Qʼumäsax Diosaruw Jachʼanchtanxa
1. ¿Diosaru yupaychañatakixa qhawqha wakiskirïnsa qʼumäñaxa?
1 Moisesax Diosat katuqkäna uka Leyinakanxa, suma qʼuma sarnaqañataki mayitanakaw utjäna. Uka mayitanak phuqasawa israelitanakaxa mayni markanakat sipansa Diosar yupaychañansa ukat janchi tuqitsa qʼumaki sarnaqapxirïna (Lev. 11:35, 36; 15:1-11; Isa. 52:11). Qʼuma sarnaqasax Diosaruw jachʼañchapxäna ukat markachirinakapas kʼumarakïpxänwa.
2. ¿Kunjamatsa Jehová Diosan mayitanakapar wali askit uñjatasxa uñachtʼaysna?
2 Jichhürunakanxa, yaqhanakat sipansa Jehová Diosan markapax ukham qʼumaw sarnaqapxaraki. Chiqpachansa, markpachax qʼumätanwa, ukampis sapa maynit parlasaxa, ¿qʼumätanwa saraksnati? Suma isthaptʼata, suma qʼuma sarnaqañataki chʼamachasiñäni ukhawa Jehová Diosan mayitanakapar wali askit uñjatasxa uñachtʼayañäni.
3. ¿Kunjamatsa utasan qʼumätasxa uñachtʼayañäni ukat kunatsa ukax wali wakisirixa?
3 ¿Utanakasax kunjamäskisa? ¿Diosan Apnaqäwipat yatiyir sarktan ukax askit uñjatäskaniti? Aka Uraqix suma paraisoruw tukxani sas parlaskaraksna ukat utasasa huertasasa qʼañüskarakispa ukhaxa, ¿jaqix sumti istʼaskistaspa? Utasax jan apthaptʼatäkaspa jan ukax thujsäspa ukhaxa, ¿jutïr pach Diosan Apnaqäwipan jakasirjamaw sarnaqxta sasmati? (od-S págs. 137-139.)
4. 1) ¿Autosax kunjäskisa ukat yatiyir sarañataki yänakasas kunjamäskisa? 2) ¿Jariqasiñ tuqitxa kamsistusa?
4¿Autosasti? ¿Anqäxasa manqhasa qʼumäskiti, jaqix istʼañ munaskistaniti? ¿Isisasa, maletinasasa jan ukax bolsasas kunjamäskisa? ¿Qʼumäskiti jan ukax qʼañucha? ¿Suma qʼuma isthaptʼatati yatiyir sartanxa? Qʼumäskañasatakix cuerposxa jariqtʼasiñasapuniwa, isinakassa tʼaxstʼasipxañasapuniwa (w89-S 1/6, 16-19).
5. ¿Kunjamsa tamax jan sum jariqtʼata jilatarus jan ukax kullakarus uñji ukat kunatsa taman luräwinak katuqapki ukanakax wal amuyasipxañapa?
5 Mä jilatax jan ukax mä kullakax jan suma jariqtʼata utapas qʼañu ukham sarnaqxaspa ukat tamarus jan walit uñjayxaspa ukhaxa, ¿kamachañäspasa? Inas chuymankipstatäxasina jan ukax usutäxasina ukham sarnaqchi, ukhamächi ukaxa, munasiñampi yanaptʼapxañasawa. Inas yaqhipax jan amuyasisa ukham sarnaqchi, ukhamäspa ukhaxa, qʼum sarnaqxañapatak munasiñampi iwxtʼañaw wakisispa. Ukat khitinakatï tamar jan walit uñjaykchi ukanakaxa janiw taman irnaqäwinakxa katuqapkaspati. Ukampis janiw irpir chuyman jilatanakax munañanakapa amtanakapa lurapxañapatak waytʼapxañapäkiti.
6. Khitinakatï Tantachasiñ Utar jutapki ukanakaxa, ¿kunatsa kʼumipxistaspa?
6 Diosat yatiqañ munir jaqinakaruw Tantachäwi Utarux jawstanxa. Chiqpachansa, Tantachasiñ Utax suma qʼumäskipanxa, jan axsartʼasaw jaqinakar jawsantanxa. Ukampis ukhamäskañapatakix sum uñjañasawa. Tantachasir sarkta uka Utax kunjamäskisa. ¿Sillanakasa, uraqisa, pirqanakas qʼumäskiti? ¿Bañox qʼumachasiskapuniti? Thantha alfombra ukat pirqanakat pintura kʼakʼartiri sapüru ukhamaki uñchʼukiskañäni ukhaxa yatintañäniwa, ukatxa, walikïskaspas ukhamwa amuyxsnaxa. Ukampis khitinakatix jichhak jutaskchi ukanakax kʼumipxistaspawa. Ukhamasti, Tantachasiñ Utax wali suma qʼumäskañapatakix taqiniw pichañsa askichañsa yanaptʼapxañasa.
7. ¿Kunatsa qʼuma sarnaqañatakix chʼamachasiñasa?
7 Suma qʼuma isthaptʼasisa, sum jariqtʼasisa ukat utanakas autonakas qʼumachtʼasa, ukatxa Tantachasiñ Utanaka qʼumachtʼasa ukhamanakatwa Diosarux jan kun arsus jachʼañchsnaxa. Sum sarnaqasaxa janiw mayninakar lanktaykañäniti, jan ukasti Diosar chiqapampi qʼuma yupaychataswa uñachtʼayañäni (1 Cor. 10:31, 32; Sant. 1:27).