“Jan llakisimti, nayäsktwa juman Diosamajja”

1, 2. 1) ¿Kunjamsa Isaías 41:10 textojj Yoshiko kullakar yanaptʼäna? 2) ¿Jehová Diosan arunakapajj khitinakarus yanaptʼarakispa?

DIOSAR serviri Yoshiko sat kullakarojja, “mä qhawqha phajjsinakakiw jakjjäta” sasaw doctorapajj säna. Uk satajja, ukspachaw kullakajj wal gustkäna uka textonakat may amtäna. Ukajj Isaías 41:10 textönwa (liytʼañataki). Ukat jan sint llakisisaw doctorar akham säna: “Jehová Diosaw amparapamp katjjäsiskitu, ukatwa jan ajjsarkti” sasa.b Uka textow kullakar chuymachtʼäna, Diosar taqe chuyma confiyañatakiw yanaptʼarakïna. Jan walinakan uñjaskañäni ukhajja, ukhamarakiw uka textojj yanaptʼistani. Jan sint llakisiñatakejj kunjamsa uka textojj yanaptʼistu uk sum amuyañatakejja, kunatsa Jehová Diosajj Isaías profetar uka arunak säna ukwa nayraqat yatjjatañäni.

² Qalltanjja, Babiloniar apat uñjasipjjañapäkäna uka judionakar chuymachtʼañatakiw Diosajj Isaías profetar uka arunak säna. Taqe servirinakapar yanaptʼañatakiw Biblian qellqayarakïna (Is. 40:8; Rom. 15:4). Jichhürunakanjja, ‘chʼama tukuña jan wali tiemponakanwa’ jaktanjja, ukatwa nayrat sipansa, Isaías libron qellqatäki uka arunakampi chʼamañchtʼatäñ muntanjja (2 Tim. 3:1).

3. 1) ¿Kuna promesanakas Isaías 41:10 texton qellqat utji? 2) ¿Kunatsa Diosan uka promesanakap wal muntanjja?

³ Aka yatichäwinjja, Diosan kimsa promesanakapatwa parlaskañäni, ukaw Jupar jukʼamp confiyañatak yanaptʼistani. Uka promesanakajj Isaías 41:10 texton qellqatawa, ukarakiw 2019 maratak Bibliat apstʼat textojja. 1) Jehová Diosaw jiwasampïskani. 2) Jupaw Diosasajja. 3) Juparakiw yanaptʼistani. Cheqas taqeniw Yoshiko kullakjamajj kunayman jan walinakan uñjastanjja. Akapachasti, kunaymanitwa Diosat jitheqtayañ munistu. Yaqhep jilat kullakanakajja, wali chʼamani gobiernonakan arknaqataw uñjasipjje. Ukatwa Diosan uka promesanakap wal muntanjja.c

‘NAYAW JUMAMPÏSKTA’

4. 1) ¿Jehová Diosan kuna promesapatsa nayraqat yatjjataskañäni? (Qhanañchäwip uñjjattʼäta). 2) ¿Kuna arunakampis Jehová Diosajj jiwasar munasitap uñachtʼayistu? 3) Kuntï Jehová Diosajj siskistu ukajja, ¿kunjamsa yanaptʼtamjja?

⁴ Jehová Diosajj akham sasaw jan sint llakisiñatak yanaptʼistu: ‘Jan ajjsaramti, nayaw jumampïskta’ sasa. ¿Kunjamsa Diosajj jiwasampïskatap uñachtʼayistu? Jupajj wali munasiñampiw uñjistu, jiwasatsa llakisipuniwa, ukatwa akham sistu: “Jumajj wali jila alanïtawa, nayasti wal munassma” sasa (Is. 43:4). Jehová Diosajj servirinakapar munasipuniniwa, janiw kunäkipansa jaytanukkaniti (Is. 54:10). Jupajj amigosawa, wal munasirakistu, uk yatiñajj jan ajjsarirïñatakiw yanaptʼistu. Kunjamtï Abram (Abrahán) amigopar jarkʼaqkänjja, ukhamarakiw Diosajj jarkʼaqestani. Jupajj akham sänwa: “Jan ajjsaramti, Abram, nayätwa jumar arjjatirimajja” sasa (Gén. 15:1).d

5, 6. 1) Diosajj jan walinakan uñjasktan ukhajj wal yanaptʼañ munistu, ¿kunatsa ukham sistanjja? 2) ¿Kunsa Yoshiko kullakat yateqsna?

