Yatiyasipkakiñäni
1 Kawkha chiqanakantï yatiyktan ukanakanxa, sapakutiw taqinir yatiyatäxi ukampis jukʼanikiw istʼirinakax sasin inas amuyaraksna. Ukampisa, yatiyir saraskakiñax wali wakiskiriwa, ¿kunatsa? (Mat. 28:19, 20.)
2 Yatipxañapataki. Jesusax ‘akapach tukusiñ urunakan’ chimpupat parlkasaxa, Diosan Apnaqäwipat yatiyañaw wali wakiskirïnixa ukhamat “taqi markanakan yatipxañapataki” sasaw arsuwayäna (Mat. 24:3, 14). Chiqas ukhamapuniwa, kunattix Diosan Apnaqäwipat yatiyatasxa jaqinakax qhan uñjapxi. Utat uta visittʼawayasin sarxtan ukhaxa, inas yaqhipanakax walja horanaka, walja urunak pasatatxa jiwasat parlasipkakchini, ukhamaraki, jan istʼawayapkistu uka jaqinakasa parlasipkakispawa. Kunatsa yatiyasktan uk amuyañaxa jan jaytas yatiyaskakiñatakiw yanaptʼistu. Kunapachatï jaqinakan amuytʼasipxañapataki ukat yatipxañapataki yatiyasktan ukhax profecía arunak phuqasiñapatakiw yanaptʼasktanxa ukhamatwa Jehová Diosarux kusisiyaraktanxa (2 Tes. 1:6-9).
3 Yatiyaskakiñax wali wakiskiriwa. Jaqinakax kunayman luräwinakanwa sarnaqapxi ukatwa jan tiempon uñjasipxi, ukhamasti yatxatañ munirinakaru yanaptʼañatakixa chʼamachtʼasiñasawa. Mä warmirux sapa semanaw jilat kullakanakax yatiyañatakix utapar sarapxirïna, niya maraw ukham lurapxatayna, ukhakiw Bibliat yatiqañatak utaparux katuqxäna. Kuntï istʼkatayna ukax chuymaparuw purïna ukatwa Bibliat yatiqañ qalltäna, tantachäwinakarus sarxarakïnwa ukat mä jukʼa tiemporuxa bautisasiñ amtxäna.
4 Kunjamtï akapachax mayjtʼaskixa, ukhamarakiw jaqinakan jakäwipax mayjtʼaski, ukatwa khitinakatï nayrax jan istʼañ munapkäna ukanakax inas jichhax mä suma suytʼäwi utjatap yatisinxa istʼxapxchispa. Mä jaqikisay Diosan Apnaqäwipat yatiyäwinakar istʼchinixa, yatiyatasax janiw inamayäkaniti.
5 Sapürutjamaw aka Uraqpachan jaqinakax jan wali luräwinak uñjasax ‘wali llaktʼat’ sarnaqasipki (Eze. 9:4). Suma chuyman jaqinakaxa yatiyäwisarux istʼasipkiwa, uksti iyawsir walja jaqinakar uñjasaw amuytanxa (Isa. 2:2, 3). Ukhamasti, munasiñampi jan jaytasa “sumankañ yatiyäwinaka” yatiyasipkakiñäni (Isa. 52:7; Hech. 5:42).