¿Kunatsa Bibliajj jan chhaqtayasiwayki?

Biblia jan chhaqtayasitapatjja, jichhürun taqeniw Biblianipjjaspa ukat liytʼapjjarakispa. Ukhamajj jumatï parlaskta uka arur suma jaqokiptʼata Biblia ajlltʼasta ukhajja, kunatï nayra Qollan Qellqatanakan qellqatäkäna ukwa liytʼasktajja.a Kunaymanitsa Biblia chhaqtayañ munapkchïnjja, ¿kunatsa jan chhaqtayasiwayki? ¿Kunatsa Bibliajj wali wakiskir libropacha?

Bibliat yatjjatir walja jaqenakajja, apóstol Pablor uñtasitarakiw akham sapjje: “Taqe Qellqatasti Diosan amuytʼayatawa” sasa (2 Timoteo 3:16). Jupanakajj taqe chuymaw Bibliajj Diosan Arupawa sasin iyawsapjje ukhamarak Diosaw utjaskakiñapatak yanaptʼawayi sasaw amuyapjjaraki. Qallta yatichäwin parltʼaniwayktan uka Faizal sat chachajja, kunanakattï pächaskäna ukanak jupa pachpa Bibliat yatjjatañwa amtäna. Kuntï Biblian yateqkäna ukajj chuymaruw purtʼäna. Jupajj cristianöptwa sirinakajj kuntï yatichapki ukajj jan Bibliarjamätapwa amuyäna. Ukat Diosajj aka Oraqetak mä suma amtanïtap yatiñajj chuymapwa chʼalljjtayäna.

Faizal chachajj akham siwa: “Utjkitu uka Bibliajj Diosan mä suma regalopätap jichhaw sum amuyta. Diosaw alajjpachsa aka Oraqsa lurawayi, ukhamajj ¿janit Diosajj Arupsa churkistaspa ukat jarkʼaqkarakispa? Janiw ukhamäkaspati sissna ukhajja, Diosajj janiw chʼamanïkiti sisksnas ukhamäspawa. Ukham sañatakejj janiw nayajj khitiktsa” sasa (Isaías 40:8).