Yatiyir sarañatakix aqkir chuymanïskakiñasawa
1 Jehová Diosan Qhanañchirinakapax aka Uraqpachanwa yatiyañataki ukhamarak Cristor arkir tukuyañatakix chʼamachasisktanxa, 1992 marat aksaruxa, sapa marax waranqa millón millón horanakat sipansa jilwa Diosat parltanxa. ¡Ukar sapa maynis mä jukʼa yanaptʼasaxa wal kusistanxa! (Mat. 28:19, 20.)
2 Chiqpachansa Jehová Diosaruw jachʼañchasi, ukat juparakiw aka ‘jan wali tiemponakan’ yatiyaskakiñasatakix yanaptʼistu, ukatwa wal yuspärtanxa (2 Tim. 3:1). Ukat uka wali wakiskir luräwi aqkir chuymampi phuqaskakiñasatakixa, ¿kamachañasasa?
3 Kunatsa. Diosar munastan ukat jaqi masisar munastan ukatwa Diosan Apnaqäwipat yatiyir sartanxa, ukhamaraki jakäwis Diosar katuyasxasax kamsasas arsuyätan uk phuqañ laykuw luraraktanxa (Mat. 22:37-39; 1 Juan 5:3). Chuymasan munasiñ utjipanwa, kunäkipansa yatiyir sarañatakix chʼamachastanxa (Luc. 9:23).
4 Kunjamatsa. Uñisir Supayaxa kunaymanitwa aqkir chuymampi yatiyir sarañatxa apaqañ munistu. Supayan mä qhawqha sipitanakapax akanakawa: yatiyäwinakar jan yäqir jaqinakaruw yatiyasax jikxattanxa ukhaw chʼam laqʼayistaspa, ukat akapachan munañanakapampi, ukat jakañatak sapür luräwinakampiwa apaqarakistaspa, ukat usuntañanakawa llakisiyasin chʼam laqʼjtayistaspa.
5 Ukampis aqkir chuymampi yatiyir sarañatakix chʼamachasiskakiñasawa. ‘Qalltan utjkistän uka munasiñar’ chʼamañchañax wali wakisiriwa, ukhamax sapüruwa Diosan Arupa liyisax lupʼiñasa, ukat ‘amuyasiri chiqapa uywatan’ taqi qillqatanakapatwa askinak apsupxañasa (Apo. 2:4; Mat. 24:45, MT; Sal. 119:97).
6 Ñanqha jaqinakar tʼunjañataki Jehová Diosan urupax niyaw akatjamat purinini, ukwa Bibliankir profecianakax uñachtʼayistu (2 Ped. 2:3; 3:10). Ukhamax uk yatxasaxa, aqkir chuymampi yatiyir saraskakiñatakisa, Cristor arkir tukuyañatakisa chʼamachasiskakiñäni.