NAYRÏR JANAN PʼEQEÑCHÄWIPA | ¿KUNJAMSA DIOSAJJ GUERRANAK UÑJPACHA?
Nayra tiempon ¿kunjamsa Diosajj guerranak uñjäna?
Diosan nayra Israel markapajja, wali munañani Egipto markampi tʼaqhesiyataw uñjasïna, ukatwa Diosarojj qhespiyañapatak wal mayisipjjäna (Éxodo 1:13, 14). Walja maranakaw israelitanakajj Egipto markat qhespiyatäñ suyapjjäna. Qhepatjja, Diosajj qhespiyänwa (Éxodo 3:7-10). Bibliajj Dios pachpaw uka marka contra nuwasïna sasaw qhanañchi. Tunka jan waltʼäwinakampiw castigäna, qhepatjja Egipto markan reyiparus ejercitoparus Wila lamar qotanwa jiwarayäna (Salmo 136:15). Ukhamatwa Jehová Diosajj markap layku ‘guerran nuwasirïtap’ uñachtʼayäna (Éxodo 15:3, 4).
Jehová Diosajj janiw taqpach guerranak jan walit uñjkiti, ukaw kuntï Egipto marka contra lurkäna ukan uñjasi. Awisajj Israel markaparojj nuwasir sarapjjañapatakiw khitirïna. Amuytʼañataki, mä kutejja cananeonak contra nuwasipjjañapatakiw khitäna, jupanakajj sinti jan wali jaqenakäpjjänwa (Deuteronomio 9:5; 20:17, 18). Ukatjja, David reyirojj filisteonak contra nuwasiñapatakiw khitarakïna, ukat kunjamatsa atipjaspäna uksa yatiyarakïnwa (2 Samuel 5:17-25).
Bibliankir uka sarnaqäwinakajja, ¿kunsa uñachtʼayistu? Jehová Diosajj Israel markapar jan walinakat jarkʼaqañatakejja, guerran nuwasipjjañapatakiw jupanakar khitirïna, ukhamat cheqpach yupaychäwisa, markapasa jan chhaqañapataki. Kuntï Jehová Diosajj lurkän uk jichhajj kimsa toqet amuytʼañäni.
KHITIS GUERRAN NUWASINI UK DIOSAKIW AMTÄNA. Diosajj israelitanakarojj akham sänwa: “Janiw jumanakati nuwasipkätajja” sasa. ¿Kunatsa ukham sispachäna? Dios pachpaw jupanak layku nuwasiñapäna (2 Crónicas 20:17; 32:7, 8). Kunjamtï qalltan yatjjataniwayktanjja, walja kutiw Diosajj markap layku nuwasïna. Ukampis awisajja, Suma Oraqe katuntañatakisa, jarkʼaqañatakisa, markaparuw guerran nuwasipjjañapatak khitirïna, ukampis Jupaw uk amtirïna (Deuteronomio 7:1, 2; Josué 10:40).
KUNAPACHAS GUERRAN NUWASIPJJANI UKJJA DIOSAKIW AMTÄNA. Diosan servirinakapajja, kunapachas nuwasipjjani uk pacienciampiw suyapjjañapäna. Janiw amtapatak nuwasir sarapjjañapäkänti. Amtapatak guerran nuwasir sarapjjerïna ukhajja, Diosajj janiw uka guerran yanapkänti. Kunapachatï israelitanakajj amtapatak guerran nuwasir sarapjjerïna ukhajja, jan walinwa uñjasipjjerïna.a
Cananeonak contras Diosajj nuwaskchïnjja, Rahab warmimpir familiapampirojj qhespiyänwa
DIOSAJJ JANIW KHITIN JIWAÑAPSA MUNKITI. Jehová Diosaw jaqenakar lurawayi ukat jakäwsa utjayaraki (Salmo 36:9, NM). Ukatwa jaqenakan jan jiwañap munkiti. Ukampis ñanqha lurañ munir jaqenakaw utji, jupanakajj mayninakar tʼaqhesiyaña ukat jiwayañ munapjje (Salmo 37:12, 14). Uka jan walinak tukjañatakiw Diosajj guerran nuwasipjjañapatak markapar khitirïna. Ukampis janïr uka markanakar tukjkasajja, ‘khuyaptʼayasirïtapsa’ ukat ‘jan jankʼak colerasirïtapsa’ uñachtʼayarakïnwa (Salmo 86:15, NM). Sañäni, janïr mä markampi nuwaskasajja, “nayraqatajj sumankañjjatwa parlapjjäta” ukhamata uka markajj jan wali luräwinakap jaytapjjañapataki, ukat jan nuwasiñataki sasaw säna (Deuteronomio 20:10-13). Ukhamatwa Diosajj ‘qhoru jaqen jan jiwañap munatapa, jan ukasti arrepentisipjjañap’ munatap uñachtʼayäna (Ezequiel 33:11, 14-16).b
Kunjamtï yatjjataniwayktanjja, Diosajj nayra tiemponjja, jan walinaka ukat tʼaqhesiñanak chhaqtayañatakiw guerranak utjayirïna. Ukampis kunapachasa ukat khitinakasa guerran nuwasipjjani ukjja, Diosaw amtirïna. Ukampis ¿Diosajj guerran nuwasiñ walti munpachäna? Janiwa, Jupajj ñanqha lurañanakjja, wal uñisi, ukwa kuntï lurkäna ukampejj uñachtʼayistu (Salmo 11:5). Ukampis nayrïr patak maranakan ¿janit ukham amuyjjpachäna?
a Mä kutejja, israelitanakajj Diosar jan istʼasaw amalecitanakampi, cananeonakampi amtapatak nuwasir sarapjjäna, ukampis atipjataw uñjasipjjäna (Números 14:41-45). Walja maranak qhepatjja, Josías reyejj amtapatak guerran nuwasir sarasajja, jakäwip kun aptʼasïna (2 Crónicas 35:20-24).
b Cananeonakampi janïr nuwaskasajja, israelitanakajj janiw sumankañjjat jupanakar parlapkänti. ¿Kunatsa? Jupanakarojj 400 maranakaw jan wali luräwinakap jaytañapatak tiempojj churatäna. Ukampis israelitanakajj nuwasir sarapkäna ukhajja, jukʼamp jan wali qhoru jaqenakaw tukjjapjjäna (Génesis 15:13-16). Ukatwa jupanakarojj qʼal tukjasiñapäna. Ukampis khitinakatï jan wali luräwinakap jaytapkäna ukanakajj janiw jiwayatäpkänti (Josué 6:25; 9:3-27).