¿Kunjamsa sum jakasisma?

DIOSAJJA, kunjamtï jichha tiempon jaqenakajj jakapki ukham jakapjjañap janiw munkänti. Jan ukasti, Taqe Kunjjar Munañanïtapar respetapjjaspa, ewjjtʼanakaparus istʼapjjaspa, Jupajj kunjam Diosäkiti ukat yateqasipjjaspa ukwa munäna. Jaqenakajj maynit maynikam sum apasipjjaspa, familiapampis wali kusisit jakasipjjaspa, yaqha lurañanak yateqasipkakispa ukat aka oraqsa mä suma paraisor tukuyapjjaspa ukwa Jupajj munarakïna.

DIOSAJJ KUNJAM JAKASIÑASTÏ MUNKÄNA UKA AMTAP PHOQANIWA

• “Aka oraq tukuskamaw nuwasiñ tʼakurayi” (Salmo 46:9).

• “Oraqe tukjasipki ukanakar tʼunjañatakisa, señalat tiempojj purinjjewa” (Apocalipsis 11:18).

• ‘Janiw khitis sisjjaniti: “Usutätwa” sasajja’ (Isaías 33:24).

• “Ajllitanakajjasti kuntejj amparapampi lurasipki ukwa manqʼasipjjani” (Isaías 65:22).

¿Kunjamsa uka profecianakajj phoqasini? Jehová Diosajja, Yoqaparuw reinopan Reyïñapatakejj uttʼayi, jupaw alajjpachatpach aka oraqjjaru apnaqanini. Bibliarjamajja, ukajj Diosan Reinopa sasin uñtʼatawa (Daniel 2:44). Ukatjja, Jesusarojj ‘Jehová Diosaw trono churani. Janirakiw Reinopajj tukuskaniti’ sasaw Bibliajj qhanañcharaki (Lucas 1:32, 33).

Jesusajj aka oraqenkkäna ukhajja, kunayman milagronakwa luräna. Ukanak lurasajja, apnaqjjani ukhajj kunanaksa jaqenak layku lurani, ukwa uñachtʼayäna.

JESUSAJJ KUNANAKSA ISTʼASIR JAQENAK LAYKOJJ LURANI UKWA UÑACHTʼAYÄNA

• Kunayman usutanakaruw qolläna, ukhamatwa usunak tukjañatakejj qhawqha chʼamanisa uk uñachtʼayäna (Mateo 9:35).

• Mä jachʼa thayaruw tʼakurayäna, ukhamatwa kunanakatï aka oraqen utjki ukanakjjarus munañanïtapa uñachtʼayäna (Marcos 4:36-39).

• Walja waranqa jaqenakaruw manqʼayäna, ukhamatwa kunanakatï jakañatak munaski uk churañatak chʼamanïtap uñachtʼayäna (Marcos 6:41-44).

• Mä casarasïwinjja, um vinoruw tukuyäna, ukhamatwa Jesusajj apnaqjjestani ukhajj kusisitaw jakasiñäni sasin confiysna (Juan 2:7-11).

Uka suma bendicionanak katoqañatakejj ¿kunsa lurañama? Mä thakinjamwa sarañama. Uka ‘thakejj jakañar apiriwa, jukʼanikiw uka thaki jikjjatapjje’ sasaw Bibliajj qhanañchi (Mateo 7:14).

SUMA JAKASIÑAR APIR THAKI

¿Kawkïris jakañar apiri thakejja? Diosajj akham siwa: “Nayätwa [Jehová] Tatitu Diosamajja, nayasti kunatejj jumatakejj askïki ukwa yatichsma, kawki thakinjamtejj sarañamäki ukanjam irparaksma” sasa (Isaías 48:17). Uka thakinjam sarañaw sum jakasiñatak yanaptʼistu.

Jesusajj “nayätwa thakisa, cheqasa, jakañasa” sasaw säna (Juan 14:6). Jiwasatï Jesusan yatichäwinakapar creyiñäni, jupat yateqasis sarnaqañäni ukhajja, Diosarojj jakʼachasiñäniwa ukat sumaw jakasirakiñäni.

¿Kunjamatsa jakañar apiri thaki jikjjatasma? Walja religionanakas utjkchejja, Jesusajj akhamwa ewjjtʼäna: “Janiw taqe khitinakatï ‘Tatay, Tatay’ sasin sapkitu ukanakajj alajjpachankir Reinorojj mantapkaniti, jan ukasti taqe khitinakatï alajjpachankir Awkijan munañap lurapki ukanakakiw mantapjjani” sasa (Mateo 7:21). “Achunakapatwa jupanakarojj uñtʼapjjäta” sasaw sarakïna (Mateo 7:16). Kawkïris cheqpach religionajja uk yatiñatakejja, Bibliaw yanaptʼiristam (Juan 17:17).

¿Jakañar apiri thakinjam sarañatakejj kunsa lurañama? Khititï jakañ churkistu ukaruw uñtʼañama. Khitisa, kuna sutinisa, kunjam chuymanisa, kunsa jiwas layku luraski ukat kun lurañassa muni ukanakwa yatjjatañama.a

Jehová Diosajja, janiw trabajiñasaki, manqʼañasaki, kusistʼañasaki, familianïñasaki munkänti. Antisas Jupar uñtʼsna, amigopäsna ukwa munäna. Kunapachatï Diosar istʼtan ukhajja, Jupar wal munasitaswa uñachtʼaytanjja. Jesusajj akham sänwa: “Khitinakatï wiñay jakañ katoqapkani ukanakajja juma sapa cheqpach Diosar uñtʼasipkakiñapawa” sasa (Juan 17:3).

THAKINJAM SARAÑ QALLTAM

Cheqpach Diosaru kusisiyañatakejja, inas cambionak lurañamajj wakischini. Ukajj chʼamjamäkchinisa, sum jakasiñar apiri thakin sarañ qalltäta ukhajj kusisitaw jakasïta. Dios toqet inas jisktʼamajj utjchi, ukhamächi ukhajja, Internetan www.jw.org cheqanwa Bibliat yatichayasiñataki mayisma. Jehová Diosan Testigonakapajj taqe chuymaw yanaptʼapjjerisma, ukat mayniw kuna horasarusa kawkjansa yatjjatañ munasma ukar jutani.