Diosan Reinopat cheqa yatichäwi

Jesusajj discipulonakaparojj akham sasin orañwa yatichäna: “Alajjpachankir nanakan Awkija, sutimajj jachʼañchatäpan. Reinomajj jutpan. Munañamajj luratäpan, kunjamatï alajjpachan luraski ukhamarak aka oraqens luraspan” sasa (Mateo 6:9, 10). ¿Kunas Diosan Reinopajja? ¿Kunsa luraski? ¿Kunatsa Diosan Reinop jutañap mayiñasa?

Diosan Reinopan Reyejj Jesusawa

Lucas 1:31-33: “Jesús sasaw sutiyäta. Jupasti wali jachʼäniwa, Jachʼa Diosan Wawapa satarakïniwa. Jehová Diosaw juparojj David awkipan tronop churani. Jacobun utapjjaruw jupajj wiñayataki mä Reyjam apnaqani, janirakiw Reinopajj tukuskaniti”.

Jesusajj Diosan Reinopatwa jukʼamp yatiyirïna

Mateo 9:35: “Jesusajj taqe jiskʼa jachʼa markanakaruw saräna, sinagoganakan yatichasa, Reinon suma yatiyäwinakap jaqenakar parlasa, kunayman usutanakar qollasa”.

Diosan Reinopan jutañapajj wali jakʼankjjani ukhajj kunanakas pasani ukwa Jesusajj discipulonakapar yatiyäna

Mateo 24:7: “Mä jachʼa markajj yaqha jachʼa marka contraw sartani, mä gobiernosti yaqha gobierno contrarakiw saytʼani. Manqʼat pistʼañanakasa terremotonakas ukjan akjan utjarakini”.

Jesusan discipulonakapajj oraqpachanwa Diosan Reinopat predicasipki

Mateo 24:14: “Reinon aka suma yatiyäwinakapajja aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani”.

Diosan Reinopat qhanañchäwi

Kawkinkisa: Diosan Reinopajj cheqpach mä gobiernowa, Diosaw alajjpachan uttʼayi (DANIEL 2:44; MATEO 4:17).

Kunas amtapajja: Diosan Reinopajj aka oraq mä paraisoruw tukuyani, ukan janiw usuntañasa ni jiwañas utj-jjaniti, jaqenakajj mayachtʼata ukat sumanwa jakasipjjani (SALMO 37:11, 29).

Reinon apnaqerinaka: Diosajj Jesusaruw Reyïñapatak uttʼayi, jupajj 144.000 aka oraqet alatäpki ukanakamp chikaw alajjpachat apnaqanini (LUCAS 1:30-33; 12:32; APOCALIPSIS 14:1, 3).

Reinomp apnaqatanaka: Jupanakajj aka oraqenwa jakapjjani, Jesusarojj taqe chuymaw Reyiparjam katoqapjjani, Reinon leyinakaparjamaw sarnaqapjjarakini (MATEO 7:21).

¿Kunatsa Jesusajj taqe gobiernonakat sipan jukʼamp suma apnaqerejja?

Jesusajj aka oraqenkäna ukhajja, munasirïtapa, apnaqañatakis suma wakichtʼatätapwa uñachtʼayäna.

Pobrenakats wal llakisïna (LUCAS 14:13, 14).
Jan walinaksa, cheqaparjam jan luraski ukanaks uñisitapwa uñachtʼayäna (MATEO 21:12, 13).
Taqe kunjjar chʼamanïtapwa uñachtʼayäna (MARCOS 4:39).
Walja waranqa jaqenakaruw mä milagro toqe manqʼayäna (MATEO 14:19-21).
Usutanakatsa khuyaptʼayasïnwa, usutäsin tʼaqesipkäna ukanakarus qollarakïnwa (MATEO 8:16).
Jiwatanakaruw jaktayäna (JUAN 11:43, 44).

¿Kunjamsa Diosan Reinopajj yanaptʼiristam?

Diosan Reinopamp apnaqatäñ amtsta ukhajj kusisitaw jakasïta. ¿Diosan Reinopamp apnaqatäpki ukanakajj kunanaks katoqapjje?

‘Taqenimpis sumankañanwa’ jakasipjje (HEBREOS 12:14).
Familjamajj mayachtʼata ukat kusisitaw jakasipjje, kunattejj jupanakkamaw munasipjje, respetasipjjarakiwa (EFESIOS 5:22, 23, 33).
‘Diosat yatjjatañajj kunja wakiskirisa uk amuyasipjjatap’ laykojja kusisitäpjjewa, chuymas chuymäpjjarakiwa (MATEO 5:3).