Kunatsa kuttʼaskaktanxa
1. ¿Yatiyir sarañ tuqitxa kuna jisktʼas utji?
1 Walja chiqanakanwa yatiyir sarasax kikpa lugaranakar sapa kuti kutxataskaktanxa. Janiw istʼañ munkti sapkchisa, uka utanakarux kuttʼasipkaktanwa. ¿Jan istʼañ munirinakarux kunatsa yatiyir kuttʼaskaktanxa?
2. Chiqanxa, ¿kunatsa yatiyirix saraskaktanxa?
2 Jehová Diosaru ukat jaqi masisar munasitas layku. Chiqansa, Diosar munasitas laykuw yatiyirix sartanxa. Chuymasax jachʼa Jehová Diosasat mayninakar yatiyañasatakiw nuktʼistu (Luc. 6:45). Jehová Diosar munasisaw kamachinakaparjama sarnaqañatak chʼamachastanxa, ukat uka munasiñarakiw jaqi masisar Diosar jaysapxañapataki yanaptʼañxa chʼamañchistu (Pro. 27:11; 1 Juan 5:3). Janiw jaqix kamsakinis sasa uka amuyumpi yatiyir sarktanti. Kunapachatï nayra cristianonakax uñisita arknaqata uñjasipxäna ukhaxa yatiyir sarasipkakïnwa janiw jaytapkänti (Hech. 5:42). Jaqix janis istʼkistpan jiwasax yatiyaskakiñäniwa, ukhamatwa qhawqsa Jehová Diosar yupaychañ muntan ukhamaraki jupar munastan ukxa uñachtʼayañäni.
3. ¿Kunjamatsa munasiñax yatiyaskakiñasatakix yanaptʼistu?
3 Ukhamaraki, jaqi masisar munasitas laykuw yatiyir saraskaktanxa (Luc. 10:27). Jehová Diosax janiw khitin jiwañapsa munkiti (2 Ped. 3:9). Walja kuti yatiyir sarktan uka lugaranakansa, Jehová Diosar luqtʼañ munirinakar jikxataskaktanwa. Amuytʼañataki, Guadalupe sat islanxa sapa 56 jaqinakatxa 1 Jehová Diosan Qhanañchiripaw utji, pasïr maranxa 214 machaq jilat kullakanakaw bautisasipxatayna. Ukat Jesusan jiwäwip amtañatakixa niya pä tunka waranqa jaqinakaw aywthapipxatayna, mä arunxa, sapa 22 jaqitxa 1 jaqiw uka tantachäwirux saratayna.
4. Yatiyir sarktan uka lugaranakanxa, ¿kunas pasaspa?
4 Yaqha jaqinakampiw jikissna ukat jaqinakas mayjtʼxapxarakispawa. Yatiyir sarktan uka lugaranakanxa yaqha jaqinakampiw jikissna. Jan istʼañ munkistäna uka utar kuttʼasax inas jichhax yaqhampi jikissna jan ukax warmipampi jan ukax chachapampi, inas jupanakax sum istʼchistaspa. Jan ukax inas yaqha chiqat uka jakʼanakar jittanxapxchispa. Awisaxa, awki taykakiw Diosan Apnaqäwipat suma yatiyäwinak jan istʼañ munapkiti. Inas kunapachatï wawanakax jilsxasin jayar sarxapxi ukhax istʼxapxchistaspa.
5. ¿Kunanak utjipansa jukʼampi istʼañ munxapxaspa?
5 Jaqinakas mayjtʼxapxarakispawa. Apóstol Pablox janïr cristianükasax ‘jan wali arunak parliri, jiskʼachiri, uñisis arknaqiri’ ukhamänwa (1 Tim. 1:13). Ukhamarakiwa, jichha tiempo Jehová Diosan luqtirinakapaxa, nayrax janiw chiqa yatichäwinak yatxatañ munapxirïkänti, yaqhipax suma yatiyäwinak apnaqirinakarux uñisipxirïnwa. Akapachan mayjtʼatapatxa, inas jan istʼañ munirinakasa, jan yäqirinakasa istʼañ munxapxchispa. Inas yaqhipax jan walin uñjasisax jukʼampi yatiqañ munxapxchispa, awisax jan irnaqäwiniw uñjasipxaspa, jan ukax mä familiapaw jiwaspa, awisax jan qullqini, usuta ukhamaw uñjasipxarakispa.
6. ¿Kunatsa kusisita yatiyaskakiñasaxa?
6 Akapachan tukusiñapax jakʼankxiwa, jiwasax ukhamarakiw jankʼaki yatiyañasa ukat yatichañasa (Isa. 60:22). Ukhamax kusisita taqi chuyma yatiyasipkakiñäni. Khitimpixay jichhax jikischiñäni, inas jichhax istʼxchistani. Istʼistpas janisa yatiyaskakiñäniwa, janiw jaytañasäkiti. ‘Ukham lurasawa qhispiyasiñäni, ukhamaraki khitinakatix istʼkistani ukanakas qhispiyatäpxarakiniwa’ (1 Tim. 4:16).