uka jan walinak chhaqtayäwa’ sasaw arsuwayi, ukjja jutïr yatichäwinwa uñjañäni.