¿Kunjämaraki istʼapxanisti?
1. ¿Kunatsa Diosan arunakap yatiyañax chʼamäspa? ¿Kunatsa wasitat kuttʼaskaktanxa?
1 Jehová Diosan jachʼa urupax jankʼakiw jakʼachasisinki, ukatwa Diosar sum uñtʼapxañapataki ukat kunas jaqinakatakix amtapaxa uk jankʼaki yatiyañasax wakisi (Juan 17:3; 2 Ped. 3:9, 10). Inas sawkasirinak taypina ukat jan yäqirinak taypina Diosan arunakap yatiyañax chʼamächi (2 Ped. 3:3, 4). Ukhamäkchisa, amuyatax yatiyktan ukhanakan yatiyañäni ukhax Diosan arunakapar iyaw sirinakax utjaskakiniwa. Jan yatiyir sarkañäni ukhaxa, ¿kunjämaraki istʼapxanisti? (Rom. 10:14, 15.)
2. ¿Apóstol Pablon jan qarjas irnaqatapaxa kunjamsa jiwasar chʼamachistu?
2 Uñisitäsina. Khitinakatix Diosan Apnaqäwipat istʼapki ukanakan askipatakix janipuniw axsarañasäkiti. Amuytʼañäni, Europa uksa tuqinkir markanakatxa Filipos markanwa nayraqat apóstol Pablox suma yatiyäwinak yatiyatayna. Ukat kunapachatï Pablompir Silasampir uñisirinakax kʼari arunakamp juchañchapkäna ukhaxa, walja jaqinakaw jupanakarux lawamp jawqʼjasa carcelar llawintapxäna (Hech. 16:16-24). Ukham jawqʼjatasa, ¿Pablox axsarayasxpachänti? Janiwa, apóstol Pablox misionerjam Diosan Arupat yatiyaskakïnwa, Tesalónica markar sarasaxa mä tama uttʼayäna, ukxa qullan ajayumpi chʼamañchatäsaw uk luräna (1 Tes. 2:2). Apóstol Pablox jan qarjasaw irnaqäna, ¿janit jiwasax ukham irnaqkaraksna? (Gál. 6:9.)
3. ¿Kunatsa jan istʼañ munirinakax jichhax istʼxapxarakispa?
3 Yaqhipanakax Diosan arunakap walja maranakaw jan istʼañ munapkänti, ukampis jichhaxa janiw ukhamäxiti. ¿Kunatäpachasa? Akanakaw maynin jakäwip mayjtʼayaspa: qullqit pistʼañanaka, usuntañanaka, inas familian maynix jiwxchi, ukat Uraqpachan llakkañ yatiyäwis mayjtʼayarakispawa (1 Cor. 7:31). Ukatxa, yaqhip awk taykanakax wawanakapar janiw Diosan arunakap istʼayañ munapxirïkänti, jichhax uka wawanakax jilïr jaqïxasinxa Diosan arunakap istʼañ munapxarakiwa. Jan qarjas yatiyasaxa, uka kast jaqinakaruw janïr akapach tukuskipana Jehová Diosar uñtʼapxañapatak yanaptʼasktanxa (Rom. 10:13).
4. ¿Kunas ‘jan amuktʼas’ yatiyaskakiñatakix yanaptʼistani?
4 ‘Jan amuktʼasa.’ Jehová Diosaru ukhamarak jaqi masisar munasitas laykuw ‘jan amuktʼasa’ taqinir yatiyasa arkirinak tukuyasktanxa, kunjamtï apostolanakax lurapkäna ukhama (Hech. 5:42). Jichhürunakan waljaniw ‘jan wali luräwinak’ uñjasax wali llaktʼatäsipki (Eze. 9:4). Ukampis suma yatiyäwinak istʼasaxa, ¡wali kusisita ukat chʼuymachtʼatarakiw jikxatasipxi! Ukatxa, yaqhipanakax janis Diosan arunakap istʼañ munapkchixa, Qullan Qillqatanakarjamax Arupat yatiyaskakiñatak chʼamachasitasatxa Jehová Diosax wal kusisi (Heb. 13:15, 16).