NAYRÏR JANAN PʼEQEÑCHÄWIPA
¿Kunjamsa Diosajj guerranak uñjpacha?
Waljanejja, ‘Diosatakejj guerran nuwasiñajj walikïskiwa, ukat nayra tiempon yaqhep servirinakaparojj guerran nuwasipjjañapatakiw khitäna’ sasaw sapjje. Cheqas ukajj Biblian qellqatäskapuniwa. Ukampis yaqhepanakajja, ‘Jesusajj uñisirinakamarojj munapjjam’ sasaw arkirinakapar yatichäna sapjjarakiwa (Mateo 5:43, 44). Ukatwa Diosajj janiw guerranakat nayrjam amuyjjeti sasin sapjje.
¿Jumajj kunjamsa amuyarakta? ¿Guerranakajj Diosatak walikïskpachati? Ukhamächi ukhajja, ¿guerran khitinakarus yanaptʼpacha? Uka jisktʼanakan qhanañchäwip yatisaw kunjamsa jumajj guerranakar uñjta uk amuyäta. Sañäni, jumatï Diosajj guerran ejercitom toqet nuwasiskatap yatisma ukhajja, ¿kunjamakis jikjjatasisma? Atipapjjäwa sasmawa. Ukampis Diosan mayni ejercitor yanapaskatap yatisajja, ¿kunjamas jikjjatasirakisma? Inas ukhajj wal ajjsarayasjjchisma.
Ukampis ukanak yatiñat sipansa mayaw jukʼamp wakiskirejja. Diosajj kunjamsa guerranak uñji uk yatisaw Jupajj kunjam Diosasa uk amuyañatak yanaptʼiristam. Jumatï guerranakan tʼaqhesiyata uñjasiwayapki uka millón millón jaqenaka taypinksta ukhajja, aka jisktʼan qhanañchäwip wal yatiñ munpachäta: ¿Diosajj wali qhorüpachati? ¿Jupat guerran tʼaqhesiñanak utjaypacha? Jan ukajj ¿guerranakan tʼaqhesiyatäpki ukanakat janit llakiskpacha?
Ukampis Bibliajja, janiw kunjamtï waljanejj amuyapki ukham qhanañchkiti, uk yatisajj inas muspharchïta. Cheqas nayratpachasa, jichhakamasa kunjamtï Diosajj guerranak uñjkäna ukajj pachpakïskiwa. Bibliajj uka toqet kamsisa uk jichhajj yatjjatañäni, ukaw kunjamsa nayra pachasa, nayrïr patak maranakansa Diosajj guerranak uñjäna uk yatiñatak yanaptʼistani. Ukat ukarakiw kunjamsa Diosajj guerranak jichhürunakan uñjaski ukat jutïrinsa guerranakajj utjaskakiniti janicha uk amuyañatakis yanaptʼarakistani.