Diosan Reinopat yatjjatañamajj ¿kunatsa wakisipuni?

Oraqpachanjja, millón millón jaqenakaw Diosan Reinoparojj taqe chuyma suyapjje. Jesusajj kuntï arkirinakapar ewjjtʼkänjja, ukarjamaw arkapjje. Jupajj akham mayipjjäta sänwa: “[‘Reinomajj jutpan’, NM]. Munañamasti luratäpan akapachanjja, kunjamatï alajjpachana luratäki ukhama” sasa (Mateo 6:10).

Diosan Reinopat waljanis yatjjatañ munapkchejja, jila parte religionanakajj janiw ukar sinti yäqapkiti. Sarnaqäwinakat qellqeri H. G. Wells chacharojja, akaw muspharayäna: Jesusajj Diosan Reinoparojj wali wakiskiritwa uñjirïna, “uka yatichäwirojj Alajjpachankir Reino sasaw sirïna”, ukampis “jilaparte cristiano iglesianakan yatichäwinakapanjja” uka Reinotjja, jukʼakiw qhanañchasïna.

Ukampis Jehová Diosan Qhanañchirinakapajja, Diosan Reinopat parlapjjapuntwa. Sañäni, añchhit aptʼatäskta uka revistajja, 220 arunakanwa utji. Ukampis sapa casta revistajj 46 millonanakaw imprimisi, ukat oraqpachanjja, uka revistaw jilapart lakirasi. ¿Kuna toqetsa jilpach parli? Nayrïr janap uñjjattʼam: Yatiyañataki Jehová Diosan Apnaqäwipat (Reinopat) yatiyaski.a

¿Kunatsa nanakajj Reino toqet yatiyañatakejj wal chʼamachasipjjta? Kunattejj Biblianjja, Diosan Reinopatwa jilapartejj parli. Ukampis kunatï llakisiykistu uka jan waltʼäwinakjja, Diosan Reinopakiw askichjjani sasaw taqe chuyma confiapjjarakta.

Cheqas Jesusatwa yateqasipjjta. Jupatakejj Diosan Reinopaw taqe kunat sipansa nayrankäna, uka toqetwa aka Oraqenkkäna ukhajj yatiyirïna (Lucas 4:43). ¿Kunatsa Jesusatakejj wali wakiskirïna? Diosan Reinopajj ¿kunsa juma layku luraspa? Bibliajj kunjamsa uka jisktʼanakar qhanañchi ukjja, akjjar jutki uka yatichäwinakanwa yatjjatäta.