Taqi chuyma chʼamachasipxam
1. ¿Kunjam chuymampis yatiyapxañasa?
1 Diosar luqtäwisanxa janipuniw wasitat ukak lurañakistï sañax utjañapäkiti. Ukatwa akham iwxtʼäwi katuqtanxa: “Chʼamañchasipxam, janipun jayrasipxamti, Tatiturusti taqi chuyma servipxam” sasa (Rom. 12:11). Ukampisa, taqi chuyma yatiyañ munatasarux kunas jarktʼakistaspawa. Diosan Apnaqäwipat taqi chuyma yatiyaskakiñatakixa, ¿kunas lurañasäspa? (2 Tim. 1:6, 7.)
2. ¿Taqi chuyma yatiyaskakiñatakix kunas yanaptʼistaspa?
2 Bibliat sapaki yatxataña. Diosan Apnaqäwipat mä suma qhanañchirixa Diosan kamachinakaparuw munasi ukat uka kamachinakat chiqa yatichäwinak yatxatasax wali kusisitaw jikxatasiraki (Sal. 119:97). Bibliat sapak yatxatasax suma yatichäwinakwa jikxattanxa, ukaw chuymar purtʼasin taqi chuyma yatiyañatakix yanapistu. Diosar wal munasitas layku ukat kuntï yatiqktan ukanakat yatiyañ wal munatas laykuw Diosar yupaychtanxa ukat Jupat qhanañcharaktanxa (Heb. 13:15). Chiqpachansa, taqi chuyma yatiyasaw suma yatiyäwinakar wali askirjam uñjatas uñachtʼaytanxa.
3. ¿Kunjamatsa Diosan qullan ajayupax yatiyaskakiñatakix yanaptʼistaspa?
3 Qullan ajayu mayisipxañäni. Chʼamasampikix janiw suma yatiyäwinak yatiyksnati. Taqi chuyma yatiyañatakix Diosan qullan ajayupaw munasi (1 Ped. 4:11). Ukatwa ‘wali jachʼa chʼaman’ Diosar jakʼachtʼasiñasax wakisi, Jupaw taqi chuyma jan axsaras yatiyaskakiñatakix yanapistani (Isa. 40:26, 29-31). Apóstol Pablox Diosar luqtäwipanx kunayman jan walinakanwa uñjasïna, ukampis Diosaw yanaptʼitu sasaw säna (Hech. 26:21, 22). Jehová Diosan qullan ajayupax ukhamarakiw taqi chuyma yatiyaskakiñatakix yanapistani. Ukatwa qullan ajayup mayisipxañasa (Luc. 11:9-13).
4. ¿Taqi chuyma yatiyatasatxa kuna askinakas utjaspa, ukampis kunatsa amuyasiñasa?
4 Diosan Apnaqäwipat taqi chuyma yatiyatas uñjasaw jilat kullakanakax taqi chuyma yatiyañ munapxarakini (2 Cor. 9:2). Yatiyktan uka chiqanakan taqi chuyma yatiyañänixa, jaqinakax istʼañ munapxarakiniwa. Ukampisa, wali amuyumpi ukat llampʼu chuymampirakiw yatiyañasa (Tito 3:2). Sapa mayniw suma yatiyäwinak istʼanit janicha uk amtxi, ukampis jaqinakan amtaparux respetañasawa.
5. ¿Biblian kawkïr iwxtʼaparus istʼañasa?
5 Diosan Apnaqäwipat yatiyirinakjamax qullan ajayun yanaptʼapampix taqi chuyma yatiyasipkakiñäni. Bibliat sapak yatxataña ukat Jehová Diosat qullan ajayup mayisiñaw suma yatiyäwinak taqi chuyma yatiyaskakiñatakix yanapistani. Ukhamatwa qullan ajayun chʼamapampix taqi chuyma yatiyaskakiñäni (1 Tes. 1:5).