Taqe jan walinak ¿Diosajj chhaqtaypachäniti?

Supayajj kuna jan walinaktï utjayki ukampejj kunsa Jehová Diosampi Jesucristompejj lurani ukjja, Bibliaw sum qhanañchi. ‘Supayan luratanakap tʼunjiriw Diosan Yoqapajj juti’ sasaw Bibliajj qhanañchi (1 Juan 3:8). Aka pachanjja, jan walinakampi, uñisisiñampi ukat yaqha ukhamanakampi phoqantatawa, ukampis taqe ukanakajj tukjatäjjaniwa. ‘Akapacha apnaqeri Supayajj jaqsutäjjaniwa’ sasaw Jesusajj sarakistu, mä arunjja, tukjatäjjaniwa (Juan 12:31). Niyakejjay Supayajj tukjatäjjchinejja, Diosajj aka Oraqjja, machaqaruw tukuyjjani, mä arunjja, sumankañampiw phoqantani (2 Pedro 3:13).

Ukampis jan wali lurañanak jan jaytañ munapki ukat jan walinak lurasipkaki ukanakampejj ¿kunas pasani? Bibliajj akham siwa: “Aski luriri qʼoma jaqenakasti, aka oraqenwa wiñayatak jakapjjani. Ukampis jan wali sarnaqer jaqenakasa, jan sum phoqhasa sarnaqerinakasa, aka oraqetjja apanukuta tukjatäpjjaniwa” sasa (Proverbios 2:21, 22). Ukhamajj jan wali lurayañ munirinakajj janiw utj-jjaniti, sumankañakiw utj-jjani. Ukat Diosar istʼasirinakajj jukʼat jukʼatwa juchanakapat qʼomachatäjjapjjani (Romanos 6:17, 18; 8:21).

Diosajj jan walinak tukjañatakejja, janiw maquinanakar uñtata jan kuns amtapar luriri tukuykistaniti. Antisas jan wali amuyunaka, jan wali luräwinak jaytañasatakiw leyinakap yatichasin yanaptʼistani.

Mä akatjamat jan waltʼañanak utjki ukanakampejj ¿kunas pasarakini? Jehová Diosaw Reinop toqejj aka Oraqjjar apnaqjjani, ukatakejj Jesucristoruw Reyjam uttʼayawayi, jupajj usutanakar qollañatakejj chʼamaniwa (Mateo 14:14). Ukat jallurusa, thayarusa ukat yaqha ukhamanakar apnaqañatakis chʼamanirakiwa (Marcos 4:35-41). Mä akatjamat ‘horasajj jan waltʼañajj’ utjki uksa, chhaqtayjjaniwa (Eclesiastés 9:11). Apnaqäwipanjja, janiw kuna jan walis jaqenakar tʼaqhesiyjjaniti (Proverbios 1:33).

Ina chʼusat tʼaqhesisa jiwawayapki uka millón millón jaqenakatakis mä suma suytʼäwejj utjarakiwa. Jesusajj Lázaro amigopar janïr jaktaykasinjja akham sänwa: “Nayätwa jaktañasa, jakañasa” sasa (Juan 11:25). Cheqas Jesusajj taqe jiwatanakar jaktayañatakejj chʼamaniwa.

Jumatï suma jaqenakamp chika jan tʼaqhesisa jakasiñ munsta ukhajja, ¿janit Bibliat yatjjatañamajj wakiskaspa? Ukanwa Diosatsa ukat kuntï lurañ amtki ukanakatsa jukʼamp yatjjatäta. Markaman jakasipki uka Jehová Diosan Qhanañchirinakapaw yanaptʼapjjätam. Jupanakampi parltʼañamatakiw invittʼapjjsma, jan ukajj kawkhantï aka qellqatajj luraski ukaruw qellqarakisma.