⁵ Jehová Diosajj jan walinakan uñjasktan ukhajj wal yanaptʼañ munistu, ukatwa akham sistu: “Umanjam makhatañamächejja, nayaw jumampïskäjja, jawiranak makhatañamächejja, janiw jalantasin jiwkätati; ninanjam pasañamächejja, janiw nakhantkätati, ninas janiw jumanjja nakkaniti” sasa (Is. 43:2). ¿Uka arunakajj kamsañsa muni?

⁶ “Janiw kuna jan walinakansa uñjasipkätati” sasajj janiw Jehová Diosajj siskistuti. Ukampis jawirar uñtasita, jan ukajj ninar uñtasita jan waltʼäwinakampi wiñayatak tʼaqesiñas janiw permitkaniti. Ukatwa ‘nayaw jumampïskä’ sasin sistu. Jiwayañ munapkistani ukhasa, Diosaw jan ajjsarañatak yanaptʼistani, ukhamat Jupat jan jitheqtañataki (Is. 41:13). Qalltan parlaniwayktan uka Yoshiko kullakarojj ukhamwa yanaptʼäna. Phuchapajj akham siwa: “Mamitajajj janiw sint llakiskänti, ukajj wali musparkañänwa. Jehová Diosaw ukhamäñapatak yanaptʼaskäna. Jiwjjäna uka urusa, enfermeranakaru ukat yaqha usutanakarojj Jehová Diosatsa, promesanakapatsa parlaskakïnwa” sasa. ¿Kunsa Yoshiko kullakat yateqsna? Jiwasatï ‘nayaw jumampïskä’ sasin Diosajj siskistu ukar confiyañäni ukhajja, jan ajjsarasaw jan waltʼäwinak aguantañäni.

‘NAYÄSKTWA JUMAN DIOSAMAJJA’

7, 8. 1) ¿Diosan kawkïr promesapatsa parlaskañäni, ukat ‘llakisiña’ siski uka arojj kunsa amuytʼayistu? 2) Babilonian katuntat uñjasipjjañapäkäna uka judionakarojja, ¿kunatsa Diosajj ‘jan llakisipjjamti’ sasin säna? 3) Judionakan jan sinti llakisipjjañapatakejja, ¿kunsa Diosajj Isaías 46:3, 4 texton säna?

⁷ Jichhajj Jehová Diosan payïr promesapat parltʼañäni. Jupajj akham sänwa: ‘Jan llakisimti, nayäsktwa juman Diosamajja’ sasa. Nayra hebreo arut qellqatanakanjja, ‘llakisiña’ siski uka arojj “kunjamsa mä jaqejj ajjsarayasisin qhepar uñti”, jan ukajj “uks aks uñti” ukwa amuytʼayistu.

⁸ Babiloniar apat uñjasipjjañapäkäna uka judionakarojja, ¿kunatsa Jehová Diosajj ‘jan llakisipjjamti’ sasin sispachäna? Babiloniankir jaqenakajj wal ajjsarayasipjjañapäna, uk yatisaw Diosajj ukham säna. ¿Kunatsa ajjsarayasipjjañapäna? Judionakajj Babilonian 70 maranak katuntatäjjapjjäna ukhaw medopersa ejercitojj uka markar katuntäna. Uka ejército toqew Diosajj markapar qhespiyäna (Is. 41:2-4). Babilonionakasa yaqha markankir jaqenakasa, enemigonakapan jakʼachasinipjjatap uñjasajja, “chʼaman saytʼasim” sasaw maynit maynikam chʼamañchtʼasipjjäna. Jarkʼaqatäñatakejja, yaqha diosanakwa lurasipjjarakïna (Is. 41:5-7). Ukañkamajja, Jehová Diosan aka arunakapaw markapar chuymachtʼäna: ‘Istʼam Israel, [yaqha markanakat sipansa] jumaw nayan servirijätajja’ sasa. Jan llakisipjjañapatakejja, “nayäsktwa juman Diosamajja” sasaw sarakïna (Is. 41:8-10). Ukham sasajja, jupanakat jan armasitapa ukhamarak markapjam uñjaskakitapwa Diosajj jupat jan jitheqtir judionakar amtayäna. Ukatjja, ‘nayaw uñjasipkäma, qhespiyapjjarakïma’ sasaw sarakïna. Uka arunakajj Babilonian katuntat judionakar wal chʼamañchtʼpachäna (Isaías 46:3, 4 liytʼañataki).

