Jukʼampi yatiyañataki chʼamachasiskakiñäni
1 Kunapachatï apóstol Pablox cristianonakar Diosan thakipan sarnaqapxañapataki chʼamachtʼkäna ukhaxa, akham sasaw sarakïna: “Ukhamarjama jukʼamp jukʼampi sum lurasipkakim” sasa (1 Tes. 4:1). Ukampix ¿kamsañs munäna? Kunjamatsa Diosatak jukʼampi irnaqsna uk lurañatakix chʼamachasiskakiñasawa ukhamaraki ‘Diosatak luräwisxa sumrak phuqañasa’ uk sañ munäna (2 Tim. 4:5).
2 Suma amtampi. Taqi kun lurir Diosar sum yupaychañ munasawa jukʼampi lurañatakix chʼamachastanxa. Ukaw jukʼampi Diosat yatiqañasatakisa, ukat kunjamsa Diosar sum yupaychsna uk lurañatakisa yanaptʼarakistu. Suma amtampi ukhamaraki yatxatañataki ukat yatiyir sarañatak suma wakiyasiñampiwa, amtäwinakasarjam sarnaqañ yanaptʼistaspa (Sal. 1:1, 2; Fili. 4:6; Heb. 10:24, 25).
3 Ukhamarusa, yanaptʼasirïña ukat yaqhanak layku tʼaqhisiñwa yatiqapxañasa. Ukatakixa, Jesusan sarnaqäwipat lupʼiñatakiwa Diosat yanap mayiñasa (Mat. 20:28). Yaqhanakar yanaptʼasax Jesusax wal kusisïna (Hech. 20:35). Jaqi masisar taqi chuyma yanaptʼañ munasawa jupat yatiqasitasxa uñachtʼaytanxa, ukat Diosatak jukʼampi irnaqañataki chʼamachasisaw yatiqasiraktanxa (Isa. 6:8).
4 Awk taykan yatichäwipa. Mä jiskʼa wawaxa, Diosar yupaychañsa munaspawa ukat jukʼampi yatiyir sarañatakisa chʼamachasispawa, ukampis ukatakix sum yatichañasawa. Ukat kunjamsa familiapankirinakax Diosatak irnaqapxi ukhamaraki kunjamsa jukʼampi irnaqañataki chʼamachasipxi ukwa wawanakaxa sum yatiqasipxi. Ukhamwa mä jilataxa, jiskʼäskasin achilapar taman luräwinakap lurañ yanaptʼirïna. Kunjamsa achilapax wali kusisita taqi chuyma irnaqtʼäna uk uñjasaxa jukʼampwa jilat kullakanakapar yanaptʼañ munäna. Jichhax irpir chuymaninakan yanapiripäxiwa.
5 Jilatanaka. ‘Maynitix taman mä jilïrïñ munchi ukaxa, uka luräwix wali sumawa’ (1 Tim. 3:1.) Uka arunakampiw jilatanakaruxa, Jehová Diosan markapan irnaqapxañapatakixa mayitanak phuqañaru chʼamachasi. Janiw wali yatxatatäñapäkisa, ni taqi kun sum lurirïñapas wakiskiti, jan ukasti Diosan Apnaqäwip nayrar uchañapawa ukhamaraki taqi chuymaw Diosat yatiyir sarañapa ukanakakiw munasi (Mat. 6:33; 2 Tim. 4:5). Ukhamarusa, sarnaqäwipampiw yaqhanakar yatichañapa.
6 Uraqpachanwa yatiyirinakax munasi. Jehová Diosax horasaparuw jankʼaki jaqinakar apthapiski (Isa. 60:22). Ukatwa, Jesusan taqi arkirinakapaxa jankʼaki Diosan Apnaqäwip laykux sum irnaqapxañapa. Amuytʼañataki, 2005 septiembre phaxsit 2006 agosto tukuykamaxa 248.327 jilat kullakanakaw bautisasipxatayna, mä arunxa: ¡sapürux 680 machaq jilat kullakanakaw bautisasipxatayna! Ukhamasti, kunjamatsa jukʼampi Diosataki irnaqsna ukhamarjamax chʼamachtʼasisipkakiñäni.