Jisktʼäwinaka
◼ Jan uñtʼatanakampi Internetan parlañaxa, ¿kunatsa jan walïki?
Internetanxa yaqhanakampi uñtʼasiñataki ukhamarak parltʼañatakixa walja chiqanakaw utji. Uka chiqanakanxa, maynix khitis uk uñachtʼayañatakixa, fotop uchasispa ukhamaraki kawkinsa jaki, qhawqha maranisa, ukat yaqhanakampwa qillqaspa. Ukat internetar mantirinakaxa ukanak uñxatasawa, maynimpi parlañatakix qillqanispa. Uka chiqanakax wayn tawaqunakan wali uñtʼatawa, ukat tamasankir yaqhip wayn tawaqunakaxa, uka chiqanakaruw mantapxatayna Jehová Diosan Qhanañchiripatwa sas siri jaqinakampi parlañataki.
Internetan jikisktan uka jaqinakaxa, khitisa, kuna amtanisa, taman kunjamäskisa uka tuqinakatxa janiw chiq yatiykistaspati, kʼarisipxaspawa (Sal. 26:4). Bibliar jan iyawsirïkasasa, Jehová Diosan Qhanañchiripätwa sasaw kʼarinak parlistaspa, jan ukax uka jaqix tamat jaqsutäskaspawa, jan ukax Jehová Diosan Qhanañchirinakap contra parliri mä jaqsutäskaspawa (Gál. 2:4). Ukatxa, wawanakar abusir jan wali jaqinakaw Internetanxa maynir jan walinak lurañataki thaqhaski, ukham yatiyäwinakaw istʼasi.
Jehová Diosan Qhanañchiripäskapuniwa uk sum yatxatkasasa, ukham Internetan parlkasaxa jan walinak parlañaruw pursna. Kunattix Internetan uñtʼasisaxa jan axsartʼasaw kuns parlatataspa. Ukhamarusa, janiw khitis yatkaniti sasaw maynix amuyaspa, ni awkijas ni taykajas ni irpir chuymaninakas parlataja yatipkaniti sasaw sapxaspa. Wali llakkañawa, kunattix walja jilat kullakanakasan wawanakapawa ukhamanakar purtʼasipxatayna, ukat jan parlkañ arunakampiw parlapxatayna (Efe. 5:3, 4; Col. 3:8). Ukat yaqhipanakaxa khitis jupax uk uñachtʼayañatakixa, jan wali qʼañu luräwinakar wiytir fotonaka sutinakwa uchasipxatayna, jan ukax jan wali qʼañu luräwinakani tukartʼäwinakani videonak uñjapxañapatakiwa direccionanak uchasipxatayna.
Ukhamax awk taykanakasti wawanakapax kunsa computadoran lurasipki ukxa uñjapxañapawa (Pro. 29:15). Jan uñtʼat jaqinakaru utar jawsasin wawanakasamp sapak jaytjañaxa janipuniw walïkaspati. Inas jilïrïxstan jan ukax waynäskstan, taqiniw sum amuytʼasipxañasaxa, janipuniw walïkaspati Jehová Diosan Qhanañchiripätwa sas parlir jan uñtʼat jaqinakampi parlañaxa (Pro. 22:3).