9, 10. ¿Kunatsa jan sint llakisiñasäki? Uk mä uñachtʼäwimp qhanañchtʼam.

⁹ Jan walinak jukʼamp jiljjattatapatjja, jaqenakajj wali llakitäpjjewa, jiwasas llakisiraktanwa. Ukampis janiw sinti llakisiñasäkiti, Jehová Diosajj akham sistuwa: ‘Nayäsktwa juman Diosamajja’ sasa. ¿Kunatsa uka arunakajj wal chʼamañchtʼistu?

¹⁰ Amuytʼañatakejja, Juan waynampi Bruno waynampejj avionatsa viajipkaspa ukham sañäni. Avionan niya jalaqtirjam saratapatjja, avión apnaqerejj akham sasaw viajirinakar yatiyi: “Avión apnaqeriw parlapjjtam. Tiempojj janiw walïkiti, ukhamajj asientonkir cinturonamp sum segurtʼasipjjam. Ukampis jan llakisipjjamti, janiw kunas paskaniti” sasa. Juan waynajj wali sustjatawa, Bruno waynasti janiw sustjatäkiti. Ukatwa Juanajj akham jisktʼi: “¿Kunatsa jan llakiskta?” sasa. Brunojj akham siwa: “Avión apnaqerirojj sum uñtʼta. Tatajawa, jupajj avión apnaqañ sum yati. Jupat parltʼäma, ukaw jan sint llakisiñatak yanaptʼätam” sasa.

11. ¿Kunsa Juan waynampita Bruno waynampit yateqsna?

¹¹ ¿Kunsa uka pä waynanakat yateqsna? Bruno waynjamaw jiwasajj alajjpachankir Awkisar sum uñtʼtanjja, ukatwa jan sint llakisktanti. Jupaw aka qhepa urunakan jan walinakajj utjki ukanakar saykatañatak yanaptʼistani (Is. 35:4). Diosar jan uñtʼir jaqenakajj walsa ajjsarayasipkchejja, jiwasajj Jehová Diosar confiyatas laykojj janiw ajjsarayasktanti (Is. 30:15). Bruno waynjamarakiw kunatsa Jehová Diosar confiytan uk jaqenakar yatiytanjja. Ukhamat jupanakajj jan walinakan uñjasipjjani ukhajja, “Jehová Diosaw yanaptʼitani” sasin confiyapjjañapataki.

‘NAYAW CHʼAMAÑCHASKÄMA, YANAPASKARAKÏMA’

12. 1) ¿Kawkïris Jehová Diosan kimsïr promesapajja? 2) “Chʼamampirakiw apnaqani” siski uka arunakajja, ¿kunsa amtayistu?

¹² Diosan kimsïr promesapat parltʼañäni, Jupajj akham sänwa: ‘Nayaw chʼamañchaskäma, yanapaskarakïma’ sasa. Isaías profetajja, kunjamsa Jehová Diosajj markapar chʼamañchtʼani uk akham sasaw sisjjäna: “Tatitojj chʼamapampiw purini[ni], taqe kunsa chʼamampirakiw apnaqani” sasa (Is. 40:10). “Chʼamampirakiw apnaqani” siski uka arunakajja, Diosajj wali chʼamani Reyïtapwa amtayistu. Nayrajja, Diosajj jan atipjkay chʼamapampiw servirinakapar yanaptʼäna jarkʼaqarakïna. Jichhürunakanjja, ukhamarakiw Diosajj jupar confiyirinakar chʼamañchaski jarkʼaqaskaraki (Deut. 1:30, 31; Is. 43:10).

13. 1) ¿Kunapachas Jehová Diosajj arsutaparjam chʼam churistu? 2) ¿Kuna arunakas chʼamañchtʼistu Diosar confiyañatakis yanaptʼarakistu?

¹³ Arknaqat uñjasktan ukhaw Diosajj arsutaparjam phoqasajj chʼam churistu. Yaqhep markanakanjja, jan predicasiñapatakisa jan ukajj Testigonakar chhaqtayañatakisa, kunaymaninakwa jaqenakajj lurasipki. ¿Kunatsa ukajj jan sint llakisiykistu? Jehová Diosajj akham sistuwa: “Jumar tukjañäkis uka armjja janiw khitis jichhakam lurkiti” sasa (Is. 54:17). Uka arunakajj walpun chʼamañchtʼistu, Diosar confiyañatakiw yanaptʼarakistu. Aka kimsa puntonakwa amtayarakistu.

14. ¿Kunatsa enemigonakasampi arknaqatäñ suytanjja?

¹⁴ Maya, akapachankir jaqenakampi uñisitäñwa suytanjja (Mat. 10:22). Jesusan arunakaparjamajja, discipulonakapajj jan sinttʼasis arknaqataw qhepa urunakan uñjasipjjañapäna (Mat. 24:9; Juan 15:20). Paya, kunjamtï Isaiasajj siskänjja, enemigonakasajj janiw aleqak uñisipkistaniti, jan ukasti, kunaymanitwa jan waltʼayañ munapjjarakistani. ¿Kunjamsa uk lurapjjani? Jan amuykay engañonakampi, jiwasat jan walinak parlasa, jan sinttʼasis arknaqasaw jan waltʼayañ munapjjestani (Mat. 5:11). Diosajj janiw ukanak lurapjjañapatak jarkʼkaniti (Efes. 6:12; Apoc. 12:17). Ukampis janiw ajjsarañasäkiti, ¿kunatsa?

15, 16. 1) ¿Kuna arunaksa janipun armañasäki, ukat kunjamsa Isaías 25:4, 5 qellqatajj uk sum amuytʼayistu? 2) Isaías 41:11, 12 qellqatarjamajja, ¿kunas enemigonakasamp pasani?

¹⁵ Kimsa, Diosajj akham sistuwa: “Jumar tukjañäkis uka armjja janiw khitis jichhakam lurkiti [jan ukajja, ‘uka armanakajj inamayakïniwa’, NM]” sasa. Uka arunak janipuniw armañasäkiti. Kunjamtï mä perqajj jachʼa thayanakat jarkʼaqkistojja, ukhamarakiw Jehová Diosajj ‘qhoru jaqenakan phustʼatanakapat’ jarkʼaqestu (Isaías 25:4, 5 liytʼañataki). Ukhamasti, enemigonakasajj tʼaqesiykistu ukajj janiw wiñayatakïkaniti (Is. 65:17).

¹⁶ Jehová Diosajj jupar jukʼamp confiyañatakejja, enemigonakasajj kunjamansa uñjasipjjani ukwa qhanañchistu (Isaías 41:11, 12 liytʼañataki). Jiwasar chhaqtayañatakejj walsa chʼamachasipkchinejja, “qʼala tukjataw uñjasipjjani”.

¿KUNAS DIOSAR JUKʼAMP CONFIYAÑATAK YANAPTʼISTASPA?

17, 18. 1) ¿Kunjamsa Biblia liyiñajj Diosar jukʼamp confiyañatak yanaptʼistu? Uk mä uñachtʼäwimp qhanañchtʼam. 2) ¿Kunatsa 2019 maratak Bibliat apstʼat textot lupʼiñasa?

¹⁷ Jehová Diosar jukʼamp uñtʼtan ukhajja, jukʼampirakiw Jupar confiytanjja. Ukatakejja, wali amuyumpiw Biblia liyiñasa, kuntï liyktan ukanakatsa lupʼiñasarakiwa. Diosajj kunjamsa servirinakapar yanaptʼäna ukajj Biblian qellqatawa, ukanak liyiñajja, “Diosajj ukhamarakiw nayar yanaptʼitani” sasin confiyañatakiw yanaptʼistu.

¹⁸ Diosajj kunjamsa jarkʼaqestu uk amuytʼañasatakejja, Isaías profetajj akham sasaw qellqäna: “Kunjämatejj mä awatirejj ovejanakap antʼata jutejja, ukhamarakiw jupajj juti, amparapar ovejanak ichtʼata, ichjjarusiwa ovejanakaparojja” sasa (Is. 40:11). Jehová Diosajj kunjamsa wali munasiñamp uñjistu uk liytʼasajja, janiw kunatsa ajjsarayasktanti ni llakiskaraktansa. Jan walinakan uñjaskasas jan sint llakisiñatakejja, suma phoqeri amuyasir esclavojj kuntï Isaías 41:10 texton siski ukwa 2019 maratak ajlliwayi. Ukan akham siwa: “Jan llakisimti, nayäsktwa juman Diosamajja” sasa. Uka arunakat lupʼipjjapuniñäni. Ukaw jan walinakan uñjaskañäni ukhajj chʼam churistani.